ޗެކްރިޕަބްލިކްގައި ޕައިލެޓްކަން ކިޔަވާ ދަރިވަރުންގެ ލޯނުގެ ތެރޭގައި މެޑިކަލްއާއި ވިސާ ފީ ހިމަނަނީ

ލޯނު އެހީގެ ދަށުން ޗެކްރިޕަބްލިކްގެ ފްލައިން އެކަޑަމީގައި ޕައިލެޓް ލައިސަންސް ފުރިހަމަކުރަމުންދާ ދަރިވަރުންގެ ފީ ސްޓްރަކްޗަރގައި، މެޑިކަލް އަދި ވިސާގެ ޚަރަދު ލިބޭގޮތަށް ހަޔަރ އެޑިއުކޭޝަން މިނިސްޓްރީން ހަމަޖައްސައިދީފިއެވެ.

މަތީ ތަޢުލީމާއި ތަމްރީނަށް ދޭ ލޯނު އެހީގެ ދަށުން ޗެކްރިޕަބްލިކްގެ ފްލައިން އެކަޑަމީގައި ޕައިލެޓް ލައިސަންސް ފުރިހަމަކުރަމުންދާ ދަރިވަރުން ކޯހަށް އެންރޯލްވީއިރު އެކަޑަމީން ދޫކޮށްފައިވާ ފީ ސްޓްރަކްޗަރގައި މެޑިކަލް އަދި ވިސާއަށްދާ ޚަރަދު ހިމަނާފައިނުވެއެވެ.

މިކަމާއި ގުޅިގެން ހަޔަރ އެޑިއުކޭޝަން މިނިސްޓްރީން މިހާރު ވަނީ ދަރިވަރުންނަށް ދޫކޮށްފައިވާ ލޯނަށް އެ ޚަރަދު އިތުރުކުރުމަށްފަހު ލޯނުގެ އެގްރިމަންޓް އިސްލާހު ކުރުމަށް ވަނީ ނިންމާފައެވެ.

މި ގެންނަ ބަދަލާއެކު މިނިސްޓްރީން ކަނޑައަޅާ ރޭޓާކުން، މެޑިކަލް އަދި ވިސާ ފީ ދޫކުރާނެއެވެ.

މިޚަރަދު ދިނުމަށް ހަމަޖެހިފައިވަނީ 1 ޖެނުއަރީ 2022 ގެ ފަހުން ކޯސް ނިމިފައިވާ އަދި ކޯސް ނިންމުމަށް ހަމަޖެހިފައިވާ ދަރިވަރުންނަށެވެ. މެޑިކަލް އަދި ވިސާ ޚަރަދަށް އެދި ފޯމު ހުށަހަޅާނީ myedu.egov.mv ޕޯޓަލް މެދުވެރިކޮށެވެ.