އިލެކްޝަންސް ކޮމިޝަނުގެ 2014 ވަނަ އަހަރުގެ މުޅި ބަޖެޓަށްވުރެ، އިތުރަށް "ސަތޭކަ އައްޑިހަ ދެހާސް ތިންސަތޭކަ އައްޑިހަ ތިން ރުފިޔާ" ޚަރަދުކުރައްވާފައިވާކަން އެކޮމިޝަނުންގެ 2014 ވަނަ އަހަރުގެ މާލީ އޮޑިޓް ރިޕޯޓުން ހާމަވެއްޖެއެވެ.އިލެކްޝަން ކޮމިޝަނުގެ 2014 ވަނަ އަހަރުގެ މާލީ ބަޔާންތަކަށް އޮޑިޓަރ ޖެނަރަލް ދެއްވާ ރިޕޯޓްގެ ގޮތުގައި މިދިޔަ މަހުގެ 31 ވަނަ ދުވަހު އޮޑިޓަރ ޖެނަލް ނެރުއްވާފައިވާ ރިޕޯޓްގައި ވާގޮތުން ދައުލަތުގެ މާލިއްޔަތުގެ ޤަވާއިދުގައި ބަޔާންކުރައްވާފައިވާ ގޮތުން ބަޖެޓުން ކުރަންޖެހޭ ޚަރަދުތަށް ކުރަންވާނީ، އެކަމަށް އެއަހަރަކު ކަނޑައަޅުއްވާ ބަޖެޓުގައި ކަނޑައެޅިފައިވާ އަދަދަށްވުރެ އިތުރު ނުވާނެ ގޮތެއްގެ މަތިންކަމަށާއި، ނަމަވެސް އިލެކްޝަންސް ކޮމިޝަނުގެ 2014 ވަނަ އަހަރުގެ ފައިނަލް ބަޖެޓްގެ ގޮތުގައި ބައެއް ޚަރަދު ކޯޑްތަކަށް ލިބިފައިވާ އަދަދަށްވުރެ، އިތުރަށް ޚަރަދުކުރައްވާފައިވާކަމަށް ކޮމިޝަނުގެ 2014 ވަނަ އަހަރުގެ "ފާސްކުރެވުނު ބަޖެޓާއި އެ ބަޖެޓުން ހޭދަކުރެވުނު ގޮތުގެ ބަޔާނުން ދައްކާކަމަށެވެ.އެކޮމިޝަނުން ބަޖެޓަށްވުރެ އިތުރަށް ޚަރަދުކުރައްވާފައިވާކަމަށް އޮޑިޓް ރިޕޯޓުގައި ފާހަގަކުރައްވާފައިވަނީ، މަރާމާތުކުރުމާއި ބެލެހެއްޓުމުގެ ޚަރަދުގެ އިތުރުން ފަރުނީޗަރާއި، މެޝިނަރީ އަދި އެހެނިހެން އިކިއުޕްމެންޓް ހޯދުމަށްކަން ރިޕޯޓުން ފާހަގަވެއެވެ. މި އޮޑިޓް ރިޕޯޓުގައި އިލެކްޝަން ކޮމިޝަނާއި ހަވާލާދެއްވައި ހާމަކުރައްވާފައިވަނީ، ފިނެންސް މިނިސްޓރީން ބަލަހައްޓަވާ "ސެޕް" ސިސްޓަމް މެދުވެރިކޮށް އެއްވެސް ޚަރަދެއް ކުރެވޭނީ ޚަރަދުކުރެއްވުމަށް ބޭނުންވާ ކޯޑުގައި ފައިސާ ހުރެގެންކަމަށާއި، އެސިސްޓަމް މެދުވެރިކޮށް ބަޖެޓަށްވުރެ އިތުރަށް ބައެއް ޚަރަދުތަށް ދެއްކިފައިއެވަނީ، ކޮމިޝަނުގެ ބާރުގެ ދަށުގައިވާ ކަމަކުން ނޫންކަމުގައި ވިދާޅުވެފައިވެއެވެ. މިކަމާއި ގުޅިގެން އިލެކްޝަންސް ކޮމިޝަނުގެ ފައިނަލް ބަޖެޓަށް ގެނެވޭ ބަދަލުތަކާއި އެއްގޮތަށް ކޮމިޝަނުގެ މާލީ ބަޔާންތައް އިސްލާހުކުރުމަށާއި އެބަދަލުތަކާއި ގުޅޭ ފުރިހަމަ ލިޔުންތަށް ފައިލްކޮށް ބެލެހެއްޓެވުމަށް އޮޑިޓަރ ޖެނަރަލް، އިލެކްޝަންސް ކޮމިޝަނަށް ލަފާދެއްވާފައިވެއެވެ.