ބޭންކް އޮފް މޯލްޑިވްސް، ބީއެމްއެލް އުފެއްދުމުގައި އިސްދައުރެއް އަދާކުރެއްވި ފަރާތްތަކުގެ އަގު ވަޒަންކޮށް އެވޯޑެއް ދެއްވައިފިއެވެ.
މިއެވޯޑް އެފަރާތްތަކާއި ހަވާލުކޮށްދެއްވީ ބޭންކުގެ 40 ވަނަ އަހަރީ ދުވަސް ފާހަގަ ކުރުމަށް ބޭއްވި ހަފްލާގައި ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙްއެވެ.
ބީއެމްއެލްއަށް 40 އަހަރު ފުރުމާއި ގުޅިގެން ބޭޢްވި ޚާއްސަ ހަފްލާގައި، މީގެ 40 އަހަރު ކުރިން އެބޭންކު އުފެއްދުމުގައި އެންމެ އިސްދައުރެއް އަދާކުރެއްވި ދެ ފަރާތްކަމަށްވާ، އޭރުގެ ރައީސުލްޖުމްހޫރިއްޔާ މައުމޫން އަބްދުލްޤައްޔޫމް އާއި އަލްމަރްޙޫމް އިސްމާޢިލް ފަތުޙީއަށް އެބޭންކު އުފެއްދުމުގެ މޭސްތިރިކަމުގެ ޝަރަފުވެރި އެވޯޑްވަނީ ދެއްވާފައެވެ.
ބޭންކު އޮފް މޯލްޑިވްސް ނުވަތަ ދިވެހިންގެ ބޭންކު ހުޅުވީ 1982 ވަނަ އަހަރުގެ ނޮވެމްބަރުމަހުގެ 11 ވަނަ ދުވަހުއެވެ. ބޮޑުތަކުރުފާނު މަގުގައި، މިހާރުގެ ބީއެމްއެލްގެ ހެޑް އޮފީސް ހުރި ތަނުގައި ދެ ބުރިއަށް ހަދާފައިވާ އިމާރާތުގައި ބެންކް އޮފް މޯލްޑިވްސް ހުޅުވައިދެއްވީ އޭރުގެ ރައީސުލްޖުމްހޫރިއްޔާ މައުމޫން އަބްދުލްޤައްޔޫމް އާއި އަލްމަރްޙޫމް އިސްމާޢިލް ފަތުޙީއެވެ.
ދިވެހި ސަރުކާރުގެ 60 އިންސައްތަ ހިއްސާ ހިމެނޭހެން ބަންގްލަދޭޝްގެ އިންޓަރނޭޝަނަލް ފައިނޭންސް އިންވެސްޓްމަންޓް ކޮންޕެނީއާއެކު މިބޭންކު، އޭރުގެ ރައީސުލްޖުމްހޫރިއްޔާ މައުމޫން އަބްދުލްޤައްޔޫމް ހުޅުއްވާދެއްވީ ބަންގްލަދޭޝްއާއިއެކު 3 އަހަރު ދުވަހު މަޝްވަރާކުރެއްވުމަށްފަހުއެވެ.
އޭރުގެ ރައީސުލްޖުމްހޫރިއްޔާގެ މަޤާމުގައި ހުންނަވައިގެން މައުމޫން އަބްދުލްޤައްޔޫމް ވަނީ ދިވެހި ބޭންކުގެ ޚިދުމަތް ފުޅާކުރުމަށް ގިނަ މަސައްކަތްތަކެއް ކުރައްވާފައެވެ. އެގޮތުން، ބީއެމްއެލް އުފެއްދިތާ 10 އަހަރު ފަހުން ސަރުކާރުން ވަނީ 1992 ވަނަ އަހަރު ބީއެމްއެލްގައި އޮތް ބޭރުގެ ހިއްސާ ގަނެ، އާއްމުންނަށް ހިއްސާ ވިއްކަން ފަށާފައެވެ. މިއަދު ދިވެހިންގެ ބޭންކުގެ 2.62 އިންސައްތަ ހިއްސާއަކީ ދިވެހި ސަރުކާރުގެ ހިއްސާއެވެ. 1.4 އިންސައްތައަކީ ސަރުކާރު ކުންފުނިތަކުގެ ހިއްސާއަށްވާއިރު 7.33 އިންސައްތައަކީ އާއްމުންގެ ހިއްސާއެވެ.
ދިވެހި ބޭންކެއް އުފެއްދުމަށް އޭރުގެ ރައީސުލްޖުމްހޫރިއްޔާ މައުމޫން އަބްދުލް ޤައްޔޫމް ކުރެއްވި މަސައްކަތްތައް ކާމިޔާބުކުރުމަށް އަލްމަރްޙޫމް އިސްމާޢިލް ފަތުޙީ ވަނީ ވަރަށް ގިނަ މަސައްކަތްތަކެއް ކުރައްވާފައެވެ. އެގޮތުން، އޭރުގެ ޑިރެކްޓަރ އޮފް ފިނޭންސްގެ މަޤާމުގައި ހުންނަވައިގެން، ދިވެހި ބޭންކު އުފެއްދުމަށް، ބަންގްލަދޭޝް ސަރުކާރާއިއެކު މަޝްވަރާތައް ކުރެއްވުމުގައި އެންމެ އިސްދައުރެއް އަދާކުރެއްވީ އަލްމަރްޙޫމް އިސްމާޢިލް ފަތުޙީއެވެ
މި މަޝްރަވާރަތަކަށްފަހު ބޭންކު ހުޅުވިގެން އައުމާއިއެކު، ބީއެމްއެލްގައި ސަރުކާރުގެ އޮފީސްތަކުގެ އެކައުންޓްތައް އޮޕަރޭޓްކޮށް، ހިސާބުތައް ބަލަހައްޓާނެ އިންތިޒާމްކުރެއްވީވެސް އަލްމަރްޙޫމް އިސްމާޢިލް ފަތުޙީއެވެ.
ބީއެމްއެލްއަށް 40 އަހަރު ފުރުން ފާހަގަކުރުމަށް ބޭއްވި ހަފްލާގައި ވަނީ އެބޭންކަށް 40 އަހަރުގެ ދިގު މުއްދަތަކަށް ޚިދުމަތްކުރައްވާފައިވާ އަދި މިހާރުވެސް ޚިދުމަތް ކުރައްވަމުން ގެންދަވާ ޢާއިޝަތު ނޫރައްދީން އާއި، ފާތިމަތު މަނިކެ އާއި މޫސާ މުޙައްމަދުގެ އަގުވަޒަންކޮށް އެވޯޑް ދީފައެވެ. މިއެވޯޑްތައްވެސް އެފަރާތްތަކަށް ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވަނީ ބީއެމްއެލްއަކީ ދިވެހިން ހޯދާފައިވާ ކުރިއެރުމާއި ތަރައްޤީގައި މުހިއްމު ދައުރެއް އަދާކޮށްފައިވާ ކުންފުންޏެއްކަން ފާހަގަކުރައްވާފައެވެ. އަދި ރާއްޖޭގެ އިޤްތިޞާދުގެ މައި ދެ ތަނބު ކަމުގައިވާ މަސްވެރިކަމާއި ފަތުރުވެރިކަމުގެ ދާއިރާ ކުރިއަރާ ދިއުމުގައި ބީއެމްއެލްގެ ދައުރު ބޮޑުކަމަށްވެސް އެމަނިކުފާނު ވަނީ ވިދާޅުވެފައެވެ.