ރާދާ ކްރިޝްނާ ކުމާރު ލިޔެ ، ޑައިރެކްޓްކުރާ ފިލްމު "ރާދޭ ޝާމް" ގެ ޓްރެއިލަރ ދައްކާލައިފިއެވެ. "ބަހޫބާލީ" ގެ ތަރި ޕްރަބާސް އާއި ޕޫޖާ ހެގްޅޭ ލީޑްރޯލުން ފެންނަ މި ފިލްމުގެ ޕޯސްޓަރުވެސް މީގެކުރިން ވަނީ ދައްކާލާފައެވެ. ޕޯސްޓަރަށްވެސްވަނީ ބޮޑު ތަރުޙީބެއް ލިބިފައެވެ.
ބުޝަން ކުމާރުގެ ޓީ ސީޒީރުން ވެސް ހިއްސާވާ މި ފިލްމު ހިންދީ ބަހުގެ އިތުރުން ތެލެގޫ، ތަމަޅަ އަދި މަލަޔާޅަމް ބަހުންވެސް ގެނެސްދޭނެއެވެ.
"ރާދޭ ޝާމް" ރިލީޒްކުރަން މިހާރު ތާވަލުކޮށްފައިވަނ އަންނަ މަހުގެ 14 ވަނަ ދުވަހުއެވެ. މި ފިލްމުގެ މަންޒަރުތައް އިންޑިއާގެ އިތުރުން އިޓަލީ އަދި ޖޯޖިއާގައިވެސް ވަނީ ނަގާފައެވެ. ފިލްމުގެ ކާސްޓުންގެ ގޮތުގައި ޕްރާބާސް އާއި ޕޫޖާގެ އިތުރުން ބަގިޔާޝްރީ އާއި ކުނާލް ރޯއި ކަޕޫރާއި ސަޗިން ޚެދްކަރް އަދި މުރާލީ ޝަރުމާ ފަދަ ތަރިން ހިމެނެ އެވެ.
"ރާދޭ ޝާމް" އަކީ 200 ކްރޯޑް ރުޕީސް ގެ ބަޖެޓަކުން ހަދާ ރޮމޭންޓިކް ޑްރާމާއެކެވެ.
ޕްރަބާސްގެ ކުރިއަށްހުރި އިތުރު ފިލްމުތަކުގެ ތެރޭގައި ދީޕިކާ ޕަދްކޯން އާއި އަމީތާބް ބައްޗަނާ އެކު ކުޅޭ އަދި ނަން އިއުލާންނުކުރާ ފިލްމަކާއި ސައިފް އަލީ ޚާނާ އެކު ފެނިގެންދާނެ 'އަދިޕުރުޝް' ހިމެނެ އެވެ.