ޑިޖިޓަލް އައިޑެންޓިޓީ ކާޑު ތަޖުރިބާ ކުރުމުގެ ފުރުޞަތު ދިން 500މީހުންނަށް، މިހާރު ޑިޖިޓަލް ކާޑު ބޭނުންކޮށްގެން ޚިދުމަތްތައް ހޯދޭނެ ކަމަށް މިނިސްޓްރީ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީން ވިދާޅުވެއްޖެއެވެ. މިއީ އާއްމުކޮށް ޚިދުމަތް ފެށުމުގެ ކުރިން، ޚިދުމަތް ތަޖުރިބާކޮށް އިތުރަށް ރަނގަޅުކުރަންޖެހޭ ކަންކަން ދެނެގަތުމަށް ދީފައިވާ ފުރުޞަތެކެވެ.
ޑިޖިޓަލް އައިޑެންޓިޓީ ކާޑުގެ ޚިދުމަތަކީ، ސަރުކާރުން ދޭ ޚިދުމަތްތައް ޒަމާނީ ވަސީލަތްތަކާއި ޓެކްނޮލޮޖީއާއި ރަށްޓެހިކޮށް ޑިޖިޓަލް ޚިދުމަތްތައް ދިނުމަށް ކުރާ މަސައްކަތުގެ އެންމެ މުހިންމު އެއް ބައެވެ. މި ކާޑާއެކު، ވޮލެޓުގައި އައިޑީ ކާޑު ގެންގުޅެން ނުޖެހި، އަތުގައި އޮންނަ ސްމާޓް ފޯނުން އެމީހާއަކީ ކާކުކަށް އަންގައިދޭ ރަސްމީ "އައިޑެންންޓިޓީ ކާޑް" ޑިޖިޓަލްކޮށް ފެންނާނެއެވެ.
މި ކާޑުގެ ޚިދުމަތް ދެނީ ސަރުކާރުގެ ޑިޖިޓަލް ޕްލެޓްފޯމް "އީފާސް" ނިޒާމު މެދުވެރިކޮށެވެ. ޑިޖިޓަލް އައިޑެންޓިޓީ ކާޑުގެ މަސައްކަތް ނިމި، މުހިންމު ޓެސްޓިން މަރުހަލާތައްވެސް މިހާރު ވަނީ ފުރިހަމަކޮށްފައެވެ. އަދި ސަރުކާރުގެ ކަމާގުޅުންހުރި 180އަށްވުރެ ގިނަ މުވައްޒަފުން އަންނަނީ މި ކާޑް ތަޖުރިބާކުރަމުންނެވެ.
މީގެ އިތުރުން އާއްމުންގެ 500މީހުންނަށް މި ފުރުޞަތު ހުޅުވާލުމަށް ނިންމީ، ކާޑް އާއްމުކޮށް ބޭނުންކުރަން ފެށުމުގެ ކުރިން ތަޖުރިބާ ކުރުމުގެ ފުރުޞަތު ދިނުމަށެވެ. އަދި ޚިދުމަތް ދިނުމުގައި އިތުރަށް ބަލަންޖެހޭ ކަންކަން ބެލުމަށެވެ.
ޕީއެސްއެމްއަށް މަޢުލޫމާތު ދެއްވަމުން މިނިސްޓްރީ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޯލޮޖީގެ ސްޓޭޓް މިނިސްޓަރ މުޙައްމަދު ޝަރީފު ވިދާޅުވީ އެންޑްރޮއިޑް ކަސްޓަމަރުންނަށް ހުޅުވާލި 500 ފުރުޞަތަށް، ފުރަތަމަ 4ގަޑިއިރުގެ ތެރޭގައި ކަނޑައެޅި އަދަދަށްވުރެ އިތުރަށްވެސް ރިކުއެސްޓްތައް ލިބިނުކަމަށެވެ. މީގެތެރެއިން ފުރަތަމަ ހުށައެޅި 500މީހުންގެ ތެރެއިން، 400އާއި ގާތްކުރާ އަދަދެއްގެ މީހުންނަށް މިހާރު ޑިޖިޓަލް އައިޑެންޓިޓީ ކާޑު ބޭނުންކުރުމުގެ އެކްސެސް ވަނީ ދީފައެވެ.
ޝަރީފް ވިދާޅުވީ ފުރަތަމަ ފުރުޞަތު ދިނީ އެންޑްރޮއިޑް ޔޫސަރސްއަށް ނަމަވެސް، އަންނަ ހަފްތާގެ ތެރޭގައި އައި.އޯ.އެސް ބޭނުންކުރާ މީހުންނަށްވެސް 500 ފުރުޞަތު ހުޅުވާލާނެކަމަށެވެ.
ޑިޖިޓަލް އައިޑެންޓިޓީ ކާޑުގެ ފުރުޞަތު ދީފައިވާ މީހުންނަށް، ޓްރާސްޕޯޓް މިނިސްޓްރީއާއި އަދި ސިވިސް ސަރވިސްގެ ޚިދުމަތްތައް ހޯދުމަށްވެސް ޑިޖިޓަލް އައިޑެންޓިޓީ ކާޑް ބޭނުންކުރެވޭނެއެވެ. މިއީ އައިޑީ ކާޑު ބޭނުންވާ ކޮންމެ ޚިދުމަތަކަށްވެސް މިހާރު ބޭނުންކުރެވޭނެ ރަސްމީ ކާޑެކެވެ.
ޑިޖިޓަލް އައިޑެންޓިޓީ ކާޑު ބޭނުންކުރެވޭނީ އީފާސް މެދުވެރިކޮށެވެ. އަދި މި ޚިދުމަތް ދެނީ ގިނަ ސެކިއުރިޓީ ފީޗަރތައްވެސް ހިމެނޭހެންނެވެ.
ޑިޖިޓަލް އައިޑީ ކާޑުގެ ޚިދުމަތް ރަސްމީކޮށް ފެށުމަށް ހަމަޖެހިފައިވަނީ އަންނަ މަހުގެ ތެރޭގައެވެ.