ކޯވިޑް-19ގެ ބަލިމަޑުކަމުގެ މިޙާލަތަށް ބަލާއިރު ޤައުމު މިވަނީ ކޮރަޕްޝަންގެ އަމަލުތަކުގެ ސަބަބުން ދައުލަތުން ގެއްލުނު ފައިސާއަށް ވަރަށް ބޮޑަށް ބޭނުންޖެހިފައިކަމަށް އޭސީސީގެ ރައީސާ މަރްޔަމް ޝިއުނާ ވިދާޅުވެއްޖެއެވެ.
ބައިނަލްއަޤްވާމީ އެންޓި-ކޮރަޕްޝަން ދުވަހާއި ގުޅިގެން އޭސީސީގެ ރައީސާ މަރްޔަމް ޝިއުނާ ދެއްވި ޚިޠާބުގައި ކޮރަޕްޝަންގެ އަމަލުތަކުގެ ސަބަބުން ދައުލަތަށް ގެއްލުނު ފައިސާ ހޯދަންޖެހިފައިވާއިރު، އެފައިސާތައް ހޯދުމަށް ގިނަ މަސައްކަތްތަކެއް އޭސީސީން ކުރަމުންގެންދަވާކަމަށެވެ.
އޭސީސީގެ ރައީސާ މަރްޔަމް ޝިއުނާ ދެއްވި ޚިޠާބުގައި ވިދާޅުވީ ކޮރަޕްޝަނުގެ ސަބަބުން ގެއްލިފައިވާ އަދި ގެއްލެމުންދާ ފައިސާ އަކީ މިފަދަ ބަލިމަޑުކަމެއް އޮތް ޙާލަތެއްގައި، އެކަށީގެންވާ ސިއްހީ ނިޒާމެއް ޤާއިމްނުކުރެވި، އެކަށީގެންވާ ސިއްހީ ޚިދުމަތެއް ނުލިބި އެތައް ރައްޔިތުންނެއްގެ ފުރާނަ ގެއްލެމުންދާ މައިގަނޑު އެއް ސަބަބުކަމަށެވެ. މިފަދަ ޙާލަތަކުން އަރައިގަތުމަށްޓަކައި ނަޒާހަތްތެރިކަން އިސްކޮށް، ކޮރަޕްޝަނާ ދެކޮޅަށް އަޑުއުފުލާ، ކޮރަޕްޝަން ހުއްޓުވުމަށްޓަކާ ނިޒާމީ ބަދަލުތަކެއް ގެންނަންޖެހޭކަން ޝިއުނާ ފާހަގަކުރެއްވިއެވެ.
ޝިއުނާ ވިދާޅުވީ ކޮރަޕްޝަނުގެ ޢަމަލުތަކުގެ ސަބަބުން ޤައުމު ތަރައްޤީކުރުމަށާއި ރައްޔިތުންނަށް ބޭނުންވާ އަސާސީ ޚިދުމަތްތައް ފޯރުކޮށްދިނުމަށް ހުރަސްއެޅޭއިރު، އެކަމުގެ ސަބަބުން އެތައް ފައިސާއެއް ދައުލަތަށް ގެއްލިގެންދާކަމަށެވެ. އަދި މިއަދުގެ ޙާލަތަށް ބަލާއިރު ޤައުމު މިވަނީ ގެއްލިގެން ގޮސްފައިވާ ފައިސާއަށް ނުހަނު ބޭނުންޖެހިފައިކަމަށް ޝިއުނާ ވިދާޅުވިއެވެ.
"އިޤުތިޞާދު ހަމަމަގަށް ވުމަށާއި، ރައްޔިތުންގެ ފުރާނަ ސަލާމަތްކުރުމަށާއި، ރައްޔިތުންނަށް ބޭނުންވާ އަސާސީ ޚިދުމަތްތައް ދިނުން ފަދަ މުހިންމު އެތައްކަމަކަށް ބޮޑެތި އިންވެސްޓްމަންޓްތަކެއް ކުރަންޖެހިފައިވާ މިފަދަ ދަނޑިވަޅެއްގައި، ތަފާތު އެކި ނަންނަމުގައި ދުރާލާ ރޭވިގެން ހިންގާފައިވާ ކޮރަޕްޝަނުގެ ޢަމަލުތަކުގެ ސަބަބުން އެތައް ފައިސާއެއް ގެއްލިގެން ގޮސްފައިވާކަމާމެދު މިއަދު ވިސްނާ ފިކުރުކުރަންޖެހޭ" ޝިއުނާ ވިދާޅުވިއެވެ.
ޝިއުނާ ވިދާޅުވީ ދުނިޔޭގައި ބޮޑު ބަލިމަޑުކަމެއް ފެތުރިގެންދާއިރު، އެކަމަށް ބޮޑެތި ހޭދަތަކެއް ކުރަންޖެހޭ މިދުވަސްވަރުވެސް އެއްވެސް އިންސާނިއްޔަތު ކަމެއްނެތި ރައްޔިތުންގެ މުދަލާއި ފައިސާ ނަހަމަ ގޮތުގައި ބޭނުން ކުރަން ބައެއް ފަރާތްތަކުން ފަސްނުޖެހޭކަމަށެވެ. އަދި ކޯވިޑްގެ ބަލިމަޑުކަމުން އަރައިގަތުމަށްޓަކައި ސިއްހީ ދާއިރާއަށް ބިލިއަނުން އިވެސްޓްމަންޓްތައް ކުރަމުންގެންދާއިރު، އިމަރޖެންސީ ޕްރޮކިއުމެންޓް މަރުޙަލާއެއް ކުރިމަތިވުމަކީ ކޮރަޕްޝަނަށް ހުޅުވިގެންދާ އިތުރު ފުރުޞަތެއްކަމުގައި ދެކެވަޑައިގަންނަވާކަމަށްވެސް ޝިއުނާ ވިދާޅުވިއެވެ. އެގޮތުން މި ބަލިމަޑުކަމުގެ ދުވަސްވަރާއި ގުޅިގެން ދައުލަތުގެ އެކި އިދާރާތަކުން ޚިދުމަތާއި ތަކެތި ހޯދުމުގައި ކޮރަޕްޝަނަށް މަގުފަހިވާގޮތަށް އަމަލުކޮށްފައިވާ ކަމަށް ތުހުމަތުކޮށް 34 ޝަކުވާއެއް އޭސީސީއަށް ހުށައަޅާފައިވާކަމަށްވެސް ޝިއުނާ ވިދާޅުވިއެވެ.
"އޭސީސީގެ އަމާޒަކީ، ރައްޔިތުންގެ ފައިސާއިން ނާޖާއިޒު މަންފާ ހޯދާ ފަރާތްތަކާމެދު މަޤާމަށް ނުވަތަ ނިސްބަތްވާ ޕާޓީއަށް ބެލުމެއްނެތި ރައްޔިތުންގެ ކުރިމަތީގައި ޖަވާބުދާރީ ކުރުވައި ޤާނޫނީ އޮނިގަނޑުގެ ތެރެއިންފިޔަވަޅު އެޅުން. މިކަންކަން ކުރިއަށްދިއުމުގެ ހިތްވަރު ލިބިގެންދާނީ ރައްޔިތުންގެ ފަރާތުން ލިބިގެންދާ އެހީތެރިކަމާއި އެއްބާރުލުމުގެ ސަބަބުން" ޝިއުނާ ވިދާޅުވިއެވެ.
ބައިނަލްއަޤްވާމީ އެންޓި-ކޮރަޕްޝަން ދުވަސް މިއަދު ފާހަގަކުރަމުންދާއިރު، މިއަހަރުގެ ޝިޢާރަކީ "ބަލިމަޑުކަމުން އަރައިގަތުން - ނަޒާހަތްތެރިކަމާއެކު“އެވެ.