މިފްކޯގެ މަސްކިރުމުގެ ކެޕޭސިޓީ އިތުރުކުރުމަށް މަސް ކިރުވުމުގެ މަސައްކަތަށް 4 ބޯޓު ގެނައުމުގެ މަސައްކަތްކުރަމުންދާކަމަށް އެކުންފުނިން ހާމަކޮށްފިއެވެ.
މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޓެޑް، މިފްކޯއިން މަސައްކަތްކުރަމުންދަނީ ޖަޕާނުން ބޯޓެއް އަދި ތައިލޭންޑުން 3 ބޯޓު ގެނައުމަށެވެ.
މަސްވެރިކަން ރަނގަޅު ދުވަސްވަރު މިފްކޯގެ ކެޕޭސިޓީ ފުރި މަސްވެރިންނަށް މަސް ކިރުވުމަށް ދަތިތަކާއި ކުރިމަތިވެއެވެ. މިކަމަށް ހައްލު ހޯދުމަށް ސަރުކާރުން ދަނީ މިފްކޯގެ ފެސިލިޓީތައް އަޕްގްރޭޑުކުރުމުގެ މަސައްކަތްކުރަމުންނެވެ. އަދި މިކަމަށް އަވަސް ހައްލެއް ހޯދުމަށް މަސް ގަނެ ރައްކާކުރެވޭނެ ކެޕޭސިޓީ ހުރި މަސް ބޯޓު ފަހަރުތަކެއް ހޯދުމުގެ މަސައްކަތް މިފްކޯއިން ދަނީ ކުރަމުންނެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން މިފްކޯގެ ސީއީއޯ އިސްމާއިލް ފައުޒީ ވިދާޅުވީ، މިފްކޯއިން ހޯދަމުން ދަނީ މަސް ގަނެ ގަނޑުކުރެވޭނެ ގާބިލްކަން ހުރި ބޯޓު ފަހަރުތައް ކަމަށެވެ. އަދި މީގެތެރެއިން ޖަޕާނުން ގެނައުމަށް މަސައްކަތްކުރާ މަސް ބޯޓު އަންނަ މަސްތެރޭ ރާއްޖެއަށް ގެނެސް އޮޕަރޭޝަންގައި ބޭނުންކުރެވޭނެ ކަމަށް އިސްމާއިލް ވިދާޅުވިއެވެ.
" ޖަޕާނުން މިގެންނަނީ 120 ޓަނުގެ ބްރައިން ފްރީޒިންގ ވެސަލްއެއް، ގާތްގަނޑަކަށް 400 ޓަނުގެ ސްޓޯރޭޖްއަކާއި އެކު، އަދި އޭގެ އިތުރަށް 3 ބޯޓު އެބަ ގެންނަން ތައިލޭންޑުން، އެ ބޯޓު ފަހަރުގެ ކަންތައް ކުރިއަށް އެބަ ގެންދަން، ޖަޕާނުން ގެންނަ ބޯޓު މާރޗުމަހުގެ ފަހުކޮޅު ގެނެވޭނެ ކަމަށް އުއްމީދު މިކުރަނީ،" އިސްމާއިލް ވިދާޅުވިއެވެ.
އިސްމާއިލް ވިދާޅުވީ، ބޯޓު ފަހަރުތައް ރާއްޖެއަށް ގެންނާނީ އޮޕަރޭޝަންގައި ބޭނުންކުރުމަށް ގެންނަން ޖެހޭ ބަދަލުތަކާއެކު ކަމަށެވެ. އަދި މި ބޯޓުތައް އޮޕަރޭޝަންގައި ބޭނުންކުރަން ފެށުމުން މަސް ގަތުމުގެ މަސައްކަތްތައް ހަލުއިވެ، މަސްވެރިންނަށްވެސް ގިނަ ފަސޭހަތަކެއް ލިބިގެންދާނެ ކަމަށެވެ.
މިފްކޯގެ ފްލީޓުގައި މިހާރުވެސް މިފަދަ ދެ ބޯޓު އޮވެއެވެ. އެއީ ޖަޒީރާ 102 އާއި މަހާ ކަލަމިންޖާއެވެ. ޖަޒީރާ 102 އަކީ 100 ޓަނުގެ މަސް ރައްކާކުރުމުގެ ޤާބިލްކަން ހުރި ބޯޓެކެވެ. އަދި މަހާ ކަލަމިންޖާއަކީ 90 ޓަނާއި ހަމައަށް މަސް ގަތުމުގެ ގާބިލްކަން ހުރި ބޯޓެކެވެ.
މިދުވަސްވަރަކީ ރާއްޖެއަށް މަސްވެރިކަން ރަނގަޅު ދުވަސްވަރެކެވެ. އެގޮތުން އަހަރުގެ މިހާތަނަށް މިހާ ހިސާބަށް އައިއިރު 12000 ޓަނުގެ މަސް މިފްކޯއަށް ގަނެފައިވާއިރު މަސްވެރިންނަށް ވަނީ 198 މިލިއަން ރުފިޔާ ދޫކޮށްފައެވެ.
މިފްކޯއިން ވަނީ މިދިޔަ އަހަރު މަސްވެރިންނަށް 1 ބިލިއަނަށްވުރެ ގިނަ ރުފިޔާ ދޫކޮށްފައެވެ. އެއީ މިފްކޯގެ 12 އަހަރުގެ ތާރީޚުގައިވެސް މަސްވެރިންނަށް އެންމެ ގިނަ ޢަދަދަކަށް ފައިސާ ދޫކުރި އަހަރެވެ.