އެމްބެސެޑަރ އެޓް ލާޖުކަމުގެ މަޤާމަށް ޑރ. ޢަލީ ނަސީރު

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ޚާރިޖީ ވުޒާރާގެ އެމްބެސެޑަރ އެޓް ލާޖުކަމުގެ މަޤާމަށް ޑރ. ޢަލީ ނަސީރު ހަމަޖައްސަވައިފިއެވެ.

ޑިޕްލޮމެޓިކް ދާއިރާއިން ޕީއެޗްޑީ ހާސިލުކުރައްވާފައިވާ ޑރ. ޢަލީ ނަސީރު ޙާރިޖީ ވުޒާރާއާ ގުޅިވަޑައިގަތީ 1985 ވަނަ އަހަރުއެވެ. އޭގެ ފަހުން އެ ވުޒާރާގެ އިތުރުން ދިވެހި ޑިޕްލޮމެޓިކް މިޝަންތަކުގައިވެސް އެކި މަޤާމުތައް ވަނީ ފުރުއްވާފައެވެ. 2013 ވަނަ އަހަރުން ފެށިގެން 2017ގެ ނިޔަލަށް ޑރ. ޢަލީ ނަސީރު ހުންނެވީ ޙާރީޖީ ވުޒާރާގެ ފޮރިން ސެކެރެޓަރީގެ މަޤާމުގައެވެ.

އޭގެފަހުން 2019ގެ ނިޔަލަށް ޑރ. ޢަލީ ނަސީރު ހުންނެވީ ރާއްޖެއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބް އަދި ރާއްޖެއިން އެމެރިކާ އަދި ކެނޑާއަށް ކަނޑައަޅުއްވާފައި ހުންނަވާ ސަފީރުގެ މަޤާމުގައެވެ. އަދި 2019 އިން ފެށިގެން 2022 ވަނަ އަހަރު މަޤާމުން ވަކިވެޑައިގަންނަވަންދެން ހުންނެވީ ޙަރިޖީ ވުޒާރާގެ މަލްޓިލެޓަރލް ސެކެރެޓަރީގެ މަޤާމުގައެވެ.

ޚާރިޖީ ވުޒާރާގެ ސްޓޭޓް މިނިސްޓަރުކަމަށްވެސް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ބޭފުޅަކު އައްޔަންކުރައްވާފައެވެ. އެ މަޤާމަށް އައްޔަންކުރެއްވީ މުޙައްމަދު ޝަހުދީއެވެ. ސައިންސް އިން އިންޓަރނޭޝަނަލް ޕޮލިސީ އެނަލައިސިސްގެ ދާއިރާއިން މާސްޓަރސް ހާސިލުކުރައްވާފައިވާ މުޙައްމަދު ޝަހުދީ ޚާރިޖީ ވުޒާރާއާ ގުޅިވަޑައިގަތީ 1991 ވަނަ އަހަރުއެވެ. އޭގެފަހުން އެ ވުޒާރާގެ އެކި މަޤާމުތައް ވަނީ ފުރުއްވާފައެވެ. 2018 ވަނަ އަހަރު މަޤާމުން ވަކިވެޑައިގަތުމާއި ހަމައަށް އެންމެ ފަހުން ޝަހުދީ ހުންނެވީ ޗީޕް ޕްރޮޓޮކޯލްގެ މަޤާމުގައެވެ.