އަލްޒެއިމާ ބަލީގެ އަލާމާތްތަކެއް ފެންނަން ފެށުމާއި ގުޅިގެން ފަރުވާއަށްޓަކައި ހޮލީވުޑްގެ ތަރި ކްރިސް ހެމްސްވޯތު އެކްޓިން އިން ބްރޭކެއް ނަގަން ނިންމައިފިއެވެ.
މާވެލްގެ މަޤުބޫލު "ތޯ" ގެ ކެރެކްޓަރ ކުޅޭ އޮސްޓްރޭލިއާއަށް އުފަން 39 އަހަރުގެ އެކްޓަރު ބުނިގޮތުގައި ސިއްހަތާއި މެދު ވަރަށް ކަންބޮޑުވާ ކަމަށާއި، މިހާރު އެންމެ ބޮޑު އިސްކަމެއް ދީފައި ވަނީ ރައްކާތެރިކަމުގެ ފިޔަވަޅުތަކަށް ކަމަށެވެ. ކްރިސް ބުނި ގޮތުގައި ޑިމެންޝިއާ ނުވަތަ ހަނދާން ނެތޭ ބަލީގެ އެންމެ އާންމު ވައްތަރު ކަމަށްވާ އަލްޒެއިމާގެ އަލާމާތްތަކެއް ފާހަގަކުރެވުނީ ޑިޒްނީ ޕްލަސްގެ ޑޮކިއުމަންޓަރީއެއްގެ މަސައްކަތް ނިންމައިލުމަށް ފަހު ހެދި ޗެކަޕްތަކެއްގެ ތެރޭގައެވެ.
މިދިޔަ އަހަރުގެ އެންމެ ކާމިޔާބު ފިލްމުތަކުގެ ތެރޭގައި ހިމެނޭ ނެޓްފްލިކްސް "އެކްސްޓްރެކްޝަން" ގެ ވެސް ތަރި ބުނީ އަލްޒެއިމާ އިން ސަލާމަތްވުމަށްޓަކައި އެކްޓިންއާ ވަގުތީ ގޮތުން ދުރަށް ޖެހުމަކީ މި ވަގުތަށް ވަރަށް މުހިއްމު ކަމެއް ކަމަށެވެ.
ކްރިސްގެ ކާފައަކީވެސް މި ބަލީގެ މީހެއް ކަމަށް އޭނާ ބުންޏެވެ. ކާމިޔާބު އެކްޓަރު ބުނި ގޮތުގައި މަސައްކަތްތަކުން ރަސްމީކޮށް ބްރޭކެއް ނަގާނީ ޑިޒްނީ ޕްލަސް އާއި ނެޝަނަލް ޖޯގްރަފީގެ "ލިމިޓްލެސް" ގެ ޕްރޮމޯޝަނަލް ޓުއަރ އާއި ސޮއިކޮށްފައި ހުރި އިތުރު މަސައްކަތްތައް ނިންމާލުމަށްފަހުއެވެ.
ކްރިސްގެ ކުރިއަށް ހުރި ފިލްމުތަކުގެ ތެރޭގައި "އެކްސްޓްރެކްޝަން 2" އާއި 2015 ވަނަ އަހަރު ދެއްކި "މޭޑް މެކްސް: ފިއުރީ ރޯޑް" ގެ ސްޕިންއޮފް/ޕްރީކްއެލް "ފިއުރިއޯސާ" ހިމެނެއެވެ.