ކޯވިޑް-19 ދެވަނަ ފަހަރަށް ޖެހޭ މީހުންގެ ޢަދަދު މިއަހަރު ފެށުނު ފަހުން މަދުވެފައިވާ ކަމަށާއި، މިހާތަނަށް އެންމެގިނައިން މި ބަލި ދެވަނަ ފަހަރަށް ޖެހިފައިވަނީ ކުރިން ޕޮޒިޓިވްވިތާ 9 މަސް ވެފައިވާ މީހުންނަށް ކަމަށް އެޗްޕީއޭއިން ހާމަކޮށްފިއެވެ.
ހެލްތު އިމަރޖެންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑިމިއޮލަޖިސްޓް ޑރ. އިބްރާހީމް އަފްޒަލް ވިދާޅުވީ ކޯވިޑް ޖެހޭ މީހުންނަށް ދެވަނަ ފަހަރަށް ބަލި ޖެހެން ފަށަނީ 3 މަސްފަހުން ކަމަށެވެ. ރާއްޖޭގައި 2020 އިން ފެށިގެން 2021 ގެ މިހާތަނަށް އައިރު ކޯވިޑް-19ގެ ރީ އިންފެކްޝަން ނުވަތަ ދެވަނަ ފަހަރަށް މީހުންނަށް ބަލިޖެހިފައިވާގޮތުގެ ތަފްސީލް ޙިއްސާކުރައްވަމުން ޑރ. އަފްޒަލް ވިދާޅުވީ ދެވަނަ ފަހަރަށް ކޯވިޑް ޖެހޭ މީހުންގެ އަދަދު މިދިޔަ އަހަރުގެ ތެރޭގައި ކޮންމެވެސް ވަރަކަށް އިތުރުވިކަމަށެވެ. އެގޮތުން ބައެއް ހަފްތާތަކުގައި 40 ކޭސްވެސް ރިޕޯޓުކުރެވުނުކަމަށާއި، ބަލިޖެހުމަށްފަހު ހަށިގަނޑުގެ ދިފާޢީ ނިޒާމު ވަރުގަދަވެ، ބައްޔަށް ހޭނެން އޮންނަ 3 މަސް ފަހުން ރީއިންފެކްޝަންގެ ކޭސްތައް ފެނުމަކީ އާދަޔާ ޚިލާފުކަމެއް ނޫންކަމަށް ޑރ. އަފްޒަލް ވިދާޅުވިއެވެ. ނަމަވެސް މިދިޔަ އަހަރުގެ ފަހުކޮޅުން ފެށިގެން ރީއިންފެކްޝަން ކޭސްތައް މަދުވަމުން އަންނަކަން ފާހަގަކުރެވޭ ކަމަށް ޑރ. އަފްޒަލް ވިދާޅުވިއެވެ.
"ފާހަގަކޮށްލެވޭ 2020ގެ ފަހުކޮޅަށް އަރާފައި ރީއިންފެކްޝަންގެ ކޭސްތައް ވަރަށް މަދުކަން. އަދި މިއަހަރުގެ މިހާތަނަށް ފެނުނު ކޭސްތަކަށް ބަލާލާއިރުވެސް ފުދޭވަރަކަށް މަދުން މިއުޅެނީ. އެންމެ ގިނައިންވެސް ރިޕޯޓުކޮށްފައިވަނީ ހަފްތާއަކު 5ކޭސް" ޑރ. އަފްޒަލް ވިދާޅުވިއެވެ.
ޑރ. އަފްޒަލް ވިދާޅުވީ ދެވަނަ ފަހަރަށް ބަލި ޖެހުނު މުއްދަތުވެސް ޖުމްލަކޮށް ބަލާއިރު އިތުރުކަން ފާހަގަކުރެވޭކަމަށެވެ. އެގޮތުން 3މަސް ފަހުން 12 މީހަކަށް ދެވަނަ ފަހަރަށް ބަލި ޖެހިފައިވާއިރު، އެންމެ ގިނަ މީހުންނަށް ދެވަނަ ފަހަރަށް ބަލިޖެހިފައިވާ ކަމަށް ރެކޯޑުކުރެވިފައިވަނީ 9 މަސްފަހުންކަމަށެވެ.
"އެންމެ ގިނައިން ރީއިންފެކްޓްވާ ކަމަށް ފެނިފައި މިވަނީ ގާތްގަނޑަކަށް 9މަސް ފަހުން. އަދި މިހާލަތުވެސް އިތުރުވެގެންދާނެ ވެކްސިނުން އެލިބޭ ރައްކާތެރިކަން ލިބެންފެށީމައި. އެހިސާބުން އަދިވެސް މަދުވާނެ ކަމަށް ބެލެވެނީ" ޑރ. އަފްސަލް ވިދާޅުވިއެވެ.
ނޫސްވެރިންގެ މިބައްދަލުވުމުގައި ކޯވިޑްގެ ރާއްޖޭގެ ތަފާސް ހިސާބުތައް ހިއްސާކުރައްވަމުން ޑރ. އަފްސަލް ވިދާޅުވީ މިހާތަނަށް ރާއްޖޭގައި ޕޮޒިޓިވްވި މީހުންގެ ތެރޭގައި އެންމެ ގިނައީ 18 އަހަރާއި 45އަހަރާ ދެމެދުގެ އުމުރުފުރާގެ މީހުން ކަމަށާއި ދެވަނަ ފަހަރަށް އެންމެ ގިނައިން ބަލިޖެހިފައިވަނީވެސް މިއުމުރުފުރާގެ މީހުންނަށް ކަމަށެވެ. އެގޮތުން އެއުމުރުފުރާގެ 148މީހަކަށް ދެވަނަ ފަހަރަށްވެސް ބަލިޖެހިފައިވާކަން އޭނާ ފާހަގަކުރެއްވިއެވެ. އަދި މިބަލީގައި އެންމެ ގިނައިން މިހާތަނަށް އެޑްމިޓްކޮށްފައިވަނީވެސް 18 އަހަރާއި 45 އަހަރާދެމެދުގެ އުމުރުފުރާގެ މީހުން ކަމަށް ޑރ. އަފްޒަލް ވިދާޅުވިއެވެ. އެހެންކަމުން 18 އަހަރާއި 45 އަހަރާ ދެމެދުގެ އުމުރުފުރާގެ މީހުން މިބަލިމަޑުކަމުން ރައްކާތެރިވުމަށް ޚާއްސަ ސަމާލުކަމެއް ދޭންޖެހޭ ކަމަށް އެޗްޕީއޭގެ އެޕިޑިމިއޮލަޖިސްޓް ވިދާޅުވިއެވެ.