ހިމާޔަތްކޮށްފައިވާ ދޫންޏަކަށް އަނިޔާވެގެން، ޙާލު ރަނގަޅުވަންދެން އެ ދޫނި ބެލެހެއްޓުމުގެ ހުއްދަ އީޕީއޭއިން މީހަކަށް ދީފިއެވެ.
އެންވަޔަރަމަންޓަލް ޕްރޮޓެކްޝަން އެޖެންސީން ހުއްދަ ދީފައިވަނީ ފިޔަގަނޑަށް އަނިޔާވެފައިވާ ކުރަނގިއެއް ވަގުތީގޮތުން ބެލެހެއްޓުމަށެވެ. ކުރަނގިއަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނުނުން ޙިމާޔަތްކޮށްފައިވާ ދޫންޏެކެވެ.
އީޕީއޭއިން ބުނެފައިވަނީ އަނިޔާއިން ރަނގަޅުވަންދެން އެ ދޫނި ބެލެހެއްޓުމަށް އަމިއްލައަށް އެދިފައިވަނީ އަޙުމަދު އައްޒާމް ނާފިޒް ކިޔާ މީހެއްކަމަށެވެ. އައްޒާމް ނާފިޒްއަށް އީޕީއޭއިން ދީފައިވަނީ ދޫނި ބެލެހެއްޓުމުގެ ވަގުތީ ހުއްދައެކެވެ. ދޫނި ބެލެހެއްޓުމުގެ ހުއްދަ ދީފައިވަނީ ދޫނި އަމިއްލައަށް އުޅުމުގެ ޤާބިލުކަން ލިބެންދެންނެވެ.
ދޫނީގެ ޙާލު ރަނގަޅުވެ، އެކަނި އުޅެވޭވެރުވުމުން، ވެޓެރިނަރީ ޑޮކްޓަރުގެ ލަފަޔާއިއެކު ދޫނީގެ ޤުދުރަތީ މާޙައުލަށް ލަސްވުމެއްނެތި ދޫކުރުމަށާއި، އެކަން އީޕީއޭއަށް އެންގުމަށްވެސް ވަނީ އެދިފައެވެ.
Thanks @EPAMaldives! ? pic.twitter.com/FJwqKZyUmF
— ?? (@iamazzamnafiz) December 30, 2020
ތިމާވެށި ޙިމާޔަތްކޮށް ދެމެހެއްޓުމުގެ މަސައްކަތުގައި މިފަދަ ފަރާތްތަކުން ލިބެމުންދާ އެއްބާރުލުން ފާހަގަކޮށް އީޕީއޭއިން ވަނީ ޝުކުރުއަދާކޮށްފައެވެ.
ކުރަނގި ދޫންޏަކީ އައިންމަތީ ދޫންޏެކެވެ. މި ދޫނި އާއްމުކޮށް އުޅެނީ ފިނޮޅުތަކުގައާއި ގޮންޑުދޮށްތަކުގައެވެ.