ޚާއްޞަ އެހީއަށް ބޭނުންވާ މީހުންނަށް ވަޒީފާގެ ފުރުޞަތު އިތުރުވާގޮތަށް ޤަވާއިދަށް ބަދަލު ގެނެސްފި

ދިވެހި ސިވިލް ސަރވިސްގެ ބައެއް މަޤާމުތަކަކީ، ހަމައެކަނި ޚާއްސަ އެހީއަށް ބޭނުންވާ ފަރާތްތަކަށް ޚާއްސަ މަޤާމުތަކެއްގެ ގޮތުގައި ކަނޑައެޅޭގޮތަށް ދިވެހި ސިވްލް ސަރވިސްގެ ޤަވާއިދު އިސްލާހުކޮށްފިއެވެ.

ސިވިލް ސަރވިސް ކޮމިޝަނުން އެކުލަވާލާ އުސޫލެއްގެ ތެރެއިން އެކަން ކަނޑައެޅޭގޮތަށް ދިވެހި ސިވިލް ސަރވިސްގެ ޤަވާއިދަށް ގެނައި ބަދަލަކީ ޚާއްސަ އެހީއަށް ބޭނުންވާ މީހުންނަށް އިތުރު ފުރުޞަތުތައް ފަހިކޮށްދީ، ވަޒީފާތަކަށް ކުރިމަތިލުމަށް އެފަދަ ފަރާތްތަކަށް ހުރި ހުރަސްތައް ނައްތާލުމަށް ގެނެސްފައިވާ ބަދަލެކެވެ.

މި ޤަވައިދުގައި ޚާއްސަ އެހީއަށް ބޭނުންވާ މީޙުންގެ ގޮތުގައި ކަނޑައަޅާ މީހުންނަކީ، ދާއިމީގޮތެއްގައި ދިގުދެމިގެންދާ (ތެލަސީމިއާ ބަލި ފަދަ) ބަލިތަކާއި، އެ ބައްޔެއްގެ ސަބަބުން ނުކުޅެދުންތެރިކަމެއް ކުރިމަތިވާ ބަލިތަކާއި، ނަންރިވަރސިބަލް ޕެތެލޮޖިކަލް އަލްޓަރޭޝަނެއްގެ ސަބަބުން ކުރިމަތިވާ ބައްޔާއި، ދިގުމުއްދަތަށް ސިއްޙީ ފަރުވާއާއި، ބެލެހެއްޓުން ބޭނުންވާ މީހުންނާއި، ފުރާނަ ސަލާމަތްކުރުމަށްޓަކައި ކޮންމެހެން ދޭންޖެހޭ ފަރުވާއާއި ނުލައި ނޫޅެވޭ މީހުންނެވެ.

ދިވެހި ސިވިލް ސަރވިސްގެ ޤަވައިދަށް ގެނައި އިސްލާހުގައިވަނީ، ޙާއްސައެހީއަށް ބޭނުންވާ މީހުންނަށް ޗުއްޓީ ހަމަޖެއްސުމާއި ގުޅޭ މުހިންމު އުސޫލުތަކެއް ވެސް ހިމަނާފައެވެ. އެގޮތުން ދިގުމުއްދަތަކަށް ބޭސްފަރުވާ ކުރަންޖެހޭ މުއައްޒަފަކަށް ސަލާމުގެ ޗުއްޓީގެ ގޮތުގައި އިތުރު 30 ދުވަސް ދެވިދާނެއެވެ. މީގެ އިތުރުން ބަލިޙާލަތު ހުރިގޮތުން ޚާއްސަ ޙާލަތެއް ދިމާވެފައިވާ މުވައްޒަފަކަށް ސަލާމުގެ ޗުއްޓީގެ އިތުރަށް، މުސާރަ ލިބޭ ގޮތަށް އަހަރަކު 60 ދުވަސް "ޚާއްސަ ސިއްޙީ ބޭނުންތަކަށް ދެވޭ ޗުއްޓީ"ގެ ގޮތުގައި ދެވޭގޮތަށްވެސް ވަނީ ކަނޑައަޅާފައެވެ. އަދި މުޢައްޒަފަކު މަސައްކަތްކުރާ ކޮންމެ އަހަރަކަށް، އެ އަހަރު ދުވަހުގެ ތެރޭގައި 15 ދުވަސް މެޑިކަލް ސެޓްފިކެޓް ހުށައެޅުމަކާއި ނުލައި ސަލާމުގެ ޗުއްޓީ ނެގިދާނެއެވެ.

ޚާއްސަ އެޙީއަށް ބޭނުންވާ މީހުންނާއި، ނުކުޅެދުންތެރިކަން ހުންނަ މީހުންނަށް ފަހި މާޙައުލެއް ޤާއިމުކުރުމަށް ސަރުކާރުންވެސްދަނީ އެކި ގޮތްގޮތުން މަސައްކަތްކުރަމުންނެވެ. ރާއްޖޭގެ މިހާތަނަށް އައިރު، ސިޔާސަތުތައް ކަނޑައަޅަމުން އައިސްފައިވަނީ ޚާއްސައެހީއަށް ބޭނުންވާ މީހުންނާއި، ނުކުޅެދުންތެރިކަން ހުންނަ މީހުންގެ ޙައްގުތަށް ފުރިހަމަށް ހާސިލްވާގޮތަށް ނޫންކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހުވެސްވަނީ ވިދާޅުވެފައެވެ.

ދިވެހިރާއްޖޭގެ އަޑުގެ "ބާއްޖަވެރި ހެނދުނެއް" ޕްރޮގްރާމްގައި ވާހަކަފުޅުދައްކަވަމުން ރަޢީސުލްޖުމްހޫރިއްޔާ ވިދާޅުވީ މި މުޅި ދާއިރާގެ ސިޔާސަތު ރޭވުމުގައި މީގެ ކުރިން އިހުމާލުވެފައިވީނަމަވެސް މި ސަރުކާރުން ކަންކަން ރާވާ ހިންގާނީ، މުޖުތަމަޢުގެ އެއްވެސް ބަޔަކު ބާކީ ނުވާނެހެންކަމަށެވެ.

"މިހާރުވެސް މިދަނީ ބަދަލުތައް ގެންނަމުން. ގިނަ ކަންކަން ބަދަލުކުރަންވެސް އެބަހުރި. އަޅުގަނޑުގެ އާއިލާގައިވެސް އެފަދަ ކުދިން އުޅޭތީ އެ އިޙުސާސުތައް އިނގޭ. ބޭނުންވާ އެހީތަށް ލިބޭނެ. ސިޔާސަތުތައް ބަދަލުވެގެންދާއިރު މި ދާއިރާއަށް ހެޔޮ ބަދަލު ގެންނާނަން." ރައީސުލްޖުމްހޫރިއްޔާ ވިދާޅުވިއެވެ.

ސިވްލް ސަރވިސްގެ ޤަވާއިދުގެ 6 ވަނަ މާއްދާއަށް ގެނައި އިސްލާހުގައިވަނީ މުސާރަ ނުލިބޭގޮތަށް މުޢައްޒަފުން ވީއްލޭނެ ގޮތްތަކަކަށްވެސް ރިއާޔަތްކޮށްފައެވެ. އެގޮތުން ބޭސްފަރުވާކުރަންޖެހޭ މުޢައްޒަފަކު މުސާރަ ނުލިބޭގޮތަށް ވީއްލާފައިވާނަމަ، އެ މުޢައްޒަފެއްގެ މަޤާމު ރިޒަރވް ކުރުމާއި ނުކުރުމާއިމެދު ގޮތެއް ނިންމަންވާނީ، މުސާރަ ނުލިބޭގޮތަށް ވީއްލާފައި ހުންނަތާ 1އަހަރާއި 6 މަހަށްވުރެ އިތުރުވާނަމަ ކަމަށްވެސް ވަނީ ބުނެފައެވެ.