ރާއްޖޭގައި ޤަވާޢިދާ ޚިލާފަށް އުޅެމުންދިޔަ ބަނގްލަދޭޝަންގެ 68 މީހަކު އަނބުރާ ޤައުމަށް ފޮނުވާލައިފިއެވެ. އެމީހުން ޤައުމަށް އަނބުރާ ފޮނުވާލަފައިވަނީ ބަނގްލަދޭޝައާއި ނޭޕާލްގައި ދިރިއުޅޭ ދިވެހިން ގޮވައިގެން ރާއްޖެއައި ބަނގްލަދޭޝްގެ އަސްކަރީ މަތިންދާބޯޓެއްގައެވެ.
މިއީ ރާއްޖޭގައި ޤަވާއިދާއި ޚިލާފަށް އުޅެމުންދާ ފަރާތްތައް އަނބުރާ އެމީހުންގެ ޤައުމަށް ފޮނުވާލުމަށް ސަރުކާރުން ފަށާފައިވާ މަސައްކަތުގެތެރެއިން ކުރިކަމެއްކަމަށް ފޮރިން މިނިސްޓްރީން ވިދާޅުވެއެވެ.
މިމަސައްކަތް ފަށާފައިވަނީ ޤަވާޢިދާ ޚިލާފަށް އުޅެމުންދާ ބިދޭސީންގެ އަސާސީ އެތައް ހައްޤެއް ގެއްލި، އެމީހުންނަށް އެކި ބާވަތުގެ އަނިޔާތައް ލިބެމުންދިޔުމާ ގުޅިގެން، އެމީހުންގެ ހައްޤުތައް ޙިމާޔަތްކޮށް ކަށަވަރުކޮށްދިނުމަށެވެ. މީގެ ތެރޭގައި ޤައުމަށް އަނބުރާ ދާން ބޭނުންވިނަމަވެސް، ދެވޭނެ މަގެއް ނެތް ބައެއް ބިދޭސީންވެސް ތިބުމާއެކު، ސަރުކާރުން މަސައްކަތްކުރަމުންދަނީ ބަންގްލަދޭޝްގެ ސަރުކާރާ ގުޅިގެން ވީހާވެސް އަވަސް ފުރުސަތެއްގައި އެފަރާތްތަކަށް އަނބުރާ ޤައުމަށް، އާއިލާ ކައިރިއަށް ދެވޭނެ މަގު ފަހިކުރުމަށެވެ.
ނޭޝަނަލް އެމެޖެންސީ އޮޕަރޭޝަން ސެންޓަރުން ވަނީ ބަނގްލަދޭޝްއަށް ފޮނުވާ އެންމެންވެސް އެޤައުމަށް އަނބުރާ ފޮނުވާނީ ކޯވިޑް-19 އަށް ޓެސްޓްކުރުމަށްފަހުކަމަށް ވިދާޅުވެފައެވެ.