3 ބިލިއަން ރުފިޔާގެ ލޯނެއް ނަގަން އެއްވެސް ފަރާތަކާއެކު މަޝްވަރާއެއް ނުކުރަން: އަމީރު
-
3 ބިލިއަން ރުފިޔާގެ ލޯނެއް ރާއްޖެއިން ހޯދަން އުޅޭކަމަށް ބުނެ ދައްކާ ވާހަކަތައް ސަރުކާރުން ދޮގުކުރައްވާ
-
އެފަދަ އެއްވެސް މަޝްވަރާއެއް، ކުރިއަކަށްނުދޭ
3 ބިލިއަން ރުފިޔާގެ ލޯނެއް ހޯދަން ދިވެހި ސަރުކާރުން އިންޑިއާއަށް ހުށަހަޅާފައިވާކަމަށް ބުނެ ފަތުރަމުންދަނީ ހަޤީޤަތާއި ޚިލާފު ވާހަކަތަކެއްކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
މިނިސްޓަރ އަމީރު މިހެން ވިދާޅުވީ ރާއްޖެއިން ބޮޑު ލޯނެއް ހޯދަން އިންޑިއާ ސަރުކާރުގައި އެދިފައިވާކަމަށާއި، އަދި އެކަމާއި ގުޅޭ ބައްދަލުވުންތައްވެސް ބާއްވާފައިވާކަމަށް ބުނެ ރާއްޖޭގެ މީޑިއާއަކުން ފެތުރި ހަބަރަކާއި ގުޅިގެނެވެ.
މިނިސްޓަރ އަމީރު ވިދާޅުވީ ދިވެހި ސަރުކާރުން 3 ބިލިއަން ރުފިޔާގެ ލޯނެއްް ނަގަން އިންޑިއާއަށް ހުށަހަޅާފައިވާކަމަށް ފަތުރަމުންދަނީ ހަޤީޤަތާއި ހިލާފު ވާހަކަތަކެއްކަމަށެވެ. އަދި އެފަދަ އެއްވެސް މަޝްވަރާއެއް، އެއްވެސް ފަރާތަކާއެކު ކުރިއަށް ނުގެންދާނެކަމަށްވެސް އަމީރު ވިދާޅުވިއެވެ.
ސަރުކާރުން 3 ބިލިއަން ރުފިޔާގެ ލޯނެއް އިންޑިއާއިން ނަގަން ހުށަހަޅާފައިވާ ކަމަށް ބުނެ ލިޔެފައިވާ ޚަބަރަކީ ކަނޑައެޅިގެން ދޮގު ޚަބަރެއް! އެފަދަ އެއްވެސް މަޝްވަރާއެއް އެއްވެސް ފަރާތަކާއެކު ކުރިޔަށް ނުގެންދަން.
— Ibrahim Ameer (@iameeru) September 21, 2023
ކޯވިޑަށްފަހު ރާއްޖޭގެ އިޤްތިޞާދަށް ބޮޑެތި ކުރިއެރުންތަކެއް އަންނަމުންދާއިރު ރާއްޖޭގެ އިޤްތިޞާދާއި މާލީ ކަންކަމާއި ގުޅޭގޮތުން ހަޤީޤަތާއި ހިލާފު ވާހަކަތައް ނުފެތުރުމަށް ސަރުކާރުން މީގެކުރިން ވެސް ވަނީ އިލްތިމާސްކޮށްފައެވެ. އަދި އެފަދަ ހަޤީޤަތާއި ހިލާފު ވާހަކަތަކުގެ ސަބަބުން، ރާއްޖޭގެ އިޤްތިޞާދަށް ލިބެމުންދާ ކުރިއެެރުންތަކަށް އޭގެ ނުރަނގު އަސަރުކުރާނެކަން ތަޖުރިބާކާރުންވެސް ފާހަގަކުރައްވައެވެ.
އިޤްތިޞާދީގޮތުން ރާއްޖެއިން މިހާރު ހޯދަމުންދާ ކުރިއެރުންތައް ބައިނަލްއަޤްވާމީ މާލީ އިދާރާތަކުންވެސް ފާހަގަކުރެއެވެ. އިޤްތިޞާދީ ކުރިއެރުންތަކާއެކު، ދައުލަތުގެ އާމްދަނީ އިތުރުވަމުންދާއިރު، ރާއްޖެއިން ދައްކަންޖެހޭ ލޯނުތައް، މިހާރުވެސް ޤަވާއިދުން ދައްކަމުންދާކަމަށާއި، އަދި ކުރިއަށް އޮތްތަނުގައިވެސް އެއްވެސް ދައްޗެއް ނެތި ދެއްކޭނެކަމުގެ ފުރިހަމަ ޔަގީންކަން ދިވެހި ސަރުކާރުން ދެއްވައެވެ.