ފެލިވަރު ތަރައްޤީކުރުމަށް ކުރިއަށްގެންދާ މަޝްރޫޢުގެ ދަށުން ފެލިވަރުގައި ޤާއިމްކުރާ 4000 ޓަނުގެ ކޯލްޑް ސްޓޯރޭޖް ކޮމްޕްލެކްސްގެ އަމަލީ މަސައްކަތް އަންނަމަހު ފެށުމަށް މަސައްކަތްކުރަމުންދާކަމަށް މިފްކޯގެ ސީއީއޯ އިސްމާއިލް ފައުޒީ ވިދާޅުވެއްޖެއެވެ.
ފެލިވަރު ތަރައްޤީކުރާ ކޯލްޑް ސްޓޯރޭޖަކީ މިހާތަނަށް ރާއްޖޭގައިވެސް ޤާއިމްކުރެވޭ އެންމެ ބޮޑު ކޯލްޑް ސްޓޯރޭޖްއެވެ.
ރާއްޖޭގެ މަސްވެރިކަމުގެ ސިނާޢަތް އެހެން ހަރުފަތަކަށް ގެންދިޔުމަށް ދިމާވެފައިވާ އެންމެ ބޮޑު ހުރަހަކީ ވަޞީލަތާއި ޖާގަ ނެތުމެވެ. މަސްވެރިކަން ރަނގަލުވާ ދުވަސްވަރު މަސްކިރުވުމުގައި ހުރި ކެޕޭސިޓީގެ ދަތިތައް ހައްލުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން، ފާހަގަކޮށްލެވޭ އެންމެ ބޮޑު އެއް މަޝްރޫއުއަކީ ފެލިވަރު ތަރައްޤީކުރުމުގެ މަޝްރޫއުއެވެ.
ފެލިވަރަކީ މިފްކޯއިން މަސް ޕްރޮސެސްކޮށް، ދަޅުމަހާއި އެހެނިހެން މަހުގެ ބާވަތްތައް ކުރިއަށްގެންދާ ފެސިލިޓީއެވެ. ޕީއެސްއެމް ނިއުސްއަށް ދެއްވި އިންޓަވިއުއެއްގައި މިފްކޯގެ ސީއީއޯ އިސްމާއިލް ފައުޒީ ވިދާޅުވީ ފެލިވަރުގައި މަހުގެ އޮޕަރޭޝަން ކުރިއަށްގެންދަން ބޮޑެތި ދަތިތަކެއް ހުރި ކަމަށެވެ.
" ފެލިވަރުގައި މިހާރުގެ ކެޕޭސިޓީ ހުރިގޮތުން، އޮޕަރޭޝަން ވަރަށް ދަތީގައި މިގެންދަނީ. ސްޓޯރޭޖްވެސް ވަރަށް ލިމިޓެޑް. ސްޓޯރޭޖްވެސް ވަރަށް ބައު ވެފައި. އަދި ވަރަށް ދުވަސްވީ، ވަރަށް އުނދަގޫކޮށް މެއިންޓެއިން ކުރަނީ. ލޭންޑް ބޭސްގައި ފްރީޒިންގ ކެޕޭސިޓީ ނުވެސް ނެތް ތަނެއް. އަޅުގަނޑުމެން ބޯޓެއް ބާއްވައިގެން މެނޭޖްކުރަނީ." ފައުޒީ ވިދާޅުވިއެވެ.
ފައުޒީ ވިދާޅުވީ ފެލިވަރު އަޕްގްރޭޑްކުރުމަށް ރާވަައިފައި ވަނީ މިހާރު ހުރި ކެޕޭސިޓީގެ ދަތިތައް ހައްލުކޮށް، މަސް ގަތުމުގެ އޮޕަރޭޝަން އެއް ތަނަކުން އެންމެ ފަހިކޮށް މަސްވެރިންނަށް ލިބޭނެ ތަނަކަށް ހެދުމަށްކަމަށެވެ. އެގޮތުން ފެލިވަރު އަޕްގްރޭޑިންގ މަޝްރޫޢު ކުރިއަށްގެންދަނީ ދެ ފިޔަވައްސަކަށް ބަހާލައިގެންކަމަށް ފައުޒީ ވިދާޅުވިއެވެ.
" ފެލިވަރުގެ އަޕްގްރޭޑިން މަސައްކަތް ކުރިއަށް ދަނީ ދެ ފިޔަވައްސަކަށް ބަހާލައިގެން. ފުރަތަމަ ފިޔަވަހީގައި މިހިމެނީ ކޯލްޑް ސްޓޯރާއި ބްރައިން ފްރީޒިންގ ޤާއިމްކުރުމުގެ މަސައްކަތް. ދެވަނަ ފިޔަވަހީގައި މިހެމެނެނީ ކޭނަރީގެ މަސައްކަތް. ފުރަތަމަ ފޔަވަހީގެ މަސައްކަތް ބަޔަކާއި ހަވާލުކޮށް މޮބިލައިޒް ކުރުމުގެ މަސައްކަތް މިހާރު އެދަނީ. ދެވަނަ ފިޔަވަހީގެ މަަސައްކަތް ހަވާލުކުރާނެ ބައެއް ފައިނަލް ކުރުމުގެ މަރުހަލާގައި އެދަނީ." ފައުޒީ ވިދާޅުވިއެވެ.
ފެލިވަރު ތަރައްޤީކުރުމުގެ މަޝްރޫޢުގެ ދަށުން ޤާއިމްކުރާ 4000 ޓަނުގެ ކޯލްޑް ސްޓޯރޭޖްގެ އިތުރުން ދުވާލަކު 200 ޓަނުގެ މަސް ފްރީޒްކުރެވޭ ބްރައިން ފްރީޒިންގ ފެސިލިޓީއެއް ޤާއިމްކުރުމުގެ މަސައްކަތާއި އަދިވެސް އެހެނިހެން ތަރައްޤީގެ މަސައްކަތްތައް ކުރިއަށްދާނެއެވެ.
އިންޑިއާގެ އެގްޒިމް ބޭންކުގެ ލޯނު ފައިނޭންސްގެ ދަށުން ކުރިއަށްގެންދާ 23 މިލިއަން ޑޮލަރު ނުވަތަ 353 މިލިއަން ރުފިޔާގެ މި މަޝްރޫޢު ހަވާލުކޮށްފައިވަނީ އިންޑިއާގެ ކުންފުންޏެއްކަމަށްވާ ރައިނެކް އިންޑިއާ ލިމިޓެޑާއެވެ.
މިފްކޯގެ ސީއީއޯ ފައުޒީ ވިދާޅުވީ ކޯލްޑް ސްޓޯރޭޖް ތަރައްޤީކުރުމުގެ މަސައްކަތަށް ބޭނުންވާ ސާމާނާއި މީހުން މޮބިލައިޒްކުރުމުގެ މަސައްކަތްކަމަށް ފައުޒީ ވިދާޅުވިއެވެ. އަދި މިމަސައްކަތުގެ އަމަލީ މަސައްކަތް އަންނަމަހު ފެށުމަށް މަސައްކަތް ކުރަމުންދާކަމަށްވެސް ފައުޒީ ވިދާޅުވިއެވެ.
ފެލިވަރު އަޕްގްރޭޑްކުރުމުގެ މަސައްކަތުގެ ދަށުން އެރަށުގެ ބަނދަރު ތަރައްޤީކުރުމުގެ މަސައްކަތްވެސް އަންނަނީ ކުރަމުންނެވެ. މިމަސައްކަތުގެ ދަށުން ފެލިވަރުގައި 3 ބަނދަރު ތަރައްޤީކުރުމުގެ މަސައްކަތް އެމްޓީސީސީން އަންނަނީ ކުރަމުންނެވެ. މީގެތެރޭގައި ރާއްޖެއިން ބޭރަށް މަސްބޭރު ކުރާ ޖެޓީއަކާއި، މަސްކިރާ ޖެޓީގެ އިތުރުން އެތެރޭގެ އުޅަނދުތަކަށް ބޭނުންކުރާ ލޯކަލް ޖެޓީއެއް ހިމެނެއެވެ. މިމަސައްކަތް އަންނަ އޭޕްރީލްމަހުގެ ނިޔަލަށް ނިންމާލާނެކަމަށް އެމް.ޓީ.ސީ.ސީން ވިދާޅުވެއެވެ.