"ސުލްޠާން" ، "ޓައިގަރ ޒިންދާހޭ" އަދި "ބާރަތް" ފަދަ ކާމިޔާބު ފިލްމުތައް ޑައިރެކްޓްކޮށްފައިވާ ޢަލީ ޢައްބާސް ޒަފަރްގެ ކުރިއަށް އޮތް ޑައިރެކްޝަން ބޮލީވުޑުން ފާހަގަކޮށްލެވޭ ވަރުގަދަ ދެ އެކްޝަން ހީރޯ ކަމަށްވާ އަކްޝޭ ކުމާރާއި ޓައިގަރ ޝްރޮފް ހަމަޖައްސައިފިއެވެ.
ފިލްމީ ޚަބަރުތައް ގެނެސްދޭ އިންޑިއާގެ ނޫސްތަކުން ރިޕޯޓްކުރާގޮތުގައި ބޮޑު ޕްރޮޖެކްޓެއްގެ މަސަކަތް ފަށައިގެން ޢަލީ ޢައްބާސް އުޅޭތާ ދުވަސްކޮޅެއްވެއްޖެއެވެ. އަދި އަކްޝޭއާއި ޓައިގަރ އަށް ފިލްމު ނެރޭޓް ކޮށްދިނުމުން ވަގުތުން ވަނީ ފިލްމަށް އާއެކޭވެސް ބުނެފައެވެ.
ފިލްމުގެ މަސައްކަތް އަދި އޮތީ ޕްރީ ޕްރޮޑަކްޝަންގައެވެ. އަކްޝޭ އާއި ޓައިގަރގެ ކުރިއަށްހުރި މަސައްކަތްތައް ނިންމާލުމަށްފަހު މި ފިލްމުގެ މަސައްކަތް ފަށާނީ އަންނަ އަހަރުއެވެ. 2023 ވަނަ އަހަރު ފިލްމު ރިލީޒްކުރުމަށްވެސް މިހާރުވަނީ ނިންމާފައެވެ.
ޓައިގަރ މިހާރު ހުރީ ފިލްމު "ގަނަޕަތް" ގެ ޝޫޓިންގައި އިނގިރޭސިވިލާތުގައެވެ.
އަކްޝޭގެ ކުރިއަށްހުރި ފިލްމުތަކުގެ ތެރޭގައި "ރާމް ސޭޓޫ" ، "ސިންޑްރެއްލާ" ، "ރަކްޝާ ބަންދަން" ، "ގޯރްކާ" ، "ބައްޗަން ޕާންޑޭ" އަދި "ޕްރިތްވީރާޖް" އެވެ. އަކްޝޭ މިހާރުދަނީ ފިލްމު "އޯ މައި ގޯޑް" ގެ މަސައްކަތް ކުރަމުންނެވެ.