"އައު ޓްރެކާއެކު ބައިނަލްއަޤްވާމީ މުބާރާތް ބޭއްވޭނެ"
-
ހުޅުމާލެ ސިންތެޓިކް ޓްރެކްގެ މަސައްކަތް އަންނަ ޖަނަވަރީމަހަށް ނިންމާނެ
-
މިއީ ވޯލްޑް އެތުލެޓިކްސް ޖަމިއްޔާއިން ބަލައިގަންނަ ފެންވަރަށް ތަރައްގީ ޓްރެކެއް
ހުޅުމާލޭގައި މިހާރު އޮތް ސިންތެޓިކް ޓްރެކް މަރާމާތުކޮށް އައު ސިންތެޓިކް ޓްރެކެއް އެޅުމުގެ މަސައްކަތް ސަރުކާރުން ފަށާފައިވާއިރު، އެ ޓްރެކާއެކު ރާއްޖޭގައި ބައިނަލްއަގްވާމީ މުބާރާތްތައް ބޭއްވުމުގެ ފުރުސަތު ލިބޭނެ ކަމަށް އެތުލެޓިކްސް އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީ އަހުމަދު މުންތަގިމް ވިދާޅުވެއްޖެއެވެ.
ހުޅުމާލެ ޓްރެކްގެ ސިންތެޓިކް އިންޓަނޭޝަނަލް ސްޓޭންޑާޑް ސިންތެޓިކަށް ބަދަލުކުރާނެކަން ކުޅިވަރާ ބެހޭ ވަޒީރު އަބްދުﷲ ރާފިއު ހާމަކުރެއްވީ މި ހަފުތާގައި ބޭއްވި "އަހާ" ޕްރޮގްރާމްގައި ވާހަކަ ދައްކަވަމުންނެވެ.
ވަޒީރު ވިދާޅުވީ، މިހާރު އޮތް ޓްރެކްގެ ބަދަލުގައި ދެން ގާއިމުކުރާ ޓްރެކް ވެގެންދާނީ ވޯލްޑް އެތުލެޓިކްސްއިން ގަބޫލުކުރާ ފެންވަރުގެ ޓްރެކަކަށް ކަމަށެވެ. އަދި އެ ޓްރެކްގެ މެޓީރިއަލް އެއްކޮށް ބަދަލުކޮށް އަލުން ޓްރެކް އެޅުމުގެ އަމަލީ މަސައްކަތް މި މަހު ފެށިގެންދާނެ ކަމަށެވެ. އަދި އަންނަ ޖަނަވަރީ މަހަށް ޓްރެކްގެ މަސައްކަތް ނިންމާނެ ކަމަށް ވަޒީރު ވިދާޅުވިއެވެ.
"ޕީއެސްއެމް ނިއުސް"އާ ވާހަކަ ދައްކަވަމުން މުންތަގިމް ވިދާޅުވީ، ހުޅުމާލެ ސިންތެޓިކް ޓްރެކް ހެދިގެންދާއިރު، އެތަން ވެގެންދާނީ، ބައިނަލްއަގްވާމީ މުބާރާތްތައް ބޭއްވޭނެ ފެންވަރުގެ ޓްރެކަކަށް ކަމަށެވެ. އަދި އޭގެ އިތުރުން ވޯލްޑް އެތުލެޓިކްސްގެ މިންގަނޑުތަކަށް މި ޓްރެކް ހެދިގެންދިޔުމާއެކު، އެތުލީޓުން ހަދާ ރެކޯޑްތައް ވޯލްޑް އެތުލެޓިކްސް ޖަމިއްޔާއިން ބަލައިގަންނާނެކަން މުންތަގިމް ފާހަގަކުރެއްވިއެވެ.
"ވޯލްޑް އެތުލެޓިކްސް ފެޑަރޭޝަނުން ގަބޫލު މިކުރަނީ ވަކި ފެންވަރެއްގެ ޓްރެކެއްގައި ހަދާ ރެކޯޑްތައް. އެގޮތުން މި ޓްރެކް ހެދިގެން ދިޔުމާއެކު، އަޅުގަނޑު ގަބޫލު މިކުރަނީ މި ވަގުތު ރާއްޖޭގައި ތަމްރީނު ހަދަމުންދާ އެތުލީޓުންނަށާއި ރާއްޖޭގައި ބާއްވާ މުބާރާތްތަކުގައި ވާދަކުރާ އެތުލީޓުންނަށް ލިބޭނެ ވަރަށް ބޮޑު ކުރިއެރުމެއް ކަމަށް" މުންތަގިމް ވިދާޅުވިއެވެ.
ހުޅުމާލެ ސިންތެޓިކް ޓްރެކަކީ ރައީސް އަބްދުﷲ ޔާމީންގެ ވެރިކަމުގައި އެޅިގެންދިޔަ ޓްރެކެކެވެ. އެކަމަކު އެ ޓްރެކް ހަލާކުވެ، އެތުނުގައި ތަމްރީނު ހަދަމުންދާ އެތުލީޓުންނަށް ދަތިތަކަކާ ކުރިމަތިލާން ވަނީ ޖެހިފައެވެ.
ހުޅުމާލެ ސިންތެޓިކް ޓްރެކްގެ އިތުރުން މާލެ ސިންތެޓިކް ޓްރެކްވެސް އިންޓަނޭޝަނަލް ސްޓޭންޑަޑަށް ބަދަލުކުރުމަށް މަސައްކަތް ކުރަމުން އަންނަ ކަމަށް ސަރުކާރުން ވަނީ ހާމަކޮށްފައެވެ.