ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލްކުރުމަށް ކުރަމުންދާ މަސައްކަތްތައް ހަލުވިކުރުމަށް އީކޯ އޯގަނައިޒޭޝަންއިން އިންތިޒާމްކޮށްގެން ކޮންފަރެންސެއް ބާއްވަން ނިންމައިފިއެވެ.
މިކޮންފަރެންސް ބާއްވަން ހަމަޖެހިފައި ވަނީ އަންނަ ޖުލައި މަހުގެ 6 ވަނަ ދުވަހުން 9 ވަނަ ދުވަހުގެ ނިޔަލަށެވެ.
"ޕެރެލަލް އިވެންންޓް"ގެ ނަމުގައި ކުރިއަށްގެންދާ މިކޮންފަރެންސްގައި ދެމެހެއްޓެނިވި ތަރައްޤީޤެ ލަނޑުދަނޑިތައް ހާސިލްކުރުމަށް ކުރަމުންދާ މަސައްކަތްތައް ހަލުވިކުރުމަށް ކުރެވޭނެ ކަންތައްތަކާމެދު މަޝްވަރާކުރެވޭނެއެވެ. މިއީ ރާއްޖޭގައި މިފަދަ ކޮންފަރެންސެއް ބޭއްވޭ ފުރަތަމަ ފަހަރަށްވީއިރު، މިކޮންފަރެންސްގައި އެކި ސިނާޢަތްތަކުގެ އިސް މުވައްޒަފުންނާއި ވިޔަފާރިވެރިންނާއި އިންވެސްޓަރުން ބައިވެރިވާނެއެވެ.
އީކޯ އޯގަނައިޒޭޝަންއިން މަޢުލޫމާތުދޭގޮތުގައި މިކޮންފަރެންސް ކުރިއަށްގެންދިއުމަށް ހަމަޖެހިފައިވަނީ 2 ބަޔަކަށް ބަހާލައިގެންނެވެ. ފުރަތަމަ ބައި ކުރިއަށްދާނީ ކްރޮސްރޯޑް މޯލްޑިވްސްގައެވެ. ކްރޮސްރޯޑްސްގައި ކުރިއަށްދާ ސެޝަންގައި ސަފާރިއާއި ޓެކްނޮލޮޖީއާ ގުޅުންހުރި މައުޟޫޢުތަކަށް މަޝްވަރާކުރެވޭނެއެވެ.
ޕަޓީނާ މޯލްޑިވްސްގައި ކުރިއަށްދާ ސެޝަންގައި ދިރިއުޅުމުގެ ވައްޓަފާޅިއާއި ފަންނުވެރިކަމާ ގުޅުންހުރި މަޢުޞޫތަކަށް މަޝްވަރާކުރެވޭނެއެވެ. އަދި މިކޮންފަރެންސްގައި ގޫގްލް، ވޯލްޑް އިކޮނޮމިކް ފޯރަމްގެ އިތުރުން ލިއޮނާޑޯ ދިކެޕްރިއޯ ފައުންޑޭޝަންގެ އިސް ފަރާތްތަކުން ބައިވެރިވެ، ޓެކޮނޮލަޖީއާއި ދެމެހެއްޓޭނިވި ތަރައްޤީގެ ލަނޑުދަނޑީތައް ހާސިލްކުރުމާއި ބެހޭގޮތުން މަޝްވަރާކުރެވޭނެއެވެ.
މީގެއިތުރުން، މިކޮންފަރެންސްގައި ދުނިޔޭގެ އެންމެ ފަހުގެ ޓޭކްނޮލަޖީތަކާއި ބެހޭގޮތުން މަޝްވަރާކުރެވޭނެއެވެ. މިމަޝްވަރާތަކުގައި އިލެކްޓްރިކް ބޯޓު ހެދުމުގެ ދާއިރާއިން ސްވީޑާންގެ މަޝްހޫރު ކުންފުންޏެއްކަމަށްވާ ކެންޑެލާއާއި އެމެރިކާގައި އިލެކްޓްރިކް މަތިންދާބޯޓުތައް އުފެއްދުމުގައި އެންމެ އިސްކޮށް ހަރަކާތްތެރިވާ ކުންފުންޏެއް ކަމަށްވާ އާޗާ ބައިވެރިވާނެކަމަށް އީކޯ އޮގަނއިޒޭޝަންއިން މަޢުލޫމާތުދެއެވެ.
މިކޮންފަރެންސްއަކީ އީކޯ އޮގަނއިޒޭޝަންއާއި ޖަރްމަނުވިލާތުގެ ކުންފުންޏޭއްކަމަށްވާ "ވޯލްޑް ކްލަބް ޒޯން"އިން އިންތިޒާމްކޮށްގެން ކުރިއަށްގެންދާ ކޮންފަރެންސްއެވެ. އަދި މިކޮންފަރެންސް ބާއްވަން ހަމަޖެހިފައި ވަނީ އަންނަ ޖުލައި މަހުގެ 6 ވަނަ ދުވަހުން 9 ވަނަ ދުވަހުގެ ނިޔަލަށެވެ.
މިކޮންފަރެންސްއާއިއެކު ދެމެހެއްޓެނިވި ތަރައްޤިީގެ ލަނޑުދަޑިތައް ހާސިލްކުރުމަށާއި ރާއްޖޭގެ ފަތުރުވެރިކަމުގެ ސިނާއަތަށް ބޮޑު ކުރިއެރުމެއް ލިބޭނެކަމަށް އީކޯ އޮގަނައިޒޭޝަންއިން ފާހަގަކުރައްވައެވެ.