ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯއިން އެކުންފުނީގެ މުވައްޒަފުންނަށް ޑޭ ކެއަރގެ ޚިދުމަތް ފަހިކޮށްދިނުމަށް ފައިސާ ހަމަޖައްސައިދޭ ޕްރޮގްރާމެއް އިފްތިތާހްކޮށްފިއެވެ.
"ލިޓްލް ވަންޑަރސް ޕްރޮގްރާމް"ގެ ނަމުގައި ކުރިއަށްގެންދާ މިޕްރޮގްރާމް އިފްތިތާޙްކޮށްދެއްވީ އެސްޓީއޯގެ މެނޭޖިންގ ޑިރެކްޓަރ ހުސައިން އަމުރުއާއި، ޖެނެރަލް މެނޭޖަރ އޮފް ޕީޕަލްސް އޮޕޮރޭޝަންސް މަރިޔަމް ނުޒުލާއެވެ.
"ލިޓްލް ވަންޑަރސް ޕްރޮގްރާމް" އަކީ އެސްޓީއޯގެ މުވައްޒަފުންނަށް އިޖުތިމާއީ ދިރިއުޅުމުގައި، އަދި މަސައްކަތުގެ މާހައުލުގައި އެހީތެރިކަން ފޯރުކޮށްދިނުމުގެ ގޮތުން ފަށާފައިވާ ޕްރޮގްރާމެކެވެ.
އެސްޓީއޯއިން ވިދާޅުވީ މި ޕްރޮގްރާމްގެ އެންމެ ބޮޑު އެއް އަމާޒަކީ މުވައްޒަފުންގެ މަސައްކަތާއި ދިރިއުޅުމުގެ ކަންކަން ފަސޭހަކަމާއެކު ކުރެވޭނެ ގޮތް ފަހިކޮށްދީ، ދުޅަހެޔޮ ވައްޓަފާޅިއެއް ބިނާކުރުމަށް އެހީތެރިވެދިނުމެވެ.
މި ޕްރޮގްރާމްގައި އެސްޓީއޯގެ ކޮންމެ މުވައްޒަފަކަށްވެސް ބައިވެރިވެވޭނެއެވެ. މި ޕްރޮގްރާމްގެ ދަށުން އެސްޓީއޯއިން 8 އަހަރުން ދަށުގެ ކޮންމެ ކުއްޖަކަށް، ރަޖިސްޓްރީކޮށްފައިވާ ޑޭކެއަރ ފެސިލިޓީއެއްގައި ބައިވެރިވުމަށް ކޮންމެ މަހަކު 2500ރ އާއި ހަމައަށް އެހީތެރިވެދޭނެއެވެ.
މިޕްރޮގްރާމްގެ ދަށުން އެކުންފުނީގެ މުވައްޒަފަކު ބޭނުންވާ، އަދި އިތުބާރު ކުރެވޭ ފެސިލިޓީއެއްގައި އެސްޓީއޯ މެދުވެރިކޮށް ރެޖިސްޓްރީވުމުގެ އިޚްތިޔާރު އޮންނާނެކަމަށް އެސްޓީއޯއިން ވިދާޅުވެއެވެ. އެއީ މުވައްޒަފުންނަށް މި ޕްރޮގްރާމްގައި ބައިވެރިވުމުގެ ފުރުސަތު ވީހާވެސް ފުޅާކޮށް ބާރުއެޅުމަށްކަމަށް އެސްޓީއޯއިން ވިދާޅުވެއެވެ.
ވަޒީފާ އަދާކުރުމުގެ ފަހި ފުރުސަތު ކަށަވަރުކުރުމަށް ސަރުކާރުން ހިއްސާވާ ކުންފުނިތަކުންވެސް އޮފީސް މާޙައުލުގައި ދަރިން ބެލެހެއްޓޭނެ އިންތިޒާމުތައް ހަމަޖެއްސުމުގެ މަސައްކަތް އަންނަނީ ކުރަމުންނެވެ. އެގޮތުން މިޙިދުމަތް އެންމެ ފުރަތަމަ ފަށާފައިވަނީ ސެޓްލްކޯއިންނެވެ.
ސްޓެލްކޯގެ އިތުރުން އެމްޕީއެލްއިންވެސް ވަނީ ޑޭ ކެއަރގެ ޚިދުމަތްދޭން ފަށާފައިވެއެވެ. މީގެއިތުރުން އެޗްޑީސީން ހުޅުމާލޭގައި 3000 އަކަފޫޓުގެ 6 ފަންގިފިލާއަށް ޑޭކެއާއެއް ތަރައްޤީކުރުމުގެ މަސައްކަތް އަންނަނީ ކުރަމުންނެވެ.
މި ޑޭކެއަރ ތަރައްޤީކުރަނީ އެންމެ ޒަމާނީ ވަސީލަތްތަކާއެކު، ޚާއްސަ އެހީއަށް ބޭނުންވާ މީހުންނަށްވެސް ބޭނުން ކުރެވޭ ގޮތަށެވެ.