ކޯވިޑުން އަރައިގަތުމަށް ކުރާ މަސައްކަތުގައި ރާއްޖެ މިހާރު މިއޮތީ އިޤްތިޞާދީ ގޮތުން ވަރަށް އުންމީދީ ހިސާބެއްގައި ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. ދިވެހިންގެ އެއްބައިވަންތަކަމުގެ ދުވަސް ފާހަގަކުރުމަށް ޖުމްހޫރީ މައިދާނުގައި ބޭއްވެވި ޖަލްސާގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ކޯވިޑް-19ގެ ދަތިކަމުގެ ތެރޭގައިވެސް ލިބުނު އެންމެ ބޮޑު ތަސައްލީއަކީ، ދިވެހިންގެ ތެރޭގައި އޮތް އެއްބައިވަންތަކަން ކަމަށް ވިދާޅުވިއެވެ.
ދިވެހިންގެ އެއްބައިވަންތަކަމުގެ ދުވަސް ފާހަގަކުރުމަށް ބޭއްވެވި ޖަލްސާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްކެވި ވާހަކަފުޅުގައި ވަނީ ރާއްޖެއަށް ކުރިމަތިވި ބިރުވެރި އަދި ނުރައްކާތެރި ސުނާމީ ކާރިސާގެ ހަނދާންތައް އައުކުރައްވާ އެދުވަހު ދިވެހިން ދެއްކި އެއްބައިވަންތަކަން ފާހަގަކުރައްވާފައެވެ. އަދި އެހިތާމަވެރި ހާދިސާގައި ރާއްޖެއިން ނިޔާވި 82 މީހުންނާއި، ވީނުވީއެއް ނޭނގި ގެއްލުނު 26 މީހުންގެ ޒިކުރާ ރައީސް އައުކުރެއްވިއެވެ.
ރައީސްގެ ވާހަކަފުޅުގައި ސުނާމީގައި ލިބުނު ގެއްލުންތަކުގެ ސަބަބުން، ފަނަރަ ހާހަށް ވުރެ ގިނަ މީހުންގެ ގެދޮރު ހަލާކުވެގެން ދިޔަކަމަށާއި، އަހަރުތަކެއް ވަންދެން އެމީހުން އެކި ރަށްރަށުގައި ހެދި ވަގުތީ ހިޔާތަކުގައި ދިރިއުޅުނުކަން ފާހަގަކުރެއްވިއެވެ. ސުނާމީ ކާރިސާގައި، އަލުން އާރާސްތުކުރުން އުނދަގޫ މިންވަރަށް ފަސް ރަށެއް ހަލާކުވެގެން ދިޔަކަމަށާއި، ބައެއް މީހުން ޢުމުރުދުވަހުގެ މަސައްކަތުން ކޮޅަށް ޖެހި ދިރިއުޅުން، ހިނދުކޮޅެއްގެ ތެރޭގައި ސުންނާފަތިވެ، އަމިއްލަ ފުރާނަ ނޫނީ ސަލާމަތެއް ނުކުރެވުނު ކަމަށް ވިދާޅުވެ އެ ހާދިސާގެ ހަދާންތައް ރައީސް އައު ކުރެއްވިއެވެ.
ރައީސް ވިދާޅުވީ ސުނާމީ ކާރިޘާގައި ދިވެހިން ދެއްކިފަދަ އެއްބައިވަންތަކަމެއް މިހާރު ތަހައްމަލު ކުރަމުންމިދާ ކޯވިޑްގެ ބަލިމަޑުކަމުގެ ތެރޭގައިވެސް ފެނިގެންދާކަމަށެވެ. ކޯވިޑްގެ ދަތިކަމުގެ ތެރޭގައިވެސް ލިބޭ އެންމެ ބޮޑު ތަސައްލީއަކީ، ދިވެހީންގެ ތެރޭގައި އޮތް އެއްބައިވަންތަކަން ކަމަށް ރައީސް ސިފަކުރެއްވިއެވެ.
"އަޅުގަނޑުމެން މިހާރު ތަޙައްމަލު ކުރަމުން މިދަނީ، ޤުދުރަތީ ބޮޑު ކާރިސާއެއް ނޫނަސް، ވަރަށް ދަތި އުނދަގޫ ދުވަސްތަކެއް. ކޯވިޑް19ގެ ބަލިމަޑުކަމުގެ ތެރޭގައި އުޅޭތާ މިވަނީ ދެއަހަރު. ރާއްޖޭގައި ކޯވިޑް ފެތުރެން ފެށުމާއެކު، އަޅުގަނޑުމެން އުޅެން ޖެހުނީ ވަރަށް ދަތި ޙާލެއްގައި. ރާއްޖެ ފުރަބަންދުކުރުމާ ގުޅިގެން، ރާއްޖޭގެ މުޅި އާބާދީއަށް އެކަމުގެ ގެއްލުންތައް ލިބުނު. މި ދަތިކަމުގެ ތެރޭގައިވެސް އަޅުގަނޑުމެންނަށް ލިބުނު އެންމެ ބޮޑު ތަސައްލީއަކީ، އަޅުގަނޑުމެންގެ ތެރޭގައި އޮތް އެއްބައިވަންތަކަން. ގޭގެއަށް ބޭނުންވާ ކާބޯތަކެއްޗާއި ބޯފެނާއި އެނޫން ތަކެތި ފޯރުކޮށްދިނުމުގައި، ހިލޭ ސާބަހަށް އެތައް ހާސް ބަޔަކު މަސައްކަތް ކުރި. އަމިއްލަ ޢާއިލާއާ ދުރުގައި، ރެޔާއި ދުވާލު، އަތްވާއި ވާރޭގައި އެތައް ދުވަހެއް ވަންދެން، ހިލޭ ސާބަހަށް މަސައްކަތްކުރި އެތައް ބަޔަކު އަޅުގަނޑުމެންގެ ތެރޭގައި އެބަތިބި. އެފަދަ ބޭފުޅުންނަށް އަޅުގަނޑުމެންގެ ހިތުގައި އޮތީ ހިފެހެއްޓުމެއް ނެތް ޝުކުރާއި ތަޢުރީފު."ރައީސުލްޖުމްހޫރިއްޔާ ވިދާޅުވިއެވެ.
ރައީސްގެ ވާހަކަފުޅުގައި ކޯވިޑުން އަރައިގަތުމަށް ރާއްޖެއިން ކުރަމުން އަންނަ މަސައްކަތުގައި ގިނަ ކުރިއެރުންތަކެއް ލިބެމުން އަންނަ ކަމަށް ވިދާޅުވިއެވެ. ޚާއްޞަކޮށް އިޤްތިޞާދީ ނަޒަރަކުން ބަލާއިރު ރާއްޖެ މިއޮތީ ވަރަށް އުންމީދީ ހިސާބެއްގައި ކަމަށް ރައީސް ވިދާޅުވިއެވެ.
"ކޯވިޑުން ރައްކާތެރިވުމަށް މިކުރާ މަސައްކަތުގައި، މާތް ﷲގެ ވާގިފުޅާއެކު ރާއްޖެ މިވަނީ، މި ސަރަހައްދުގެ ޤައުމުތަކާ އަޅާބަލާއިރު އެކަށީގެންވާ ކުރިއެރުމެއް ހޯދާފައި. އަޅުގަނޑުމެންގެ ބޯޑަރުތައް ހުޅުވާލައި، ފަތުރުވެރިކަމާއި، އިޤްތިޞާދީ އެހެން މަސައްކަތްތައްވެސް އަލުން ފަށައިގަނެވިއްޖެ. މިހާރު ރާއްޖެ އޮތް ޙާލަތަށް ބަލާއިރު، އިޤްތިޞާދީ ނަޒަރަކުން ވިސްނާ ނަމަ، ރާއްޖެ މިއޮތީ ވަރަށް އުންމީދީ ހިސާބެއްގައި."ރައީސުލްޖުމްހޫރިއްޔާ ވިދާޅުވިއެވެ.
ރައީސްގެ ވާހަކަފުޅުގައި ކޯވިޑްގެ ކުރިން އޮތް ޙާލަތަށް ނުވަތަ އެއަށް ވުރެ ރަނގަޅު ޙާލަތަކަށް، ޤައުމުގެ އިޤްތިޞާދު ގެންދިއުމަށްޓަކައި، އެންމެން އެކުގައި މަސައްކަތް ކުރުމަށް ގޮވާލެއްވިއެވެ. އަދި ޤައުމީ މަޞްލަޙަތު އިސްކޮށް، އެންމެން އެއް ޢަޒުމެއްގައި އެއް ވާނެއްގައި މަސައްކަތް ކުރުމަށް އިލްތިމާސްކުރެއްވިއެވެ.