2012 ވަނަ އަހަރު ދެއްކި ކާމިޔާބު ފިލްމު "ރައުޑީ ރާތޯޑް" ގެ ދެވަނަ ބައެއް އުފެއްދާނެކަމަށް ފިލްމުގެ ވާހަކަ ލިޔުންތެރިޔާ ކޭވީ ވިޖެޔަންދްރަ ޕްރަސާދް ބުނެފިއެވެ.
އޮރިޖިނަލް ފިލްމު ރިލީޒްކުރިތާ 9 އަހަރުފަހުން އުފައްދާ މި ފިލްމުގެ ސްކްރިޕްޓް މިހާރު ލިޔަން ފަށާފައިވާ ކަމަށްވެސް ވިޖެޔަންދްރަ ބުނެއެވެ. އަދި ސްކްރިޕްޓް ލިޔަނީ ޕްރޮޑިއުސަރ ސަންޖޭ ލީލާ ބަންސާލީގެ އެދުމަކަށް ކަމަށްވެސް އޭނާ ވަނީ ބުނެފައެވެ.
އެސްއެސް ރާޖްމޯލީގެ ބައްޕަ ވިޖެޔަންދްރަ ވަނީ މީގެކުރިންވެސް ހިޓް ފިލްމުތަކުގެ ސްކްރިޕްޓް ލިޔެފައެވެ. މިގޮތުން ފާހަގަކޮށްލެވެނީ "ބަހޫބަލީ" އަދި "ބަޖްރަންގީ ބައިޖާން" އެވެ.
އަކްޝޭ ކުމާރު ޑަބަލް ރޯލް ކުޅެފައިވާ އޮރިޖިނަލް ފިލްމަކީ ތެލުގޫ ފިލްމު "ވިކްރަމަރް ކުޑޫ" ގެ ރީމޭކެކެވެ. ފިލްމުގެ ސީކުއަލް ހަދާނީ ހިންދީ ބަހުން ކަމަށްވެސް ރިޕޯޓްތައް ބުނެއެވެ.
ޕްރަބޫދޭވާ ޑައިރެކްޓްކޮށްފައިވާ އޮރިޖިނަލް ފިލްމުގެ ލީޑްރޯލުން ފެނުނު ބަޠަލާ ސޮނާކްޝީ ސިންހާ ސީކުއަލްގައިވެސް ފެންނާނެކަމަށް އިންޑިއާގެ ނޫސްތަކުން ބުނެއެވެ. މި ފިލްމުގެ މަސައްކަތް ފެށުމަށް މިހާރު ތާވަލުކޮށްފައިވަނީ އަންނަ އަހަރު ފަހުކޮޅުއެވެ.