ރޯޑް ޑިވެލޮޕްމަންޓް ކޯޕަރޭޝަން އާރްޑީސީގެ ކުރު މުއްދަތުގައި، ކުންފުނިން ކުރަމުންދާ މަސައްކަތް މަދު ނޫން ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ. ނައިބު ރައީސް މިހެން ވިދާޅުވީ އާރްޑީސީގެ 3 ވަނަ އަހަރީ ދުވަސް ފާހަގަކުރުމަށް ބޭއްވި ހަފްލާގައި ވާހަކަފުޅު ދައްކަވަމުންނެވެ.
އާރްޑީސީގެ 3ވަނަ އަހަރީ ދުވަސް ފާހަގަކޮށް، މުވައްޒަފުންގެ އަގު ވަޒަންކުރުމަށް ބޭއްވި ރަސްމިއްޔާތުގައި ވަނީ ކުންފުންޏަށް އަގުހުރި މަސައްކަތްތައް ކޮށްދެމުންދާ މުވައްޒަފުންގެ އަގު ވަޒަންކޮށް ހަނދާނީ ފިލާ ދީފައެވެ. މިފިލާ ހަވާލުކޮށްދެއްވީ ނައިބު ރައީސް ފައިސަލް ނަސީމް އާއި ކުންފުނީގެ ބޯޑުގެ ޗެއަރމަން އަބްދުﷲ އަފީފްއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ފައިސަލް ނަސީމް ވިދާޅުވީ، މުވައްޒަފުންގެ އަގު ވަޒަންކުރުމަކީ ކުންފުނި ކުރިއަރައިގެން ދިއުމުގެ އެންމެ މުހިންމު އަސާސްކަމަށެވެ.
އާރްޑީސީއަކީ ސަރުކާރުގެ ސިޔާސަތަށް ވާސިލްވުމަށް ގިނަ މަސައްކަތްތަކެއް ކުރާ ކުންފުންޏެއް ކަމަށް ނައިބު ރައީސް ވިދާޅުވިއެވެ. އެގޮތުން ގިނަ ރަށްތަކެއްގެ މަގުހެދުމުގެ މަސައްކަތްތައް ހިންގަމުން އަންނައިރު، މާލޭގެ އަމީނީ މަގު ހެދުމުގެ ބޮޑު ޒިންމާވެސް ނަންގަވާފައިވަނީ އާރްޑީސީ ކަމަށެވެ. ނައިބު ރައީސްވަނީ އަމީނީ މަގުގެ މަސައްކަތް އަވަސްކުރުމުގައި މުޅި ކުންފުނި އެކުގައި މިގޮތުގައި މަސައްކަތްކޮށް، މަޝްރޫޢު އަވަސްކުރުމަށް އެދިލައްވާފައެވެ. ނައިބު ރައީސް ވިދާޅުވީ، މި މަޝްރޫޢު ލަސްވާން މެދުވެރިވި އެންމެ ބޮޑު ސަބަބަކީ، އެއްބަސްވުންތައް ހެދުމުގައި ދިމާވި ކަންތައްތައްކަމަށެވެ.
މި ޕްރޮޖެކްޓްގެ ބުރަކަމާއި، ކުރަންހުރި މަސައްކަތްތަކަކީ ދަތި އުނދަގޫ މަސައްކަތަކެއްކަން ޤަބޫލުކުރައްވާ ކަމަށް އެމަނިކުފާނު ވިދާޅުވިއެވެ. ޚާއްސަކޮށް މާލޭގެ މަގުތަކުގެ އަޑީގައި ހުރި، އެކިއެކި ކުންފުނިތަކުގެ ވިއުގަތަކަށް ގެއްލުމެއް ނުދީ މަސައްކަތް ކުރިއަށްގެންދިއުމަށް ދޭ އިސްކަން ނައިބު ރައީސް ފާހަގަކުރެެއްވިއެވެ.
"އާރްޑީސީއަކީ މަސައްކަތަކަށް ދެންނެވުމުން، އިތުރަށް ހަނދާންކޮށްދޭން ނުޖެހި އެ މަސައްކަތެއް އަވަހަށް ނިންމާ ކުންފުންޏެއް. ކުންފުނީގެ ކުރު މާޒީގައި ކުރެވުނު މަސައްކަތެއް މަދެއް ނޫން." ނައިބު ރައީސް ވިދާޅުވިއެވެ.
ނައިބު ރައީސްވަނީ ސަރުކާރު ޙިއްސާވާ ކުންފުނިތައް ގުޅިގެން، ރާއްޖޭގެ ކުރިއެރުމަށް ކުރަމުންދާ ބޮޑެތި މުހިންމު މަސައްކަތްތައް ފާހަގަކުރައްވާފައެވެ. އެގޮތުން މަގުހެދުމާއި، އުމްރާނީ ތަރައްޤީގެ މަޝްރޫޢުތަކާއި، އަދި ދަތުރުފަތުރުގެ ނިޒާމަށް ގެންނަމުންދާ އިންގިލާބީ ބަދަލުތަކުގެމައްޗަށް އަލިއަޅުއްވާލެއްވިއެވެ.
އަދި ރާއްޖޭގެ ވަޒީފާގެ ބާޒާރަށް ދިވެން ނެރުމަށް ކުންފުނިތައް ގުޅިގެން ހިންގަމުން އަންނަ އެކިއެކި ޕްރޮގްރާމްތަކަކީ، ޤައުމުގެ އިޤްތިޞާދަށް އޭގެ މަންފާ ވަރަށް ބޮޑަށް ކުރަމުން އަންނަ ކަމެއްކަމުގައި ވިދާޅުވިއެވެ.