2019 ވަނަ އަހަރު ށ.ނޫމަރާ ފަރަށް އެރި ބާޖު 61 މިލިއަނަށްވުރެ ގިނަ ރުފިޔާއިން ޖޫރިނަމާކޮށްފިއެވެ.
ނޫމަރާ ބަނދަރު ހެދުމުގެ މަސައްކަތްކުރުމަށް އެރަށަށް ގެންގޮސްފައިވާ "މެރިން ޕަވަރ 2317" ނަމަކަށް ކިޔާ ބާޖު އަރާފައިވަނީ، އެރަށު ނެރުމައްޗާއި ދިމާލުން ފަރަށެވެ. އެހާދިސާ ހިނގީ އެސަރަހައްދަށް ބާޖު ކައިރިކުރަން އުޅުމުގެ ތެރޭގައެވެ.
އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން ވިދާޅުވީ، 26 އޮކްޓޫބަރު 2019 ގައި "މެރިން ޕަވަރ 2317" ނަމަކަށް ކިޔާ ބާޖު ށ. ނޫމަރާގެ ފަރަށް އެރުމާއި ގުޅިގެން އެ ފަރުގެ މާހައުލަށް ލިބުނު ގެއްލުންތަކަށް ޤާނޫނުގެ ދަށުން ހަދަފައިވާ ޤަވާޢިދުގެ ދަށުން ފަސްދޮޅަސް އެއްމިލިއަން ހަލައްކަ އަށްޑިހަ އެއްހާސް ތިންސަތޭކަ ސޯޅަ ރުފިޔާއިން އެ ބާޖުގެ ވެރިފަރާތް ޖޫރިމަނާކޮށްފައިވާކަމަށެވެ.
އަދި އެ ފައިސާ 30 ދުވަހުގެ ތެރޭގައި ދެއްކުމަށް އެ ބާޖުގެ ދިވެހިރާއްޖޭގެ އެޖެންޓު، ރޮސޮފް ޕްރައިވެޓް ލިމިޓެޑަށް އިއްޔެ އަންގާފައިވާކަމަށް އީޕީއޭއިން ވިދާޅުވިއެވެ.
އީޕީއޭއިން ވިދާޅުވީ ނޫމަރާ ފަރަށް އެރި ބާޖު ފުންކޮށް، އެ ސަރަޙައްދަށް ފެތިފައި އޮތް އެ ބޯޓުގެ ބައިތައް އެ ސަރަޙައްދުން ނަގައި ނިމުމުން އެ އެޖެންސީއިން އެ ސަރަޙައްދު ބަލައި ސަރވޭކޮށްފައިވާކަމަށެވެ. އެ ބާޖު ފުންކޮށް، އެ ސަރަޙައްދަށް ފެތިފައި އޮތް އެ ބޯޓުގެ ބައިތައް އެ ސަރަޙައްދުން ނަގައި އެ މަސައްކަތްކޮށް ނިމިފައިވަނީ މިދިޔަ ނޮވެމްބަރު މަހުގެ 16ގައެވެ.
ނޫމަރާ ނެރާ ދިމާލު ފަރުމައްޗަށް ބާޖު އެރުމުގެ ސަބަބުން އެ ސަރަހައްދު ބޮޑެތި ގެއްލުންތަކެއް ލިބި ނެރުމަތި ވަނީ ތިލަވެފައެވެ. އެކަމުގެ ސަބަބުުން އޮޑިދޯނިފަހަރު ވަނުމަށް ދަތިތަކާއި ކުރިމަތިވަމުންދާކަމުގެ ޝަކުވާ ރައްޔިތުން ކުރަމުން އަންނަކަމަށް ނޫމަރާ ކައުންސިލުން ވިދާޅުވެއެވެ.
ގިނަ އަދަދަކަށް ތެލާއި ޑީސަލް ބަރުކޮށްގެން ދަތުރުކުރަމުން ދިޔަ އެފްއެސްއެމްގެ ބާޖެއްވެސް މިއަހަރުގެ ޖުލައި މަހުގެ ތެރޭގައި ށ. ނޫމަރާ ހުޅަނގު ފަރާތު ނެރުމައްޗަށް އުރިފައިވެއެވެ.