ތިލަމާލެ ބްރިޖްގެ މަސައްކަތް ކުރަމުންދަނިކޮށް މޫދަށް ވެއްޓުނު ކެރޭނު މިހާރު ނަގާފައިވާ ކަމަށް ޕްލޭނިން މިނިސްޓްރީިން ވިދާޅުވެއްޖެއެވެ.
ޕްލޭނިން މިނިސްޓްރީން ވިދާޅުވީ ވެއްޓިފައިވަނީ ޖެކްއަޕް ޕްލެޓްފޯމް މަތީގައި ބަހައްޓާފައިވާ މޯބައިލް ކެރޭނެއްގެ ބައެއްކަމަށެވެ. ކެރޭން ވެއްޓުނީ ބްރިޖް ޕައިލިންގް މަސައްކަތް ފެށުމަށް ބޭނުންވާ ބައެއް މެޓީރިއަލް އުފުލަނިކޮށް، ކެރޭންގެ ބޫމް ފެއިލްވެގެންކަމަށެވެ.
ޙާދިސާ ހިނގީ ވިލިމާލޭގެ ކައިރީގައި މަސައްކަތް ކުރަމުންދިޔަ ޖެކްއަޕް ޕްލެޓްފޯމްގައެވެ.
މި ހާދިސާގައި އެއްވެސް މީހަކަށް އަދި އިތުރު އިކުއިޕްމަންޓަކަށް ގެއްލުންވެފައި ނުވާކަމަށް މިނިސްޓްރީން ވިދާޅުވެއެވެ. އަދި ވެއްޓުނު ކެރޭންގެ ބޫމް، މިހާރު ވަނީ ނަގާފައެވެ.
މި ހާދިސާއާއި ގުޅިގެން މަޝްރޫޢުގެ މަސައްކަތުގެ ޝެޑިއުލަށް އެއްވެސް ބަދަލެއް ނާންނާނެ ކަމަށް މިނިސްޓްރީން ވިދާޅުވެއެވެ.
މިކަމާ ގުޅިގެން ބައެއް ފަރާތްތަކުން ކަމުގެ އަސްލު އޮޅޭ ގޮތަށް ޚަބަރު ފަތުރަމުން ގެންދާކަމަށް ޕްލޭނިން މިނިސްޓްރީން ވަނީ ވިދާޅުވެފައެވެ.
ތިލަމާލެ ބްރިޖްގެ މަސައްކަތަށް ވިލިމާލޭ ސަރަޙައްދުގައި ޖެކަޕް ޕްލެޓްފޯމެއް އަޅަން އުޅެނިކޮށް، ޕްލެޓްފޯމް ކަހާލައިގެން މީގެ ކުރިންވެސް މިފަދަ ޙާދިސާއެއް ދިމާވެފައިވެއެވެ. ނަމަވެސް އެކަން ޙައްލުކޮށް ފަހުން ވަނީ މަސައްކަތްތައް ކުރިއަށްގެންގޮސްފައެވެ.
ތިލަމާލޭ ބްރިޖް މަޝްރޫއަކީ މާލެ-ވިލިމާލެ-ގުޅިފަޅު އަދި ތިލަފުށި ގުޅާލުމަށް ކުރިއަށްގެންދާ މަސައްކަތެކެވެ. މީގެތެރެއިން މާލޭގައި އެއްގަމުން ޖަހާ ތަނބުތަކުގެ މަސައްކަތް ވަނީ ނިމިފައެވެ. އަދި މިހާރު ކުރަމުންދަނީ، މޫދުގައި ތަނބުތައް ޖެހުމުގެ ތައްޔާރީތަކެވެ.