ހުޅުމާލޭގައި ދުބާއީގެ އަމިއްލަ ފަރާތަކުން ޢިމާރާތްކުރި ކުޑަކުދިންގެ ހިޔާއަށް، ވިލިނގިލީ ހިޔާގައި ތިބި ކުދިން ބަދަލުކުރައްވަން ފަށްޓަވައިފިއެވެ.
ރައީސް އޮފީހުގެ އަންޑަރ ސެކްރެޓަރީ ޑޮކްޓަރ ޙުސައިން ފާއިޒް ވިދާޅުވީ، ވިލިނގިލީ ކުޑަކުދިންގެ ހިޔާގައި ތިބި ކުދިންގެ ތެރެއިން ޢުމުރުން 9 އަހަރުން ދަށުގެ ކުދިން ހުޅުމާލެއަށް ބަދަލުކުރެއްވުމަށް ނިންމަވައި، އިއްޔެ 3 އަހަރުން ދަށުގެ ކުދިން ބަދަލުކުރައްވައި ނިންމާފައިވާކަމަށެވެ. އަދި ކުރިއަށް އޮތް ދެ ހަފްތާއެއްހާ ދުވަހުގެ ތެރޭގައި 9 އަހަރުން ދަށުގެ ހުރިހާ ކުދިން ބަދަލުކުރައްވައި ނިމޭނެކަމަށެވެ.
ހުޅުމާލޭގައި 9 އަހަރުން ދަށުގެ ކުދިން ބައިތިއްބެވުމަށް ޚާއްޞަކުރައްވާފައިވާއިރު، ވިލިނގިލި ކުޑަކުދިންގެ ހިޔާގައި ތިބޭނީ 9 އަހަރުން މަތީގެ ކުދިންނެވެ.
އަބޫދާބީގެ ރައްޔިތެއް ކަމަށްވާ މަޙްމޫދު އަލް ހާޖާގެ ޢާއިލާއިން ޚަރަދުކުރައްވައިގެން ޢިމާރާތްކުރެއްވި 2 ބުރީގެ ޢިމާރާތް މިމަހުގެ 17 ވަނަ ދުވަހު ރަސްމީކޮށް ހުޅުއްވުމަށް ހަމަޖެހިފައިވާކަމަށް ރައީސް އޮފީހުން ވިދާޅުވެއެވެ.