މިސަރުކާރުގެ ހައުސިން މަޝްރޫޢުތަކުން އެކި ފަންތީގެ މީހުންނަށް ފައިދާވާނެ - މިނިސްޓަރ އަސްލަމް
މިސަރުކާރުން ޢިމާރާތްކުރުމަށް ހަމަޖެހިފައިހުރި ހައުސިންގ މަޝްރޫއުތަށް ހިންގާނީ "މިކްސް ޑިވެލޮޕްމަންޓް"ގެ ގޮތުގައިކަމަށާއި މިކަމުގެ ސަބަބުން އެކި ފަންތިތަކުގެ މީހުންނަށް ފައިދާތަކެއް ކުރާނެކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރަސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ "ވަން ސެންޓްރަލް ޕާކް ރެސިޑެންޝިއަލް ބިލްޑިންގ" ގެ ބިންގާއެޅުމަށް މިއަދު ހުޅުމާލޭގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ރާއްޖެއަށް ކުރިމަތިވެފައިވާ ބޯހިޔާވަހިކަމުގެ ދަތިތަކަށް ހައްލެއް ގެނައުމުގެ ގޮތުން، މިއަދު ބިންގާ އެޅި 120 ހައުސިންގ ޔުނިޓަކީ މެދުފަންތީގެ އާއިލާތަކަށް އަތްފޯރާ ފަށުގައި ބޯހިޔާވަހިކަން ހޯދައިދިނުމުގެ ގޮތުން ހިންގާ މަޝްރޫޢުއެކެވެ. މި މަޝްރޫޢުއަކީ ސެންޓްރަލް މޮރީޝިއަސްއާއި ރަޝީދު ކާޕެންޓްރީ ކޮންސްޓްރަކުޝަނާއި ގުޅިގެން ހިންގާ މަޝްރޫއުއެކެވެ. މި މަޝްރޫޢުގެ ދަށުން އަޅާ ހައުސިން ޔުނިޓްތަކުގައި ހިމެނެނީ ތިން ކޮޓަރީގެ އެޕާޓްމަންޓުތަކެކެވެ. މި މަޝްރޫއު ނިންމުމަށް އަމާޒު ހިފާފައިވަނީ 2023 ގެ ފެބްރުއަރީމަހަށެވެ.
މި ހައުސިން ޔުނިޓްތަކުގެ ބިންގާ އަޅުއްވާދެއްވައި ވާހަކަފުޅުދައްކަވަމުން ހައުސިން މިނިސްޓަރ މުޙައްމަދު އަސްލަމް ވިދާޅުވީ ޒަމާނުއްސުރެ ސަރުކާރުން ހައުސިންގ ޔުނިޓްތައް އަޅަމުން އައީ އެއް ތައްގަނޑަކަން ފާހަގަކުރައްވާފައެވެ. އަދި އެއް ތައްގަޑަކަށް ބޯހިޔާވަހިކަމުގެ މަޝްރޫއުތައް ކުރިއަށް ގެންދިއުމަކީ ބޯހިޔާވަހިކަމަށް ބޭނުންޖެހިފައިވާ އާއިލާތަކަށް އެންމެ މަންފާކުރަނިވި ގޮތް ނޫންކަމަށް މިނިސްޓަރ ވިދާޅުވިއެވެ. ނަމަވެސް މިކްސް ޑިވެލޮޕްމަންޓަށް ހައުސިން ޔުނިޓްތައް އެޅުމުން ބޯހިޔާވަހިކަމަށް ބޭނުންވެފައި ތިބި އެކި ފަންތިތަކުގެ މީހުންނަށް ފައިދާތަކެއް ކުރާނެކަމަށް މިނިސްޓަރ ވިދާޅުވިއެވެ.
"މިކްސް ޑިވެލޮޕްމަންޓް ޕްރޮޖެކްޓަކީ ހަތަރު ކެޓަގަރީއަކަށް ބަހާލައިގެން ކުރިޔަށް ގެންދާނެ ހައުސިންގެ ޔުނިޓްތަކެއް. އެކެޓެގަރީތަކަކީ ކައުންސިލް ހައުސިންގ ޔުނިޓާއި، އެފޯޑަބަލް ހައުސިންގ ޔުނިޓާއި، މިޑިލް އިންކަމް ހައުސިންގ ޔުނިޓް އަދި ހައި އިންކަމް ހައުސިންގ ޔުނިޓް ތަކެއް" މިނިސްޓަރ އަސްލަމް ވިދާޅުވިއެވެ.
"ވަން ސެންޓްރަލް ޕާކް ރެސިޑެންޝިއަލް ބިލްޑިންގ" ޕްރޮޖެކްޓަކީ މީގެ 10 ވަރަކަށް އަހަރު ކުރިން ޓާޓާ ކޮންސްޓްރަކްޝަނާ ޙަވާލުކުރި 500 ހައުސިންގ ޔުނިޓުގެ ތެރެއިން، ސެންޓްރަލް މޮރީޝަސް އިން ޓާޓާ ކޮންސްޓްރަކުޝަނުން ގަނެފައިވާ 120 ހައުސިންގ ޔުނިޓެވެ. ސެންޓްރަލް މޮރީޝަސްއާއެކު މި މަޝްރޫޢު ކުރިޔަށް ގެންދިޔުމަށް އެއްބަސް ވެފައިވަނީ 2015ގައެވެ.
"ވަން ސެންޓްރަލް ޕާކް ރެސިޑެންޝިއަލް ބިލްޑިންގ" އިތުރުން، ކުރިޔަތް އޮތް ދެތިން މަހެއްގައި މާލޭގައި ލަގްޒަރީ ޕްރޮޖެކްޓެއްގެ ގޮތުގައި "ސްލިޓެއަރ" ނަމަކަށް ކިޔާ މަޝްރޫޢެއް ކުރިއަށް ގެންދިއުމަށް ވަނީ ހަމަޖެހިފައެވެ. އަދި އައިލެންޑް ވިލާ ތަރައްޤީކުރުމުގެ މަޝްރޫޢެއް ޅ.ޅޮސްއަލާފުށީގައި ކުރިޔަށް އޮތް އަހަރު ތެރޭގައި ފަށާނެކަމަށްވެސް ސެންޓްރަލް މޮރީޝަސްއިން ވިދާޅުވެއެވެ.