އަންހެނުންނާއި
އަންހެންކުދިންނަށް ކުރާ ނޭދެވޭ އަނިޔާ އަދި އެކި ތަފާތުކުރުންތައް ނައްތާލުމަށް
ކުރާ މަސައްކަތްތަކުގައި ދިވެހިރާއްޖެއަށް ކުރިއެރުންތަކެއް ލިބިފައިވާކަމަށް މިނިސްޓްރީ
އޮފް ލޯ އެންޑް ޖެންޑަރ ހިންގެވުމާ ޙަވާލުވެހުންނެވި ބަންޑާރަ ނާއިބު އަލްއުސްތާޛް
މުޙައްމަދު އަނިލް ވިދާޅުވެއްޖެއެވެ.
ބަންޑާރަ ނާއިބު މިހެން ވިދާޅުވީ، ވަން
ބިލިއަން ރައިޒިންގގައި އަންހެނުންނާއި އަންހެންކުދިންނަށް ކުރާ އަނިޔާ
ހުއްޓުވުމުގެ ކެމްޕޭންގެ އަހަރީދުވަހާ ގުޅުވައިހެން ދެއްވި ޚިތާބުގައެވެ. ކޮންމެ އަހަރެއްގެ ފެބުރުއަރީ މަހުގެ 14
ވަނަ ދުވަހަކީ ދުނިޔޭގެ ހުރިހާ ކަންކޮޅުތަކެއްގައި އެއްވަގުތެއްގައި މިކަމާގުޅޭ
ޙަރަކާތްތަކެއް ކުރިއަށް ގެންދިއުމަށް މަސައްކަތް ކުރާ ދުވަހެކެވެ. މިގޮތުން
މިއަހަރަކީ، ދިވެހިރާއްޖޭގައި މި ކެމްޕޭން ކުރިއަށްގެންދާ 4 ވަނަ އަހަރުއެވެ.
އަންހެނުންނާއި އަންހެންކުދިންނަށް ކުރާ
ގޯނާ ހުއްޓުވައި މިފަދަ އާދަތައް ނައްތާލުމުގެ މަޤްޞަދުގައި ހިންގާ ވަން ބިލިއަން
ރައިޒިންގގެ އަހަރީ ދުވަހާގުޅުވައިގެން ދެއްވި ޚިތާބުގައި ބަންޑާރަ ނާއިބު
އަލްއުސްތާޛް މުޙައްމަދު އަނިލް ވިދާޅުވީ، އަންހެނުންނާއި އަންހެންކުދިންނަށް ކުރާ
ނޭދެވޭ އަނިޔާ އަދި އެކި ތަފާތުކުރުންތައް ނައްތާލުމަށް ކުރާ މަސައްކަތްތަކުގައި ރާއްޖެއިން
ކުރިއެރުންތަކެއް ހޯދާފައިވާކަމަށެވެ. އެގޮތުން ތަޢުލީމީ ދާއިރާގައި ކުރިއަރަމުންދާ
އަންހެންކުދިން އަދި އަންހެނުންގެ އިންސައްތަ ފިރިހެން ކުދިންނާއި ފިރިހެނުންނާ
އަޅާ ބަލާއިރު އިތުރުވަމުންދާކަން ފާހަގަކުރެއްވިއެވެ. އެހެންނަމަވެސް، ވަޒީފާގެ
މާޙައުލަށް އަންހެނުން ނެރުމަށާއި އައްޔަންކުރެވޭ މަޤާމުތަކަށާއި، ކަންކަން ނިންމާ
ފެންވަރުގައި އަންހެނުންގެ ބައިވެރިވުން އިތުރުކުރުމަށް ގިނަގުނަ މަސައްކަތްތަކެއް
ކުރަން ޖެހޭކަމަށް އަނިލް ވިދާޅުވިއެވެ.
ސަރުކާރުގެ މެނިފެސްޓޯގައި ހިމެނޭ މުހިއްމު އެއް ވަޢުދުކަމަށްވާ،
"އަންހެނުންނަށް ކުރާ އަނިޔާ އަދި ގޯނާއަށް ފުރުސަތެއް ނުދޭނަން" މި
ވަޢުދު ފުރިހަމަކުރުމަށްޓަކައި ކަމާއި ގުޅުންހުރި ޤާނޫނީ އޮނިގަނޑު އިތުރަށް
ހަރުދަނާކުރުމާއި ޤާނޫނަށް އަހުލުވެރިކުރުވުމުގެ ޕްރޮގްރާމުތަކާއި އަންހެނުންގެ
ހައްޤުގައި ވަކާލާތުކުރާނެ ފިރިހެނުން އިތުރުކުރުމަށް ތަފާތު ޕްރޮގްރާމްތަކެއް
މިއަހަރު ތެރެއަށް ވަނީ ރޭވިފައެވެ.
ބަންޑާރަ ނައިބު ވިދާޅުވީ، އަންހެނުންނަށް ކުރާ އަނިޔާތައް ހުއްޓުވުމުގެ
ގޮތުން އަންހެނުން އިޤްތިޞާދީ، އިޖްތިމާޢީ އަދި ސިޔާސީ ގޮތުން
ބާރުވެރިކުރުމަށްޓަކައި މިނިސްޓްރީ އޮފް ލޯ އެންޑް ޖެންޑަރއިންއިން
އަތޮޅުތަކުގައި، އިޤްތިޞާދީ ގޮތުން ހުނަރު އިތުރުކުރުމުގެ ޕްރޮގްރާމުތަކުގެ
އިތުރުން، ހިންގުމުގެ ދާއިރާގައި ބޭނުންވާ ފަންނީ ހުނަރު އިތުރުކުރުމަށް ތަފާތު
ތަމްރީން ޕްރޮގްރާމްތައް ކުރިއަށް ގެންދާކަމަށެވެ. އަދި ކައިވެނީގެ ތެރޭގައި
ދެމަފިރިންނާއި ޢާއިލާއަށް ކުރިމަތިވާ މައްސަލަތަށް ޙައްލުކުރާނެ ގޮތްތައް
ހޯދައިދިނުމަށް މިއަހަރު ތެރޭގައި "މެރިޖް ކައުންސެލިންގ" ގެ
ޚިދުމަތްވެސް ފެށިގެންދާނެކަމަށް ވިދާޅުވިއެވެ.
ބަންޑާރަނައިބުގެ ޚިތާބުގައިއަނިޔާއެއް ހިނގަމުންދާކަން އިނގޭނަމަ ނުވަތަ
ޝައްކުވާނަމަވެސް، ލަސްނުކޮށް ކަމާބެހޭ ފަރާތްތަކުގެ ސަމާލުކަމަށް ގެނުއުމަށް
ހުރިހާ ފަރާތްތަކަކުންވެސް މަސައްކަތް ކުރުމަށް އިލްތިމާސްކުރެއްވިއެވެ. މިއީ
ކޮންމެ ފަރުދެއްގެވެސް ޤާނޫނީ ޒިންމާއެއްކަމުގައި ދެކިގެން އަންހެނުންނަށް ކުރާ
އަނިޔާއާއި ގޯނާ ހުއްޓުވުމަކީ ވަކި ފަރާތެއްގެ ނުވަތަ ވަކި މުއައްސަސާއެއްގެ
ޒިންމާއަކަށް ނުހައްދަވާ ކޮންމެ ފަރުދެއްވެސް މިކަމާ ދެކޮޅަށް އަޑުއުފުލާ މިކަން
ހުއްޓުވުމަށް އެންމެން އެއްވިސްނުމެއްގައި މަސައްކަތްކުރަންޖެހޭކަމުގައި ބަންޑާރަ
ނައިބު ވިދާޅުވިއެވެ.