ކުރިއަށް އޮތް މަހެއްހާ ދުވަހުގެ ތެރޭގައި ށ.ފޯކައިދޫ އައު އިންޖީނުގޭގެ ޚިދުމަތް ރައްޔިތުންނަށް ލިބިގެންދާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ފޯކައިދޫގެ ރައްޔިތުންނާއެކު ބޭއްވެވި ބައްދަލުކުރެއްވުމުގައި ދެއްކެވި ވާހަކަފުޅުގައެވެ.
ށ.ފޯކައިދޫގައި މިހާރު ބޭނުންކުރަމުން އަންނަ އިންޖީނުގެ އަކީ މީހުން ދިރިއުޅޭ ސަރަހައްދުގައި ހުންނަ އިންޖީނުގެއެއްކަމުން އެސަރަހައްދުގައި ދިރިއުޅޭ ރައްޔިތުންނަށް ވަނީ ވަރަށް ބޮޑެތި ދަތިތަކާއި ކުރިމަތިލާންޖެހިފައެވެ. މިހާރު އެރަށުގެ އިންޖީނުގެ ހުރީ އެންމެ ރައްކާތެރި ގޮތަކަށް ނޫންކަމަށްވާއިރު އިންޖީނުގެއާ އިންވެގެން ހުރީ ރަށުގެ ޕްރީ ސްކޫލެވެ. މިކަމުގެ ސަބަބުން ޕްރީ ސްކޫލްގައި ދަރިވަރުންނަށް ކިޔަވައިދިނުމަށްވެސް ދަތިތަކެއް ކުރިމަތިވެއެވެ.
އިންޖީނުގޭގެ ބާރު އަޑާއެކު ކުޑަކުދިންނަށް ކިޔަވައިދިނުމުގައި އުފުލަންޖެހޭ ތަކްލީފްގެ އިތުރުން އެސަރަހައްދުގައި ރައްޔިތުން ބޭނުންކުރާ ފެނަކީވެސް އެންމެ ރައްކާތެރި ފެނެއްނޫނެވެ. ރައްޔިތުން ބުނިގޮތުގައި އެފަރާތްތަކުން ބޭނުންކުރާ ފެނަށް ތެލުގެ އަސަރުކުރާކަމަށެވެ.
މީހުން ދިރިއުޅޭ ސަރަހައްދުގައި ހުންނަ އިންޖީނުގެތައް މީހުން ދިރިނޫޅޭ ސަރަހައްދަށް ބަދަލުކުރުމަށް ސަރުކާރުން ކުރިއަށްގެންދާ މަޝްރޫޢުގެ ދަށުން ފޯކައިދޫގައިވެސް ވަނީ ޒަމާނީ އަދި ތަނަވަސް އިންޖީނުގެއެއް އަޅާފައެވެ. ރައީސުލްޖުމްހޫރިއްޔާ އެރަށަށް ކުރެއްވި ޒިޔާރަތުގައި އައު އިންޖީނުގެ ބައްލަވާލެއްވިއެވެ. ރައިސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ އައު އިންޖީނުގޭގެ މަސައްކަތް މިހާރު ނިމުމަކާއި ގާތްވެފައިވާކަމަށާއި، ކުރިއަށް އޮތް މަހެއްހާ ދުވަހުގެ ތެރޭގައި ޖަނެރޭޓަރުތައް އައު އިންޖީނުގެއަށް ބަދަލުކޮށް ޚިދުމަތް ދޭން ފެށޭނެކަމަށެވެ.
އައު އިންޖީނުގޭގެ ޚިދުމަތް ލިބެން ފެށުމުން ރަށުގެ ރައްޔިތުންނަށް މިހާރު ދިމާވާ ތަކުލީފުތަކަށް ބޮޑު ހައްލެއް ލިބޭނެކަމަށް ރަށުގެ ރައްޔިތުން ބުންޏެވެ. ފެނަކަ ކޯޕަރޭޝަނުން، ވަލީދު ކޮންސްޓްރަކްޝަނާއި ހަވާލުކޮށްގެން ކުރިއަށްގެންދާ މިމަޝްރޫޢު އެކުންފުންނާއި ހަވާލުކޮށްފައިވަނީ 5 މިލިއަން ރުފިޔާއަށެވެ.