ފަހު މެޗުގައި ލުބުނާން އަތުންވެސް ރާއްޖެއަށް ނާކާމިޔާބީ

ފީފާ ވިންޑޯގައި ނުވަތަ ފުޓުބޯޅައިގެ ބައިނަލްއަގްވާމީ ބްރޭކުގައި ދިވެހިރާއްޖޭގެ ސީނިއަރ ޤައުމީ ޓީމުން ކުޅުނު ތިންވަނަ މެޗުން ވެސް ބަލިވެއްޖެއެވެ.

މި ބްރޭކުގައި ކުޅުނު ތިންވަނަ މެޗުގައި ރާއްޖެ ނުކުތީ ލުބުނާނާ ދެކޮޅަށެވެ. ކިރްގިސްޠާނުގެ ބިޝެކްގައި ކުޅުނު މިމެޗުން ރާއްޖެ ބަލިވީ 0-6ގެ ނަތީޖާއަކުންނެވެ.

މެޗު ފަށައިގެން ފުރަތަމަ ތިން މިނެޓުގެ ތެރޭގައި ލުބުނާނުން ލަނޑެއްޖަހައި ލީޑުނެގިއެވެ. ރާއްޖެ ހާފުގެ ތެރެއިން، ޑީއޭރިއާ ބޭރުން ހުސެއިން ސިފާއު ޔޫސުފްއަށް ހެދުނު ގޯހެއްގެ ފައިދާ ނަގައި، ތަނަވަސްވި ފުރުސަތެއްގައި މި ލަނޑު އެޓީމަށް ކާމިޔާބުކޮށްދިނީ ހިސޭން ޗަކްރޫނެވެ.

މެޗުގައި ރާއްޖެއަށް އިތުރު ޗެލެންޖަކާ ކުރިމަތިލާން ޖެހުނީ މެޗުގެ 12ވަނަ މިނެޓުގައި ޓީމުގެ ކެޕްޓަން ސަމޫހު އަލީއަށް ދެއްކި ރަތް ކާޑާއެކު، މެޗުގެ ބޮޑު ބައެއްގައި ކުޅުންތެރިއަކު މަދުކޮށް ކުޅެން ޖެހުމުންނެވެ. ސަމޫހުއަށް ރެފްރީ ރަތްކާޑު ދެއްކީ، ލުބުނާނުގެ ލިއޮނާޑޯ ޝާހިންއަށް، ލާސްޓް ޑިފެންޑަރުގެ ގޮތުގައި ހުރެފައި ސަމޫހު ކުރި ފައުލަކާ ގުޅިގެންނެވެ.

މެޗުގައި ރާއްޖެއަށް އެންމެ ބޮޑު ޗެލެންޖަކަށްވީ ޑިފެންސިވް މިސްޓޭކުތައް މަދުކުރުމެވެ. މެޗުގައި ލުބުނާނުން ދެވަނަ ލަނޑުޖެހީ 36ވަނަ މިނެޓުގައެވެ. މިއީ ލުބުނާނުގެ ޖިމޭ ކަޒާން، އޭރިއާ ބޭރުގައި ހުރެފައި ފޮނުވާލި ހަމަލާއެއްގައި ބޯޅަ ޗަކްރޫންގެ ގައިގައި ޖެހިފައި ބޯޅައިގެ މިސްރާބު ބަދަލުވެގެން ގޮސް ގޯލުގެ ތެރެއަށް ވަދެގެން ކާމިޔާބުކުރި ލަނޑެކެވެ.

މެޗުގައި ތިންވަނަ ލަނޑުޖަހައި ޗަކްރޫން އޭނާގެ ހެޓްރިކް ފުރިހަމަކުރީ 42ވަނަ މިނެޓުގައެވެ. މިއީ ޑީއޭރިއާ ބޭރުގައި ހުރެފައި އަޙްމަދު އައިހަމް ކުރިއަށް ފޮނުވާލަން މަސައްކަތްކުރި ބޯޅައެއް ގެއްލި، ލުބުނާން ކުޅުންތެރިންނަށް ތަނަވަސްވި ފުރުސަތެއްގައި ޗަކްރޫން ކާމިޔާބުކުރި ލަނޑެކެވެ.

ތިން ލަނޑުގެ ލީޑެއްގައި އޮވެ ލުބުނާނުން ދެވަނަ ހާފު ފެށިއިރު މިހާފުގައި އެޓީމުން ވަނީ ޖުމްލަ 9 ބަދަލު ގެނެސްފައެވެ. ރާއްޖެއިން ވެސް މިހާފުގައި 5 ބަދަލެއް ގެނެސްފައިވެއެވެ.

މި ހާފުގައި ވެސް ވަރަށް ކުރީކޮޅު ލުބުނާނުން ލަނޑެއް ޖެހިއެވެ. މެޗުގެ 52ވަނަ މިނެޓުގައި ލުބުނާނަށް ކާމިޔާބުކުރެވުނު މި ލަނޑަކީ، އެޓީމުގެ ލިއޮނާޑޯ ޝާހިން ފޮނުވާލި ހަމަލާއެއް ކީޕަރު ހުސެއިން ދިފާއުކުރުމުން ރިބައުންސަށް އައި ބޯޅަ، ރާއްޖޭގެ އަޙްމަދު މާއިޝް ރަޝީދުގެ ގައިގައި ޖެހިފައި ބައިކޮޅަށް ވަދެގެން ކާމިޔާބުކުރެވުނު ލަނޑެކެވެ.

މި މެޗުގައި ލުބުނާނުން ޖެހި ފަހު ދެލަނޑު އެޓީމަށް ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންއެރި އަލީ ކައްސާސްއެވެ.

މި ނަތީޖާއާއިއެކު ރާއްޖެއިން ކުޅުނު ތިން މެޗުން ވެސް ބަލިވިއިރު، މި ތިން މެޗަކީ ވެސް، ނަތީޖާއަށް އިސްކަންދިނުމުގެ ބަދަލުގައި، އަންނަ ނޮވެމްބަރު މަހު ބަންގްލަދޭޝްގައި ބާއްވާ ސާފް ޗެމްޕިއަންޝިޕަށް ތައްޔާރުވުމަށް، މެޗު ތަޖުރިބާ ހޯދުމުގެ ބޭނުމުގައި ވަރުގަދަ ޓީމުތަކަކާ ދެކޮޅަށް ކުޅެން ކުޅުނު މެޗުތަކެކެވެ.

ރާއްޖެއިން މި ބްރޭކުގައި ކުޅުނު ތިން މެޗުގައި ވެސް ބައްދަލުކޮށްފައި ވަނީ ފީފާ ރޭންކިންއަށް ބަލާއިރު ވެސް ރާއްޖެއަށްވުރެ ވަރުގަދަ ޓީމުތަކާއެވެ.