ސިޔާސީ ޕާޓީތަކަށް 11 މިލިއަނަށްވުރެ ގިނަ ރުފިޔާ އިލެކްޝަންސް ކޮމިޝަނުން ދޫކޮށްފިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ، ސިޔާސީ ޕާޓީތަކަށް ފައިސާ ދޫކުރަނީ އެކި ފިޔަވަހިތަކަށް ބަހާލައިގެންކަމަށެވެ. މިގޮތުން މިއަހަރު ކުރީކޮޅު ޕާޓީތަކަށް ފައިސާ ދޫކޮށްފައިވާއިރު، މިދިޔަ ބުރާސްފަތި ދުވަހުވެސް ޕާޓީތަަކަށް ފައިސާ ދޫކޮށްފައިވާކަމަށެވެ. އެގޮތުން މިދިޔަ ބުރާސްފަތި ދުވަހު ތިން ޕާޓީއަކަށް ފައިސާ ދޫކޮށްފައިވާކަމަށް ޝަރީފް ވިދާޅުވިއެވެ.
ޕާޓީތަކަށް ފައިސާ ދޫކުރި އަދަދުތައް
1- އެމްޑީޕީއަށް 5.8 މިލިއަން ރުފިޔާ
2- ޕީޕީއެމްއަށް 3.9 މިލިއަން ރުފިޔާ
3- ޖުމްހޫރީ ޕާޓީއަށް 1.3 މިލިއަން ރުފިޔާ
ޝަރީފް ވިދާޅުވީ، މިއަހަރުގެ ބަޖެޓުން ސިޔާސީ ޕާޓީތަކަށް ދޭންޖެހޭ ފައިސާގެ ދެބައިކުޅަ އެއްބައި އަދިވެސް ދޫކުރެވިފައިނުވާކަމަށެވެ. އަދި ފިނޭންސް މިނިސްޓްރީން ފައިސާ ދޫކުރާ މިންވަރަކުން ޕާޓީތަކަށް ފައިސާ ދޫކުރަމުން ގެންދާނެކަމަށް ޝަރީފް ވިދާޅުވިއެވެ. ސިޔާސީ ޕާޓީތަކަށް ފައިސާ ލިބުމުގައި ދަތިތައް ދިމާވަނީ މި އަހަރު ދައުލަތުގެ ބަޖެޓުގައި ދަތިތަކެއް ހުރެގެން ކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް ވަނީ ވިދާޅުވެފައެވެ.
ސިޔާސީ ޕާޓީތަކުގެ ޤާނޫނުގައި ބުނެފައިވަނީ ސިޔާސީ ޕާޓީ ހިންގުމަށް ދައުލަތުގެ ބަޖެޓުން ދޭ ފައިސާއަކީ ދައުލަތުގެ އަހަރީ ބަޖެޓްގެ 1.0 އިންސައްތައާއި %0.2 އިންސައްތައާ ދެމެދުގެ ޢަދަދަކަށް ވާންޖެހޭނެއެވެ. މި އަހަރު ދައުލަތުގެ ބަޖެޓްގެ ގޮތުގައި ކަނޑައަޅާފައިވާ 37 ބިލިއަން ރުފިޔާގެ ތެރެއިން ސިޔާސީ ޕާޓީތަކަށް ދޫކުރުމަށް ކަނޑައަޅާފައިވަނީ 33.4 މިލިއަން ރުފިޔާއެވެ.
ޤާނޫނުގައި ބުނެފައިވަނީ ރާއްޖޭގައި ހިންގާ ސިޔާސީ ޕާޓީތަކުގެ ތެރެއިން، ދައުލަތުގެ ބަޖެޓުން ފައިސާ ދޫކުރަން ވާނީ 10 ހާސް މެންބަރުން ހަމަވާ ޕާޓީތަކަށް އެކަނިކަމަށެވެ. އެގޮތުން އިލެކްޝަންސް ކޮމިޝަންގެ ދަފްތަރުގައި 10 ސިޔާސީ ޕާޓީއެއް ރަޖިސްޓްރީކޮށްފައިވާއިރު، 10،000 މެންބަރުން ހަމަވަނީ 3 ޕާޓީއެއްގައެވެ. އެއީ ވެރިކަންކުރާ މައި ޕާޓީ (އެމްޑީޕީ)އާއި، އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ޖުމްހޫރީ ޕާޓީއެވެ.