އިންޑިއާގެ މަހާރަޝްތުރާ ސަރުކާރުން ކޯވިޑާއި ދެކޮޅަށް އަޅާފައިވާ ފިޔަވަޅުތައް ލުއިކޮށް ފިލްމުތައް ޝޫޓްކުރަން ހުއްދަ ދޭން ފެށުމާއެކު ގިނަ ފިލްމުތަކެއްގެ މަސައްކަތްތައް މިހާރުވަނީ ފަށާފައެވެ.
މަސައްކަތްތައް ހުއްޓިފައި އޮތް ސިދާތް މަލޯތްރާ ލީޑްރޯލުން ފެނިގެންދާ ފިލްމު "ތޭންކް ގޯޑް" ގެ މަސައްކަތްތައްވެސް މި ލުއިތައް ސަރުކާރުން ދިނުމުން މިހާރުވަނީ ފެށުމުގެ މަގުމަތީގައެވެ. އިންދްރާ ކުމާރު ޑައިރެކްޓްކުރާ ސޯޝަލް ކޮމެޑީ "ތޭންކް ގޯޑް" ގައި ސިދާތްގެ އިތުރުން އަޖޭ ދޭވްގަން އަދި ރަކުލް ޕްރީތް ސިންގް ވެސް ފެނިގެންދާނެއެވެ.
އަންނަމަހުގެ ފުރަތަމަ ހަފްތާގައި ޝޫޓިންތައް ފަށަން ހަމަޖެހިފައިވާ މި ފިލްމަށް ތައްޔާރުވުމުގެ މަސައްކަތް ޕްރޮޑަކްޝަން ޓީމުން މިހާރުދަނީ ކުރަމުންނެވެ. ދެމަސްދުވަހުގެ މުއްދަތަކަށްފަހު އަލުން އަނބުރާ ސެޓަށް އައުމާއިބެހޭ ގޮތުން ސިދާތް ބުނީ މިއީ ދިގު ބްރޭކެއްކަމަށެވެ. އަދި އޭނާ މިހުރީ ޝޫޓިންތައް ނުފަށައިގެންކަމަށްވެސް ސިދާތް ވަނީ ބުނެފައެވެ.
"ތޭންކް ގޯޑް" ގެ އިތުރުން ޝަންތަނޫ ބަންޗީ ޑައިރެކްޓްކުރާ ސްޕައި ތްރިލަރ ފިލްމު "މިޝަން މަޖްނޫ" އަކީވެސް ސިދާތްގެ ކުރިއަށް އޮތް ފިލްމެކެވެ. ރަޝްމީ މަންދަނާ އަންހެން ލީޑްރޯލުން ފެނިގެންދާ މި ފިލްމުގެ މަންޒަރުތައް ނަގާފައިވަނީ އިންޑިއާގެ ލަކްނޯގައެވެ. މީގެއިތުރުން ރިލީޒްކުރުމުގު މަގުމަތީގައި އޮތް އިންޑިއަން އާމީ އޮފިސަރ ކެޕްޓަން ވިކްރަމް ބަޓްރާގެ މައްޗަށް ހަދާ ބަޔޯޕިކް އަކީވެސް ސިދާތްގެ ކުރިއަށް އޮތް ފިލްމެކެވެ.