މި ސަރުކާރުން މަސައްކަތްކުރާ ވަކި އުސޫލުތަކެއް ވައްޓަފާޅިއެއް އޮންނަކަމަށާއި، ކުރާ ކޮންމެ މަސައްކަތަކާއި ހިންގާ ކޮންމެ މަޝްރޫޢެއް ހިންގާނީ އެ އުސޫލުންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، މިސަރުކާރުން ރާއްޖޭގެ ތަރައްްޤީއަށް ހިންގާ ދެވަނަ އެންމެ ބިޔަ މަޝްރޫޢުކަމަށްވާ ހަނިމާދޫ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ހަނިމާދޫ އެއަރޕޯޓް މަޝްރޫޫއަށް އިޝާރާތްކުރައްވާ ވާހަކަފުޅު ފަށްޓަވަމުން ރައީސް ވިދާޅުވީ، މިއީ ބޮޑުއުތުރާ، މުޅި ބޮޑުތިލަދުން މައްޗަށް ތާރީޚުގައިވެސް އަންނަ، އެންމެ ބޮޑު ބަދަލުކަމަށެވެ. މި މަޝްރޫޢުއާއެކު ހަނިމާދޫއާއި، ބޮޑު ތިލަދުންމަތީގެ ރައްޔިތުން ދެކެމުން އައި ހުވަފެނުގައި ކުލަޖެހެނޭކަމަށްވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ އެމަނިކުފާނުގެ ސަރުކާރުން މަސައްކަތްކުރާ ވަކި އުސޫލުތަކަކާއި، ވައްޓަފާޅިއެއް އޮންނަކަމަށެވެ. އަދި ކުރާ ކޮންމެ މަސައްކަތަކާއި، ހިންގާ ކޮންމެ މަޝްރޫޢެއް ހިންގަވަނީ އެ އުސޫލުގެ ދަށުންކަމަށް އެމަނިކުފާނު ވިދާޅުވިއެވެ.
ރައީސްގެ ވާހަކަފުޅުގައި މުޅިރާއްޖެއަށް ގެންނަ ތަރައްގީގެ ބަދަލު މިސަރުކާރުން އެންމެ ފުރަތަމަ ފަށަނީ ގަލަމު ތުނޑުން ރަނގަޅަށް ދިރާސާ ކުރައްވައި، ހިސާބު ކިތާބުން ނަތީޖާ ހޯދުމަށްކަމަށް ވިދާޅުވިއެވެ. އަދި އެނަތީޖާގެ މައްޗަށް ފުރިހަމަ ޕްލޭނެއް ހެދުމަށްފަހުކަމަށްވެސް ރައީސް ވިދާޅުވިއެވެ.
"އެގޮތަށް އެކަން ނުކުރެވިއްޖެނަމަ، މިޒަމާނުގާ އެއީ، ނުވާކަމެއް ފަދަ ކަމެއް. އެގޮތަށް އެކަން ނުކޮށްފިނަމަ، އެއީ ހަމަ ކަނޑުގައި އެޅި ރޮނގެއް. އެއާ އިދިކޮޅަށް ކަންކުރީމާ ދެންވަނީ މާދެރަގޮތެއް. ވިސްނުމާ ފިކުރާ ޙިކުމަތާ ކެތްތެރިކަމާ ނުލާ، ދެމެހެއްޓެނިވި ތަރައްގީއެއް ނުލިބޭނެ. ހަނިމާދޫ ބައިނަލް އަގްވާމީ އެއާޕޯޓު ގެ މަސައްކަތް މިއަދު މިފެށީ އަޅުގަނޑުމެންގެ ގޮތަށް. ހުއްޓިއޮވެ، ފަހަތަށް ގޮސް، ގެއްލި ހުސްނުވާ ގޮތަށް. މިފެށިގޮތަށް ފެށީމާ މާތްﷲ ގެ އިރާދަޔާއިއެކު ދެން މިކަމެއް ނުހުއްޓޭނެ. ފަހަތަކަށްވެސް ނުދާނެ" ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.
ސިޔާސީ ގޮތުން ސަރުކާރަށް ފާޑުވިދާޅުވާ ފަރާތްތަކަށް އިޝާރާތްކުރައްވާ ރައީސް ވިދާޅުވީ، ރައްޔިތުންނާއި ގައުމެއްގެ ކަންކަން ހަމަމަގުން ހިންގޭނީ، ވަކި ހަމަތަކަކުންކަން ވަރަށްގިނަ އަމިއްލަ އިހްސާސާ، ދޭދޭ ޖަޒްބާތު އެއްފަރާތް ކޮށްގެންކަމަށެވެ.
"ކެހި ކަނޑުލުގެ ހިތި ފިލުވޭނެ ކެތްތެރިކަމާ ވިސްނުން ނެތި، ކަނޑޫ ކަހައިފިނަމަ، އެހިތި އެންމެންގެ އަރުގާ ލާނެ. ކުރިއަށްދާން ޖެހޭ ސީދާ މަގުން ކައްސާލާ، މަގުމަތިވާނެ. ވިސްނުމެއް ރޭވުމެއް ނެތިއްޖެނަމަ، ރޭވެއަލި ވިލޭއިރު އެންމެން އެކީ އެއްފަހަރާ ބިކަވާނެ. ކޮންމެ ކަމަކަށް ވެސް ދެމެހެއްޓެނިވި ވިސްނުމަކާ، ފެންހިފޭ ޕްލޭނެއް އޮންނަންވާނެ." ރައީސް ވިދާޅުވިއެވެ.
ރައީސް ވިދާޅުވީ، ބޮޑު އުތުރާ، ބޮޑުތިލަދުންމަތި އަދި މުޅިރާއްޖޭގެ ތަރައްގީއަށް ސަރުކާރުގެ ތަޞައްވުރުގެ ތެރެއިން، ވަރަށް ގިނަ މަޝްރޫއުތަކެއް ކުރިއަށްދާކަމަށެވެ. އަދި އޭގެ ގިނަ ކަންކަން ފެށި، އެދަނީ ނިމެނުން އަންނަކަމަށްވެސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.