ޢަދުލަށް ޙުކުމް ކުރައްވާއިރު، ތަފާތުކުރުމެއް ނެތި ޙުކުމް ކުރައްވާ: އުއްތަމަ ފަނޑިޔާރު

ޙުކުމް ކުރައްވާއިރު، ތަފާތު ކުރުމެއް ނެތި ޙުކުމް ކުރައްވެމަށް، ރާއްޖޭގެ އެންމެހާ ފަނޑިޔާރުންނަށް، އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާން އިލްތިމާސްކުރައްވާފިއެވެ. އުއްތަމަ ފަނޑިޔާރު މިކަމަށް އިލްތިމާސް ކުރައްވާފައި މިވަނީ އއ. ހިމަންދޫ މެޖިސްޓްރޭޓް ކޯޓުގެ އައު ޢިމާރާތް ރަސްމީކޮށް ހުޅުއްވާދެއްވާ ދެއްކެވި ވާހަކަފުޅުގައެވެ.

ހިމަންދޫ ކޯޓުގެ އައު ޢިމާރާތް ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން އުއްތަމަ ފަނޑިޔާރު ވިދާޅުވީ ޢަދުލުއިންސާފު ހޯދާދިނުމުގައި ފަނޑިޔާރުން ކުރައްވަނީ ވަރަށް ބުރަ މަސައްކަތްތަކެއް ކަމަށެވެ. ހަމައެއާއެކު، ފަނޑިޔާރުން ޙުކުމް ކުރައްވަނީ އަމިއްލަ ވިސްނުންފުޅަށް ނޫންކަން ފާހަގަކުރައްވަމުން، އުއްތަމަ ފަނޑިޔާރު ވިދާޅުވީ ޙުކުމް ކުރައްވަނީ ރާއްޖޭގެ ޤާނޫނު އަސާސީއަށް ރިޢާޔަތް ކުރައްވާ އެންމެ އިންސާފުވެރި ގޮތަށް ކަމަށް އުއްތަމަ ފަނޑިޔާރު ވިދާޅުވިއެވެ.

ހިމަންދޫއަށް ކުރެއްވި މި ދަތުރުފުޅުގައި ޗީފް ޖުޑިޝަލް އެޑްމިނިސްޓްރޭޓަރ އަލްއުސްތާޛާ ޢާއިޝަތު ރިޒްނާ ވެސް ވަނީ ބައިވެރިވެވަޑައިގެންނެވިއެވެ. މި ރަސްމިއްޔާތުގައި ވާހަކަފުޅުދައްކަވަމުން ރިޒްނާ ވިދާޅުވީ އައު ޢިމާރާތާއިއެކު، އަދުލު އިންސާފަށް ފަސޭހައިން ވާސިލްވެވޭނެ މަގު ތަނަވަސް ވެގެންދާނެ ކަމަށް އުންމީދުކުރައްވާކަމަށެވެ.

އއ. ހިމަންދޫ މެޖިސްޓްރޭޓް ކޯޓުގެ އިމާރާތަކީ، މިދިއަ އަހަރުގެ ޖޫން 22ގައި ރީޖަނަލް ބިލްޑަރސް ޕްރައިވެޓް ލިމިޓެޑް އާއި ހަވާލުކޮށްގެން ކުރިއަށްގެންދިޔަ މަޝްރޫޢުއެކެވެ.

މީގެ ކުރިން އެރަށުގައި މެޖިސްޓްރޭޓު ކޯޓު ހިންގަމުންއައީ ރަށު އޮފީހުން، ކޯޓު ހިންގުމަށް ކަނޑައަޅާފައިވާ ކުޑަ ޖާގައެއްގައެވެ. ކުރިން ކޯޓުގެ މަސައްކަތް ހިންގީ 2 ކޮޓަރި އާއި، ކުޑަ ސިޓިން ރޫމަކައި، ފާޚާނާއެއް ހިމެނޭ ބައެއްގައެވެ.

ނަމަވެސް ތަރައްޤީ އަލަށް ޢިމާރާތްކުރި ކޯޓު ޢިމާރާތަކީ ޤާނޫނުކުން ތަސައްވަރު ކުރާ ފަދަގޮތަކަށް ޝަރީޢަތްތައް ހިންގުމަށް ބޭނުންވާނެ ޖާގައާއި ވަސީލަތްތައް ހިމެނޭ ތަނެއް ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން، ޑީޖޭއޭއިން ވިދާޅުވެއެވެ. އަދި އައު ޢިމާރާތުގައި ޝަރުޢީ ލިޔެކިޔުންތައް އަރުޝީފް ކުރާނެ ޖާގައަކާއި، ޢާންމުންނަށް ޚިދުމަތް ފޯރުކޮށްދިނުމަށް ފަސޭހަވާނެހެން ރިސެޕްޝަން އޭރިއާއެއްގެ އިތުރުން، ވެއިޓިންގ އޭރިއާއެއް ހިމެނޭކަމަށްވެސް ޑީޖޭއޭއިން ވިދާޅުވެއެވެ.

އުއްތަމަ ފަނޑިޔާރު އއ އަތޮޅަށް ކުރައްވާ ދަތުރުފުޅުގައި އެއަތޮޅުގެ ރަށްރަށުގެ މެޖިސްޓްރޭޓް ކޯޓުތަކުގެ މެޖިސްޓްރޭޓަރުންނާއި، މުވައްޒަފުންނާއި ވަނީ ބައްދަލަކުރައްވާފައެވެ.