ބަޔޯޑައިވަރސިޓީއަކީ ގުދުރަތީ ދިރުންތަކުގެ މައްޗަށް އެކުލެވިގެންވާ ވެށްޓެވެ. ކަނޑާއި ފަރުތަކާއި ޖަންގަލިތަކާއި ކޯރުތަކާއި ޗަސްބިންތަކާއި ހަނަފަސް ސަހަރާތައްފަދަ ކޮންމެ މާޙައުލަކީ އެތައް ދިރުމެއްގެ ގެތަކެވެ. އެތަކެތީގެ މާޙައުލެވެ.
ދިވެހިރާއްޖެއަށް ބަލާއިރު، އަހަރެމެންގެ އެންމެ މުހިންމު މާޙައުލަކީ ކަނޑު ފަޅާ ފަރުތަކެވެ. ކުދިކުދި ޖަޒީރާ ރަށްތަށް އުފެދުމުގެ އަސްލަކީވެސް ފަރެވެ. އަދި އެ ރަށްތަށް ޙިމާޔަތް ކޮށްދެނީވެސް ފަރުތަކެވެ. މީގެއިތުރުން ފަރުތަކާއި އެއާ ގުޅިފައިވާ ތަންތަނަކީ އަހަރަމެންގެ ދިރިއުޅުމައި ޢާއްދަނީއާއި ގުޅިފައިވާ ތަންތަނެވެ. ރާއްޖޭގެ އިޤްތިޞާދުގެ މައިގަނޑު ސިނާޢަތް، ފަތުރުވެރިކަމުގެ އާމްދަނީގައި ފަރުތަކާއި އެއާ ގުޅިގައިވާ މާހައުލުތައް މުހިންމު ދައުރެއް އަދާކުރެއެވެ.
ކޮންމެ އަހަރެއްގެ ބަޔޯޑައިވަރސިޓީ ދުވަސް ފާހަގަކުރަނީ މެއި މަހުގެ 22ވަނަ ދުވަހުއެވެ. ބަޔޯޑައިވަރސިޓީ ދުވަހުގެ މިއަހަރުގެ ޝިއާރަކީ "ހުރިހައި ދިރުންތައް ހިމެނޭހެން ގުޅިފައިވާ މުސްތަޤްބަލެއް ބިނާކުރުން" މި ޝިއާރެވެ.
މި ދުވަހާ ގުޅިގެން މިނިސްޓަރ އޮފް ސްޓޭޓް ފޮރ އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލިޖީ ޑރ.އަބްދުﷲ ނަސީރު ވިދާޅުވީ ދިވެހިރާއްޖެއަކީ ދުނިޔެއަށް ބަލާއިރުވެސް، ފާހަގަކޮށްލެވޭ ގުދުރަތީ މުއްސަނދުކަމެއް ލިބިފައިވާ ޤައުމެއްކަމަށެވެ. ޚާއްސަކޮށް ފަރުތަކުގެ މުއްސަނދިކަމާއި، ރަށްތައް ޙިމާޔަތްކުރުމުގައި ފަރުތައް އަދާކުރާ މުހިންމު ދައުރަށް އޭނާ އަލިއަޅުއްވާލެއްވިއެވެ. އޭނާ ވިދާޅުވީ ތިމާވެށީގެ މި ނިޒާމުވަނީ ދިރިހުރުމަށް އެކަތި އަނެކައްޗަށް ބަރޯސާވެފައިކަމަށެވެ. ޚާއްސަކޮށް ފަރުތަކުގެ މުރަކައިގެ ނިޒާމުގެ މުހިންމުކަން ފާހަގަކުރެއްވިއެވެ. ރާއްޖޭގެ ފަރުތަކުގައި 200އަށްވުރެ ގިނަ ބާވަތުގެ މުރަކަ އެބަހުއްޓެވެ.
"ކޮންމެ މުރަކައިގެ ދިރިއުމެއްގެވެސް ދައުރެއް އެބައޮތް. މަސްމަހާމެހީގެ މާޙައުލު ބިނާކުރާ މުރަކައާއި، އެކި ދިރުންތަކަށް ކާނާ ފޯރުކޮށްދޭ މުރަކައާއި ވެލި އުފެއްދާ މުރަކަ އެބަހުރޭ. މާސިންގާ ކަނޑުން ނަގާ ރާޅުތަކުން ރަށްތަކަށް ޙިމާޔަތްވެސް ލިބެނީ މި މުރަކަ ފަރުތަކުން." ސްޓޭޓް މިނިސްޓަރ ވިދާޅުވިއެވެ.
ރާއްޖޭގެ އަމާޒަކީ 2030ވަނަ އަހަރު އަންނައިރު ރާއްޖޭގެ ކަނޑުގެ ސަރަޙައްދުގެ %20 ޙިމާޔަތްކުރުމެވެ. ރާއްޖެއަކީ %99 ކަނޑު އޮންނަ ޤައުމެކެވެ. ކަނޑުތަކުގެ އިތުރުން ކުޅި، ފާ ޗަސްބިންތައް ޙިމާޔަތްކުރުމުގެ މަސައްކަތްވެސް ދަނީ ކުރަމުންނެވެ. ތިމާވެށި ޙިމާޔަތް ކުރުމަށް ކުރަމުންދާ މަސައްކަތުގައި އެންމެ އިސްކަމެއް ދީފައިވަނީ ރާއްޖޭގެ ޤުދުރަތީ ދިރުންތައް ނެތިދިޔަނުދީ ދެމެހެއްޓުމަށެވެ.