ސިވިލް ކޯޓާއި ޑްރަގް ކޯޓް ރިސެސްއަށް ނުދާން ނިންމައިފިއެވެ.
އަހަރަކު ދެފަހަރު ކޯޓްތައް ރިސެސްއަށް ދާއިރު، ޑިސެމްބަރު މަހަކީ ކޯޓްތައް ދެވަނަ ފަހަރަށް ރިސެސްއަށް ދާ މުއްދަތެވެ. ނަމަވެސް މިއަހަރުގެ ދެވަނަ ބުރުގައި ރިސެސްއަށް ނުދިއުމަށް ސިވިލް ކޯޓާއި ޑްރަގް ކޯޓުގެ ފަނޑިޔާރުންގެ މަޖިލީހުން ވަނީ ނިންމާފައެވެ.
ސިވިލް ކޯޓުން ބުނީ، ކޮންމެ އަހަރެއް ޑިސެމްބަރު 1އިން 20އަށް އެކޯޓް ރިސެސްގައި އޮންނަ މުއްދުގައި މިއަހަރު ރިސެސްއަށް ނުދިއުމަށް އެކޯޓްގެ ޤާޟީންގެ ޢާންމު މަޖިލީހުން ނިންމާފައިވާކަމަށެވެ.
ޑްރަގް ކޯޓުން ބުނީ މި މަހުގެ 9 އިން 31 އަށް ރިސެސްއަށް ދިއުމަށް އަހަރީ ކަލަންޑަރުގައި ކުރިން ތާވަލު ކުރެވިފައި ވީނަމަވެސް، މި މުއްދަތުގައި ރިސެސްއަށް ނުދާން އެ ކޯޓުން ކަނޑައަޅާފައިވާކަމަށެވެ. އަދި އެގޮތަށް ނިންމީ ޞިއްޙީ ކުއްލި ނުރައްކަލުގެ ޙާލަތު އަދިވެސް ދެމިއޮތުމުން ހަލުވިމިނެއްގައި މައްސަލަތައް ކުރިއަށް ގެންދިއުމަށް ދަތިތައް ކުރިމަތިވެފައިވާތީ، މިވަގުތު ރިސެސްއަށް ހިނގައްޖެނަމަ ޝަރީޢަތްތައް އިތުރަށް ލަސްވެދާނެކަމަށް ފެނިވަޑައިގަންނަވާތިކަމަށް އެ ކޯޓުން މައުލޫމާތު ދެއްވައެވެ.
ޑްރަގް ކޯޓުން މިދިޔަ އަހަރުވެސް ރިސެސްއަށް ގޮސްފައެއް ނުވެއެވެ.
ޑްރަގް ކޯޓާއި ސިވިލް ކޯޓް ރިސެސްއަށް ނުދިއުމަށް ނިންމާފައިވާއިރު، ސުޕްރީމް ކޯޓު މިހާރު އޮތީ ރިސެސްގައެވެ. ސުޕްރީމް ކޯޓު ރިސެސްއަށް ދިޔައީ މިމަހުގެ 30 ވަނަ ދުވަހުއެވެ. އަދި ފެމިލީ ކޯޓުވެސް މިމަހުގެ 16 އިން 31 އޮންނާނީ ރިސެސްގައިކަމަށް އެކޯޓުން ބުންޏެވެ. ފެމިލީ ކޯޓުން ބުނީ، ރިސެސްގެ މުއްދަތުގެތެރޭގައި މައްސަލަތަކުގެ ޝަރީޢަތްތައް ހިންގުން މަދުކުރެވޭނެކަމަށެވެ. ނަމަވެސް ކޯޓަށް ހުށަހަޅާ މައްސަލަތައް ބަލައިގަތުމާއި ކާވެނިތައް ކޮށްދިނުމާއި އެނޫންވެސް ކޯޓުގެ އިދާރީ އެހެނިހެން މަސައްކަތައް މި މުއްދަތުގައި މެދުކެނޑުމެއްނެތި ކުރިއަށްދާނެކަމަށް ފެމިލީ ކޯޓުން ބުންޏެވެ.