ނ. އަތޮޅު ހޮސްޕިޓަލުގައި އެކްސްޓެންޝަން އިމާރާތެއް އެޅުމުގެ މަސައްކަތް ކްލޭ ލިމިޓެޑް ލައިބިލިޓީ ފާރޓްނަރޝިޕާއި ހަވާލުކޮށްފިއެވެ.
ދެ މިލިއަނަށް ވުރެ ގިނަ ރުފިޔާ ޚަރަދުކޮށްގެން ކުރިޔަށް ގެންދާ މި މަޝްރޫޢު ކްލޭ ލިމިޓެޑާ ހަވާލުކުރީ، މަސައްކަތް ހަވާލުކުރާތާ 13 ދުވަސް ތެރޭ ފަށާ، 147 ދުވަސްތެރޭ މަސައްކަތް އެއްކޮށް ނިންމާ ގޮތަށެވެ.
މި މަޝްރޫޢާއި ގުޅޭގޮތުން މައުލޫމާތުދެއްވަމުން ހެލްތު މިނިސްޓްރީން ވިދާޅުވީ، މި މަޝްރޫޢުގެ ސަބަބުން ނ. އަތޮޅު ހޮސްޕިޓަލަށް ކުރިމަތިވެފައިވާ ޖާގައިގެ ދަތިތަކަށް ހައްލެއް ލިބިގެންދާނެކަމަށެވެ. އަދި މިހާރު ހަދާ އެކްޓެންޝަން އިމާރާތަކީ 242.33 އަކަ މީޓަރުގެ ހުސް ޖާގައެއްގައި އަޅާ އިމާރާތެއްކަމަށާއި، މި އިމާރާތް ނިމޭއިރު 6 އޯޕީޑީ ރޫމާއި، ލެބޯޓްރީއަކާއި، ވެއިޓިން އޭރިއާއެއްގެ އިތުރުން ފާހާނާއެއް ހުންނާނެކަމަށްވެސް މިނިސްޓްރީ މައުލޫމާތު ދެއްވައެވެ.
ނ. އަތޮޅު ހޮސްޕިޓަލުގެ ޚިދުމަތް އިތުރަށް ރަނގަޅުކުރުމަށް މި ޕްރޮޖެކްޓުގެ ދަށުން ހޮސްޕިޓަލުގެ ވޯޑުތައް މަރާތުކުރާނެކަމަށް މިނިސްޓްރީން ވިދާޅުވެއެވެ. އަދި މޭ މަހު 2 ވަނަ ދުވަހު ނ. އަތޮޅު ހޮސްޕިޓަލުގައި އޭސީ ހަރުކުރުމަށް އިތުރު ބަޔަކާ އެއްބަސްވުމެއްގައި ސޮއިކުރުމަށް ހަމަޖެހިފައިވާކަމަށްވެސް މިނިސްޓްރީން ވިދާޅުވެއެވެ.