އިތުރު އެއްއަހަރަށް ދަ ގްރާންޑޭގައި މަޑުކުރުމަށް ކޯޗު އިސްމާއިލް މަހްފޫޒް ( އިންމަ ) ނިންމައިފިއެވެ.
އެކުލަބުން ވެސް ވަނީ އަންނަ ސީޒަނުގެ ނިޔަލަށް ކުލަބާއެކު މަޑުކުރުމަށް އިންމައާ އެކު އެއްބަސްވުމަކަށް އާދެވުނު ކަމަށް ހާމަކޮއްފައެވެ. މިދިޔަ ސީޒަންގައި އަލަށް ފުރަތަމަ ޑިވިޝަންގައި ވާދަކުރަންފެށި ދަގްރާންޑޭއާ އެކު ހޭދަ ކުރި ފުރަތަމަ ސީޒަންގައި އިންމަ ވަނީ ރަނގަޅު ނަތީޖާ ތަކެއް ހޯދައިދީފައެވެ. އެގޮތުން އެޓީމުން ލީގު ނިންމާލީ އިންމަގެ އިރުޝާދާއެކު ފަސްވަނައިގައެވެ.
ލީގު ކުޅުނު ފުރަތަމަ މެޗުތަކުގައި ނަތީޖާ ރަނގަޅުވި ނަމަވެސް ތަފާތު މައްސަލަތައް ދިމވެ ލީގުގެ ފަހުކުޅުނު އެހާ ރަނގަޅު ކުޅުމެއް އެޓީމަށް ދެއްކިފައެއް ނުވެއެވެ.
އިންމަ ކޯޗިން ކެރިއަރު ފަށާފަވަނީ 2006 ވަނަ އަހަރު މާޒިޔާއިންނެވެ. އަދި އޭގެ އިތުރުން ގައުމީ ފުޓްބޯޅަ ޓީމުގެ އެސްޓެންޓް ކޯޗުކަމާއި ހެޑް ކޯޗެއްގެ ގޮތުގައި ހަރަކާތްތެރިވެފައިވެއެވެ. އޭނާ ވަނީ ދެފަހަރެއްގެ މަތިން މާޒިޔާއަށް ކޯޗުކޮއްދީފައެވެ. އަދި އެކުލަބާއެކު އެފްއޭކަޕް ފުޓްބޯޅަ މުބާރާތް ވެސް ކާމިޔާބުކޮއްދީފައެވެ.