ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ ނުވަތަ 241 ކޮމިޓީއަށް މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ހަމަޖައްސަވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ނާއިބް ރައީސް އީވާ އަބްދުﷲ ވަނީ ސަލާމަތީ ޚިދުމަތްތަކާބެހޭ ކޮމިޓީގައި އެމްޑީޕީ ތަމްސީލުކުރައްވާ މެންބަރެއްގެ ގޮތުގައި ހުންނެވި ހުޅުދޫ ދާއިރާގެ މެންބަރު އިލްޔާސް ލަބީބްގެ ބަދަލުގައި، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ މަޖިލީހުގެ ޤަވާޢިދުގައިވާ ގޮތުގެ މަތީން، ހަމަޖައްސާފައިވާކަން ޢިއުލާންކުރައްވާފައެވެ.
އިލްޔާސް ލަބީބު 241 ކޮމިޓީން ވަކިވެވަޑައިގެންނެވީ މިދިޔަ ހަފްތާގައެވެ. އޭނާ ކޮމިޓީން ވަކިވަޑައިގެންފައިވަނީ ރައީސް ނަޝީދަށް ހަމަލާދިނުމުގެ ކުރިން އެފަދަ ހަމަލާއެއް ރާވާކަމުގެ މައުލޫމާތު ޑިފެންސް މިނިސްޓަރާއި ހިއްސާކޮށްފައިވާކަން ހާމަކޮށް އެކަމާއި ގުޅޭގޮތުން 241 ކޮމިޓީއަށް ބަޔާނެއްވެސް ދެއްވާފައެވެ. އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން މަޖިލީހުން ކުރިއަށްގެންދާ އިންކުއަރީއަށް، ހުޅުދޫ ދާއިރާގެ މެމްބަރު އިލްޔާސް ލަބީބް ވަނީ މިމަހުގެ 26 ވަނަ ދުވަހު ހާޒިރުކޮށް ސުވާލުވެސްކޮށްފައެވެ.
ރައްޔިތުންގެ މަޖިލީހުގެ ރައީސަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތް ހޯދުމަށް 241 ކޮމިޓީން ކުރިއަށް ގެންދާ ޕާލަމެންޓަރީ އިންކުއައިރީގައި ގިނަ އެކި ފަރާތްތަކާއި ބައްދަލުކޮށް މައުލޫމާތު އެއްކޮށްފައިވާއިރު، މިހާރު ކޮމިޓީން ކުރިއަށްގެންދަނީ އިންކުއަރީގެ ރިޕޯޓު އެކުލަވާލުމުގެ މަސައްކަތަކެވެ.
އިލްޔާސްގެ ބަދަލުގައި 241 ކޮމިޓީއަށް ހަމަޖެއްސެވި އިމްތިޔާޒް ފަހުމީވަނީ މީގެކުރިންވެސް އެކޮމިޓީގެ މެންބަރުކަން ކުރައްވާފައެވެ. 241 ކޮމިޓީއަކީ މަޖިލީހުގައި ހިމެނޭ ހުރިހާ ސިޔާސީ ޕާޓީއަކާއި މިނިވަން މެންބަރެއްވެސް ހިމެނޭގޮތަށް އެކުލަވާލާފައިވާ ކޮމިޓީއެކެވެ.