ބޭސްފަރުވާއަށް ވަޑައިގެންނެވުމުގެ ބަދަލުގައި ރައީސް ޔާމީން އެދިވަޑައިގަންނަވަނީ ގެކޮޅަށް ބަދަލުވާން: މިނިސްޓަރ އިމްރާން
ރައީސް ޔާމީން ރާއްޖެއިން ބޭރުން ހައްދަވަންޖެހޭ ޓެސްޓެއް ހެދުމަށް ބޭރަށް ދިއުމަށް ފުރުޞަތު ދެއްވިކަމަށާއި، ނަމަވެސް އެމަނިކުފާނު އެކަން ބޭނުންފުޅުނުވެ އެދިވަޑައިގަންނަވަނީ ގެއަށް ބަދަލުވެވަޑައިގަންނަވަން ކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވެއްޖެއެވެ.
ދިވެހިރާއްޖޭގެ އަޑުން ގެނެސްދޭ "އަހާށޭ ބުނާނަން" ޕްރޮގްރާމްގައި އެހުންތެރިއަކު ވަނީ ރައީސް ޔާމީން ގެއަށް ބަދަލުނުކޮށް ޖަލުގައި ބެހެއްޓުމަކީ އިންސާފެއްތޯ އާއި ގެއަށް ބަދަލުކުރުމަށް ފުރުޞަތު ދެއްވަފާނަންތޯ މިނިސްޓަރ އިމްރާނާއި ސުވާލުކުރައްވާފައެވެ. އެސުވާލަށް ޖަވާބު ދެއްވަމުން ހޯމް މިނިސްޓަރ އިމްރާން ވިދާޅުވީ، ރައީސް ޔާމީންގެ ބަލި ޙާލަތާއި ގުޅޭގޮތުން ޑޮކްޓަރުން ދެއްވާފައިވާ ލިޔުމެއް ވާކަމަށެވެ. އެލިޔުމުގައި ލަފާދެއްވާފައި ވަނީ ރާއްޖެއިން ބޭރުން ޓެސްޓެއް ހެއްދެވުމަށާއި، "ސްޓްރެސް" ފްރީ މާހައުލެއްގައި ބެހެއްޓެވުމަށް ކަމަށެވެ. އެމައްސަލައާއި ގުޅިގެން ޚުދު މިނިސްޓަރ އިމްރާން ރައީސް ޔާމީނާއި ބައްދަލުކުރައްވައި، ރާއްޖެއިން ބޭރަށް ބޭސްފަރުވާއަށް ވަޑައިގަތުމަށް ފުރުޞަތު އޮތްކަމުގައި ދެންނެވިކަށް މިނިސްޓަރ އިމްރާން ވިދާޅުވިއެވެ. އަދި ބޭނުންފުޅު ޤައުމަކަށް މިސަރަހައްދުން ވަޑައިގަތުމަށްވެސް ފުރުޞަތު ދެއްވިކަމަށް މިނިސްޓަރ ވިދާޅުވިއެވެ. ނަމަވެސް ރައީސް ޔާމީން ރާއްޖެއިން ބޭރަށް ޓެސްޓް ހެއްދެވުމަށް ވަޑައިގަތުމަށް ދެކޮޅު ހައްދަވާކަމަށާއި، އެމަނިކުފާނު ބޭނުންފުޅުވަނީ ގެކޮޅަށް ބަދަލުވާންކަމަށްވެސް މިނިސްޓަރ އިމްރާން ވިދާޅުވިއެވެ.
"އަޅުގަނޑު ދެންނެވިން އެހެންވީމަ އެޓެސްޓްތައް ހަދަން ވަޑައިގަންނަވަން ބޭނުންފުޅުވަނީ ކޮން ޤައުމަކަށްތޯ މިރީޖަންގެ ތެރެއިން. ވިދާޅުވީ ބޭރަށް ވަޑައިނުގަންނަވާނަމޭ. ދެން ރާއްޖޭގަ އެޓެސްޓް ހެދޭކަށް ނެތް. ބޭރަށް ވަޑައިނުގަންނަވާނަމޭ ގެއަށް ގެންގޮސްދޭށޭ. އަޅުގަނޑު ދެންނެވިން ޑޮކްޓަރު ވިދާޅުވެފައި މިއޮތީ އެޓެސްޓު ނުހެދޭތީ އެޓެސްޓް ހެއްދެވުމަށޭ. އޭގެފަހުންނޭ ޑޮކްޓަރަށް ވަކި ސީދާ އެއްޗެއް ދަންނަވަން އެނގޭނީ. އޭގެ ދެވަނަ ބައޭ ސްޓްރެސް ފްރީ މާހައުލެއްގައި ބެހެއްޓުން. ފުރަތަމަ ބައި ފުރިހަމަކޮށްފައިނޫންތޯއޭ ދެވަނަ ބައި ފުރިހަމަކުރަންވާނީ." ހޯމް މިނިސްޓަރ އިމްރާން ޢަބްދުﷲ ވިދާޅުވިއެވެ.
ހޯމް މިނިސްޓަރ އިމްރާން ވިދާޅުވީ ރައީސް ޔާމީން ހުންނެވި ތަނަކީ ރަނގަޅު ފެންވަރުގެ ގިނަ ޚިދުމަތްތަކެއް ލިބިވަޑައިގަންނަވާނެ ތަނެއްކަމަށެވެ. ރައީސް ޔާމީން ހުންނަވާތަން މިނިސްޓަރ އިމްރާން ސިފަކުރެއްވީ ރަނގަޅު ފެންވަރެއްގެ އެޕާޓްމަންޓެއްގެ ގޮތުގައެވެ.
"ރައީސް ޔާމީން އެހުންނެވި މާހައުލަކީ ދެން ޖަލެއްގެ ތެރޭގައި ވަކި އެއަށްވުރެ ރަނގަޅުތަކެއް ޤާއިމްކުރެވޭނޭ އަޅުގަނޑަކަށް ދަންނަވާކަށް ނުކެރޭނެ އިނގޭތޯ. ޖަލެއްގެ ތެރޭގައި. އަޅުގަނޑުމެން ތިބިއިރު ތިބިގޮތާ ތިބިހާލާ ރައީސް ޔާމީން އެހުންނެވި ހާލަތާ ގޮތްކޮޅު އެނގިވަޑައިގަންވާ ބޭފުޅުންނަށް އެނގޭނެ އަޅުގަނޑު މިދަންނަވަނީ ކޮން ވާހަކައެއްކަން. ހޫނު ފެނުން ފެންވެރޭގޮތަށް އަޅުގަނޑު ބަހައްޓާފައި ހުންނާނީ. އަނެއްހެން ބަލާނަމަ މުހިންމު ވާހަކައެއް މިއީ. އަޅުގަނޑުމެން ތިބެންޖެހުނުގޮތާ ހާލަތުގެ ގޮތުން ފިނި ބޮޑުވެގެން ގޮސް ފިނި ގަދަވާ ދުވަސްވަރެއްގަ ރޯގާ ޖެހިގެން ގޮސް ސަލާމަތްނުވެގެން އުޅޭންޖެހުނު ޙާލަތާ އިނގޭތޯ. ވަރަށް ތަފާތުވާނެ."
މިނިސްޓަރ އިމްރާން ވިދާޅުވީ ރައީސް ޔާމީންގެ ބޭސްފަރުވާއަށް ހައްދަވަންޖެހޭ ޓެސްޓް ހެއްދެވުމަށް ބޭރަށް ވަޑައިގަތުމުގެ ކަންކަމުގައި އެމަނިކުފާނު ނިސްބަތްވެވަޑައިގަންނަވާ ޕާޓީގެ އިސް ބޭފުޅުންނާވެސް މަޝްވަރަކުރެއްވިކަމަށެވެ. މިނިސްޓަރ ވިދާޅުވީ ރައީސް ޔާމީން ބޭރަށް ވަޑައިގަތުމަށްފަހު ޓެސްޓް ހައްދަވާ ނިންމަވައި އޭގެ މައްޗަށް ބިނާކޮށް ޖަލުގައި ބެހެއްޓުން އެއީ ކަމުނުދާ މާހައުލެއްކަމަށް ޑޮކްޓަރުން ވިދާޅުވެއްޖެނަމަ އެއާއެއްގޮތަށް އަމަލުކުރައްވާނެކަމަށެވެ. މިނިސްޓަރ ވިދާޅުވީ ރައީސް ޔަމީނަށް އިއްވާފައިވާ ޖަލު ހުކުމް ތަންފިޒްކުރުމަށް އިޖްރާއަތްތަކެއް އެބަހުރިކަމަށާއި އެ އިޖްރާއަތްތަކުގެ ތެރެއިން ގެއަށް ގެންދަން ޖެހިއްޖެނަމަ އެކަންވެސް ކުރައްވާނެކަމަށެވެ. އެކަމަށް ރައީސް ޔާމިން މަގުފަހިކޮށްދެއްވަންޖެހޭކަމަށްވެސް ހޯމް މިނިސްޓަރ ވިދާޅުވިއެވެ.
މިނިސްޓަރ ވަނީ މީގެ ކުރިން އަޙްމަދު އަދީބަށްވެސް ރާއްޖެއިން ބޭރުން ބޭސްފަރުވާއަށް ވަޑައިގަތުމުގެ ފުރުޞަތު ދެއްވިކަންވެސް ފާހަގަކުރައްވާފައެވެ.
އެމްއެމްޕީއާރުސީގެ ޚިޔާނާތާއި ގުޅިގެން ރައީސް ޔާމީންގެ މައްޗަށް އުފުލި މަނީލޯންޑަރިންގެ ކުށް ސާބިތުވެ އެމަނިކުފާނު ގެންދަވަނީ 5 އަހަރުގެ ޖަލު ހުކުމެއް ތަންފިޒްކުރަމުންނެވެ.