ރާއްޖެއަށް އެހީތެރިވެދިނުމުގެ ގޮތުން ވަރލްޑް ބޭންކުން ކުރިއަށް އޮތް ފަސް އަހަރަށް އެކުލަވާލާފައިވާ ކަންޓްރީ ޕާޓްނަރޝިޕް ފްރޭމްވޯކް، ސީޕީއެފްއާ ބެހޭ ގޮތުން ވޯލްޑް ބޭންކްގެ އެގްޒެކެޓިވް ޑިރެކްޓަރުންގެ ބޯޑުން މަޝްވަރާކުރައްވައިފިއެވެ.
ކަންޓްރީ ޕާޓްނަރޝިޕް ފްރޭމްވޯކް 2023-2027 އަކީ ދެމެހެއްޓެނިވި، ކާރިސާތަކަށް ތައްޔާރުވެފައިވާ އަދި އެންމެންގެ ބައިވެރިވުން އޮންނަ މުސްތަޤްބަލެއް ޤާއިމްކުރުމުގައި ރާއްޖެއަށް އެހީތެރިވެދިނުމަށް ވަރލްޑް ބޭންކުން އަލަށް އެކުލަވާލި ސިޔާސަތެކެވެ.
މިސިޔާސަތު އެކުލަވާލައިފައިވަނީ 5 އަހަރުގެ މުއްދަތަކަށެވެ. މިސިޔާސަތުގައި ވޯލްޑް ބޭންކާއި އެބޭންކްގެ މެމްބަރު ޖަމިއްޔާތަކުގެ ތެރެއިން، ތަރައްޤީވަމުން އަންނަ ޤައުމުތަކުގެ އަމިއްލަ ވިޔަފާރިތަކަށް ޚާއްސަކޮށް މަސައްކަތްކުރާ އިންޓަނޭޝަނަލް ފައިނޭންސް ކޯޕަރޭޝަން، އައިއެފްސީ އާއި، ސިޔާސީ ކަންކަމާއި ގުޅޭ އިންޝުއަރެންސާއި ފައިސާ ހޯދަން ފަހިވާނެ ފަދަ ގެރެންޓީ ދޭ މަލްޓިލޭޓަރަލް އިންވެސްޓްމަންޓް ގެރެންޓީ އެޖެންސީ، މީގާއިން ރާއްޖެއާއެކު މަސައްކަތް ކުރާނެ މައިގަނޑު ދާއިރާތައް ކަނޑައަޅާފައިވެއެވެ.
އައު ކަންޓްރީ ޕާޓްނަރޝިޕް ފްރޭމްވޯކްގެ އަމާޒަކީ މައިގަނޑު ތިން މަޤްސަދެއް ހާސިލްކުރުމެވެ. އެއީ، އިގްތިސާދީ ފުރުސަތުތައް އިތުރުކުރުމާއި އިންސާނީ ވަސީލަތްތަކުގެ ނަތީޖާ ރަނގަޅުކުރުމާއި، ކުރިމަތިވާ ކުއްލި ހާލަތްތަކާއި ކާރިސާތަކަށް ތައްޔާރުވެފައިވާ މިންވަރު އިތުރުކުރުމެވެ.
ސީޕީއެފްގެ މަޤްސަދު ހާސިލުކުރުމަށް އަހައްމިއްޔަތުކަން ދޭ ދާއިރާތައް:
* ތައުލީމާއި ސިއްޙީ ނިޒާމުގެ ފެންވަރު ހަރުދަނާކުރުން
* މުޖުތަމަޢުގައި ތިބި އެހީތެރިކަން ބޭނުންވާ ފަރާތްތަކަށް ދެވޭ އެހީތެރިކަން އިތުރުކުރުން
* މާލީ ދާއިރާގެ ކަންކަން ހަރުދަނާކޮށް، ދެފުށް ފެންނަކަން ކަށަވަރުކުރުން
* މުރަކައިގެ ފަރުތައް ފަދަ ގުދުރަތީ މުއްސަނދިކަން ހިމާޔަތްކޮށް، މޫސުމަށް އަންނަ ބަދަލުތަކުގެ ނުރައްކާތައް ކުޑަކުރުން
* ގުދުރަތީ ވަސީލަތްތައް ބޭނުންކޮށްގެން އިޤްތިޞާދީ ކުރިއެރުން އިތުރުކުރުން
* ޚިދުމަތްތައް ފޯރުކޮށްދިނުން ހަރުދަނާކުރު
* ދިވެހި ރައްޔިތުންނަށް ޚާއްސަކޮށް އަންހެނުންނާއި ޒުވާނުންނަށް އާ ފުރުސަތުތައް ފަހިކޮށްދިނުން
ސީޕީއެފް ތައްޔާރުކޮށްފައިވަނީ "ސިސްޓަމެޓިކް ކަންޓްރީ ޑައިގްނޯސްޓިކް އަޕްޑޭޓެ"އްގެ ޒަރިއްޔާއިން ރާއްޖޭގެ ތަރައްޤީއަށް ހުރި ގޮންޖެހުންތަކާއި ފުރުސަތުތައް ފުޅާ ދާއިރާއެއްގައި ދިރާސާކޮށް، ކުރީގެ ސީޕީއެފް ތަންފީޒުކުރުމުގެ ތެރޭގައި ލިބުނު ފިލާވަޅުތަކުގެ މައްޗަށް ބިނާކޮށް، ކަމާބެހޭ ފަރާތްތަކާއި މަދަނީ ޖަމިއްޔާތަކާއި އަމިއްލަ ފަރާތްތަކާއި އިލްމީ ބޭފުޅުންނާއި ބައިނަލްއަޤްވާމީ ބައިވެރިންނާ އެކު ފުޅާ ދާއިރާއެއްގައި މަޝްވަރާ ކުރުމަށްފަހުއެވެ.
މިމަޝްވަރާތަކުގައި ވޯލްޑް ބޭންކުން ރާއްޖެ އާއި ނޭޕާލް އާއި ސްރީލަންކާއަށް ކަނޑައަޅުއްވާފައި ހުންނަވާ ކަންޓްރީ ޑިރެކްޓަރު ފާރިސް ހަދާދު ޒަރްވޯސް ވިދާޅުވީ މި ޕާޓްނަރޝިޕްގެ ސަބަބުން، ރާއްޖޭގެ ތަރައްޤީގެ ލަނޑުދަނޑިތައް ހާސިލުކޮށް، ދެމެހެއްޓެނިވި، ކާރިސާތަކަށް ތައްޔާރުވެފައިވާ އަދި އެންމެންގެ ބައިވެރިވުން އޮންނަ މުސްތަޤްބަލެއް ދިވެހިންނަށް ހޯދާދިނުމަށް އެހީތެރިކަން ފޯރުކޮށްދެވޭނެކަމަށެވެ.
ވޯލްޑް ބޭންކުން ރާއްޖޭގައި މިހާރު ކުރިއަށްގެންދާ ޕްރޮގްރާމުގައި އިންޓަރނޭޝަނަލް ޑިވެލޮޕްމަންޓް އެސޯސިއޭޝަން، އައިޑީއޭގެ އެހީގެ ދަށުން ހިންގާ 9 ޕްރޮޖެކްޓަކާއި އައިޑީއޭގެ 1 ގެރެންޓީ ހިމެނެއެވެ. މިމަޝްރޫއުތަކަށް ކަނޑައަޅާފައިވާ ފައިސާގެ އަދަދު 178 މިލިއަން ޑޮލަރަށް އަރައެވެ.
މިމަޝްރޫއުތައް ހިންގާ ދާއިރާތަކަކީ އިއާދަކުރަނިވި ހަކަތަ، ޒުވާނުންނަށް ވަޒީފާ ހޯދަން ބޭނުންވާ ހުނަރުތައް، ޑިޖިޓަލް ޓެކްނޮލޮޖީ، އުމްރާނީ ތަރައްޤީ، ކުނި މެނޭޖުކުރުން، ކޯވިޑް-19އާ ދެކޮޅަށް މަސައްކަތްކުރުން، ސިއްޙީ އަދި ތައުލީމީ ދާއިރާ، އަދި އިޖުތިމާއީ ރައްކާތެރިކަމެވެ. އަދި އިޤްތިޞާދީ ހާލަތު ދެނެގަތުމާއި މާލީ ދާއިރާ އާއި އިޖުތިމާޢީ ރައްކާތެރިކަން އަދި ފަގީރުކަން ނައްތާލުން ފަދަ ދާއިރާތަކުން ފަންނީ އެހީތެރިކަންވެސް ވޯލްޑް ބޭންކުން ދަނީ ފޯރުކޮށްދެމުންނެވެ.
އަމިއްލަ ވިޔަފާރިތައް ތަރައްޤީކުރުމަށް އިސްކަންދޭ ވޯލްޑް ބޭންކް ގްރޫޕުގެ ބައެއް ކަމަށްވާ އިންޓަނޭޝަނަލް ފައިނޭންސް ކޯޕަރޭޝަން، އައިއެފްސީގެ މެމްބަރަކަށް ރާއްޖެވީ 1983 ވަނަ އަހަރުއެވެ. އޭގެ ފަހުން ފާއިތުވެދިޔަ އަހަރުތަކުގައި އައިއެފްސީން ވަނީ، އެހެން ފަރާތްތަކުން ފައިސާ ހޯދައިދިނުން ހިމެނޭ ގޮތަށް 200 މިލިއަނަށްވުރެ ގިނަ ޑޮލަރު އިންވެސްޓްކޮށްފައެވެ.
ފާއިތުވި ދެ އަހަރުގެ ތެރޭގައި އައިއެފްސީން ވަނީ މާލީ އަދި ޑިޖިޓަލް ވަސީލަތްތަކަށް ބޮޑެތި އިންވެސްޓްމަންޓްތަކެއްކޮށް، އިޤްތިޞާދީ ބަދަލުތަކަށް އެހީތެރިވެދީ، ކާރިސާތަކަށް ތައްޔާރުވެފައިވާ މިންވަރު އިތުރުކުރުން ހިމެނޭ ގޮތަށް ރާއްޖޭގައި ކުރާ މަސައްކަތްތައް ފުޅާކޮށްފައެވެ.