އިންވޮއިސްތަކަށް ފައިސާ ނުލިބޭތީ، ކުންފުނިތައް ތިބީ ގޮތް ހުސްވެފައި: މަސީ

ކޮންޓްރެކްޓަރުންނަށް ސަރުކާރުން ދޭންޖެހޭ ފައިސާ ލިބުން ލަސްވެ މާލީގޮތުން ބޮޑެތި ގެއްލުންތަކެއްވަމުންދާތީ ކޮންޓްރެކްޓަރުން ތިބީ ގޮތް ހުސްވެފައިކަމަށް މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީން ބުނެފިއެވެ.

މަސީއިން ނެރުނު ނޫސްބަޔާނެއްގައި ބުނެފައިވަނީ ސަރުކާރުން އަތޮޅުތަކުގައި ތަރައްޤީއަށް ހިންގަމުންގެންދާ ޕީއެސްއައިޕީ މަޝްރޫޢުތަކާއި، އެހެނިހެން ޕްރޮޖެކްޓްތަކުގެ މަސައްކަތްކުރާ ކޮންޓްރެކްޓަރުން އަމިއްލަ ތަކެތީގައި މަސައްކަތް ކުރުމަށްފަހު ކޮންޓްރެކްޓްގައިވާގޮތުގެ މަތިން އިންވޮއިސް ހުށަހެޅުމުން ފައިސާ ލިބުން ލަސްވެ ކޮންޓްރެކްޓްތައް ހިންގުމަށް ދަތިވާކަމަށެވެ.

މިކަމުގެ ސަބަބުން މުވައްޒަފުންނަށް މުސާރަ ނުދެވުމާއި، މުވައްޒަފުންގެ ކެއުމާއި އެހެނިހެން ޙަރަދުތައް ހަމަޖެއްސުމަށާއި، މަސައްކަތަށް ބޭނުންވާ ތަކެތި ސަޕްލައިކޮށްދޭ ފަރާތްތަކަށް އަގު ނުދެވިގެން މިކަންކަމުގެ ޝަކުވާ ސަރުކާރުގެ ކަމާބެހޭ ފަރާތްތަކަށް ކުރުމަށްފަހު އެކަމަށް ޙައްލެއް ނުލިބިގެން މަސީގައި ވެސް އެކަމުގެ ކަންބޮޑުވުން ފާޅުކުރަމުން ގެންދާ ކަމަށެވެ.

މަސީއިން ފާހަގަކުރާގޮތުގައި ސަރުކާރުން ދޭންޖެހޭ މަސައްކަތުގެ އަގު ނުލިބިގެން މުވައްޒަފުންނަށް މުސާރަ ނުދެވި މުވައްޒަފުން މަސައްކަތް ހުއްޓާލަމުން ގެންދާކަމާއި، ކޮންޓްރެކްޓަރުން ގޮތް ހުސްވެ ކަންބޮޑުވެފައިވާ ކަމަށެވެ.

މިކަން ހައްލުކުރެވޭތޯ އެ އެސޯސިއޭޝަނުން ވެސް މިހާތަނަށް ވަނީ ސަރުކާރާއެކު ވަރަށް ގިނަ މަސައްކަތަތަކެއްކޮށްފައެވެ. އެގޮތުން ސަރުކާރުގެ ކަމާއިބެހޭ މިނިސްޓްރީތަކާއި، މަސައްކަތްތައް ކުރުވާ މިނިސްޓްރީތަކާއި، ސަވިލް ސަރވިސް ކޮމިޝަނުގެ ވެރިންނާއި ބައްދަލުކޮށް މަޝްވަރާކޮށް ކޮންޓްރެކްޓްގައި އެއްބަސްވެފައި އޮންނަ މުއްދަތުގެތެރޭގައި އިންވޮއިސްގެ ފައިސާ ދިނުމަށް ތަކުރާރުކޮށް އެދިފައިވާނެ ކަމަށް މަސީއިން ހާމަކުރެއެވެ.

އަދި ކޮންޓްރެކްޓްގެ މުއްދަތު ހަމަވެގެން ސަރުކާރުން ކޮންޓްރެކްޓަރު ޖޫރިމަނާކުރާ ފަދައިން، ކޮންޓްރެކްޓަރުންގެ އިންވޮއިސްތަކަށް ކަނޑައެޅިފައިވަ މުއްދަތުގައި ފައިސާ ނުދެވުމުން އޭގެ ޖޫރިމަނާ ކޮންޓްރެކްޓަރުންނަށް ދިނުމަށްވެސް މަސީއިން ވަނީ އިލްތިމާސްކޮށްފައެވެ. އެ އެސޯސިއޭޝަނުން މަސައްކަތް ކުރަމުން ގެންދަނީ ކޮންޓްރެކްޓަރުންގެ މައްސަލަތައް އަޑުހައި ސަރުކާރުގެ ކަމާބެހޭ ފަރާތްތަކާ މަޝްވަރާކޮށްގެން ކަންކަން ހައްލުކުރުމަށްކަމަށް ވަނީ ފާހަގަކޮށްފައެވެ.

ކޮންޓްރެކްޓަރުންނަށް ދިމާވެފައިވާ މައްސަލަތައް ހައްލު ކުރުމަށް ރައީސުލްޖުމްހުރިއްޔާއާ ބައްދަލުކޮށް، އެ އެސޯސިއޭޝަނުން ކުރިއަށް ގެންދިޔަ " ކޮންސްޓްރަކްޝަން އިންޑަސްޓްރީ ޗެލެންޖެސް އެންޑް ޕޮސިބަލް ސޮލޫޝަންސް" ގެ 3ވަނަ ސެމިނަރގައި ފާހަގަކޮށްފައިވާ 24 ނުކުތާގެ މައްޗަށް އެކުލެވޭ ޕްރެސެންޓޭޝަން 2019ވަނަ އަހަރުގެ ނޮވެމްބަރުމަހުގެ 24ވަނަ ދުވަހުވަނީ ހުށަހަޅާފައެވެ. އަދި އޭގެފަހުން ވެސް ތަފާތު ބައްދަލުވުން ތަކުގައި މި މައްސަލަ ސަރުކާރުގެ ސަމާލުކަމަށް ގެނެސްފައިވާނެކަމަށާއި އެހެންނަމަވެސް ވޭތުވެދިޔަ މުއްދަތުގައި މިކަންކަމަށް ހައްލެއް ލިބިފައި ނުވާކަންވެސް މަސީއިން ވަނީ ފާހަގަކޮށްފައެވެ.