މާލޭގައި އާރުއޯ ޕްލާންޓް ބެހެއްޓުމުގެ ޢަމަލީ މަސައްކަތް ފަށާފައިވާކަމަށާއި، ކަނޑައަޅާފައިވާ ތާރީޚަށް މަސައްކަތް ނިމޭނެކަމުގެ ޔަޤީންކަންދޭކަމަށް އެމް.ޑަބްލިޔު.އެސް.ސީއިން ހާމަކޮށްފިއެވެ.
ލޮނު ފެނުން ރީތި ފެން އުފެއްދުމަށް ބޭނުންކުރާ ރިވާސް އޮސްމޮސިސް، އާރުއޯ ޕްލާންޓް ބެހެއްޓުމުގެ މަސައްކަތް ހަވާލުކޮށްފައިވަނީ ޖަޕާނުގެ އެކުއަޓެކް އިންޖިނިއަރިންގ ކުންފުންޏާއެވެ. އެމްޑަބްލިޔުއެސްސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ވިދާޅުވީ އާރުއޯ ޕްލާންޓް މެއި މަހު މާލެއަށް ގެނެވި ޖޫންގެ ނިޔަލަށް އެއް ސަރަޙައްދުގައި ކުރިއަށްގެންދެވޭނެކަމަށެވެ. ފަސްސަތޭކަ ޓަނުގެ ފެން އުފައްދާ ޕްލާންޓް ބަލަހައްޓާނެ އިމާރާތް އަޅާނީ ފިއުލް ސަޕްލައިގެ ހުޅަނގަށް އޮންނަ އެމްޑަބްލިއުއެސްސީގެ ބިމުގައެވެ.
މި ޕްލާންޓުން ތައްޔާރު ކުރާ ފެން، ރައްކާކުރުމަށް ހަމަޖެހިފައިވަނީ ކަލާފާނު ސްކޫލް ކައިރީގައި ހުންނަ ފެންތާނގީގައެވެ. ފަޒުލް ވިދާޅުވީ، މީގެ އިތުރަށް ހަވީރީ ހިނގުމުގައި ހުންނަ އެމްޑަބްލިއުއެސްސީގެ ބިމުގައި އިތުރު ފެން ޕްލާންޓެއް ޤާއިމްކުރުމުގެ މަސައްކަތްވެސް މި އަހަރުގެ ނިޔަލަށް ނިންމާނެކަމަށެވެ.
އެމްޑަބްލިޔުއެސްސީން މިދޔަ އަހަރުގެ ނިޔަލަށް ސަރުކާރުގެ ފެނާއި ނަރުދަމާގެ ގިނަ މަޝްރޫޢުތަކެއް ނިންމާފައިވާއިރު، 10 މަޝްރޫޢެއް ފެށުމަށްޓަކައި ޑިޒައިންކުރުމާއި، ފީސިބިލިޓީ ސްޓަޑީ ހެދުމުގެ މަސައްކަތްކުރިއަށްދާކަމަށް ފަޒުލް ވިދާޅުވިއެވެ. މިމަޝްރޫޢުތައް ކުރިއަށްގެންދިޔުމަށް ހަމަޖެހިފައިވަނީ އެކުންފުނީގެ މުވައްޒަފުން ބޭނުންކޮށްގެންކަމަށް ފަޒުލް ވިދާޅުވިއެވެ.
ތަރައްޤީގެ މަޝްރޫޢުތައް ކުރިއަށްގެންދިޔުމުގައި ސަރުކާރު ޙިއްސާވާ ކުންފުނިތަށް ބާރުވެރިކުރުމުގެ ގޮތުން އެމަސައްކަތްތައް ހަވާލުކުރުމަށް ސަރުކާރުން ވަނީ ނިންމާފައެވެ. މިއާއެކު ސަރުކާރުގެ ބަޖެޓަށް ވަރަށް ބޮޑަށް ލުއިވެގެންދާނެކަމަށް ސަރުކާރުން ޤަބޫލުކުރައްވައެވެ.