ބޮޑު އަގުގައި ޑޮލަރު ގަންނަން ވިޔަފާރިތަކުން ކުރާ ހަރަދު ޓެކްސް ފައިލްކުރާއިރު ހިމެނުމަށް ހުރަހެއް ނެތް ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ. މިނިސްޓަރު އަމީރު މިހެން ވިދާޅުވީ ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު ލިޔުމުން ޖަވާބު ހޯދެއްވުމަށް ކުރެއްވި ސުވާލަކަށް ޖަވާބު ދެއްވަމުންނެވެ.
މެންބަރު އިބްރާހިމް ރަޝީދު ފިނޭންސް މިނިސްޓަރަށް ލިޔުމުން ޖަވާބު ހޯދުމަށް ކުރައްވާފައިވާ ސުވާލަކީ ޓެކްސް ސަބްމިޝަންގެ ގޮތުގައި މީރާ އިން ބަލާ މިންގަނޑަކީ ޑޮލަރަކަށް 15.42 ރުފިޔާގެ ރޭޓު ކަމަށާއި ނަމަވެސް ބްލެކް މާކެޓްގައި ޑޮލަރެއް ލިބެނީ 17 ރުފިޔާ ނުވަތަ އެއަށްވުރެ ބޮޑުކޮށް ކަމަށެވެ. އެހެންކަމުން ވިޔަފާރިތަކުން އަސްލު ދައްކަންޖެހޭ ވަރަށްވުރެ އިތުރަށް ޕްރޮފިޓް ޓެކްސް ދައްކަންޖެހި، ގެއްލުން ވަމުން އަންނަ ކަމަށާއި، މިކަން ހައްލުކުރުމަށް މިނިސްޓްރީން އަޅުއްވާ ފިޔަވަޅަކީ ކޮބައިތޯ މެންބަރު ސުވާލުކުރައްވާފައިވެއެވެ.
މި ސުވާލަށް ލިޔުމުން ދެއްވި ޖަވާބުގައި މިނިސްޓަރ އަމީރު ވިދާޅުވެފައިވަނީ ޑޮލަރު ގަތުމުގެ ޚަރަދުތައް ލިޔެކިޔުމުން ބަލަހައްޓާފައިވާނަމަ، އެ ޚަރަދު ޓެކްސް ފައިލްކުރާއިރު ހިމެނުމަށް ހުރަހެއް ނެތް ކަމަށެވެ. އަދި ފޮރިން އެކްސްޗޭންޖް ނިޒާމުގައި ހުރި މައްސަލަތައް ހައްލުކުރުމަށް އެމްއެމްއޭއާއިއެކު ޑީ ޑޮލަރައިޒޭޝަން ސްޓްރެޓަޖީއެއް އެކުލަވާލުމުގެ މަސައްކަތް ކުރަމުން އަންނަކަމަށްވެސް މިނިސްޓަރ އަމީރު ވަނީ ވިދާޅުވެފައެވެ.
"ރަސްމީ ބޭންޑަށްވުރެ މަތީ ރޭޓަކުން ވިޔަފާރިތަކުން ބޭރު ފައިސާ ގަނެ ކޮސްޓް އޮފް ސޭލްސްގެ ތެރޭގައި މި ހަރަދު ހިމެނޭކަން ޔަގީންކުރެވޭ މިންވަރަށް ލިޔެކިޔުން ބަލަހައްޓާފައިވާނަމަ މި ހަރަދު ޓެކްސް ފައިލްކުރާއިރު ހިމެނުމުގައި ހުރަހެއް ނެތް،" މިނިސްޓަރު އަމީރު ވިދާޅުވި އެވެ.
ކަޅު ބާޒާރުގައި ޑޮލަރު ވިއްކުމުގެ މައްސަލައަކީ އަބަދުވެސް އާންމުންނާއި އަދި ވިޔަފާރިވެރިންގެ ބޮޑު ކަންބޮޑުވުމެކެވެ. މި މައްސަލަ ހައްލުކުރުމަށް އެމްއެމްއޭއިންވެސް އަންނަނީ މަސައްކަތް ކުރައްވަމުންނެވެ.