ވިޔަފާރިތަކަށް ޚާއްސަކޮށްގެން ބާއްވާ ބިޒްނަސް އެކްސްޕޯ 2020 ދަރުބާރުގޭގައި ފަށައިފިއެވެ.
އޯރކާ މީޑިއާ ގްރޫޕުން އިންތިޒާމްކޮށްގެން ބާއްވާ މި އެކްސްޕޯގައި މިއަހަރު 60 އަށްވުރެ ގިނަ ވިޔަފާރިތަކުން ދަނީ ބައިވެރިވަމުންނެވެ.
އޯރކާ މީޑިއާ ގްރޫޕުން އިންތިޒާމް ކޮށްގެން ބާއްވާ ކޯޕަރޭޓް މޯލްޑިވްސް ބިޒްނަސް އެކްސްޕޯއަކީ ރާއްޖޭގެ ހުރިހާ ދާއިރާއެއްގައި މަސައްކަތް ކުރާ ވިޔަފާރިވެރިންނަށް ހާޢްސަކޮށްގެން ފެބްރުއަރީ 23 އިން 24 އަށް ކުރިޔަށް ގެންދާ އެކްސްޕޯއެކެވެ.
އޯކާ މީޑިއާ ގްރޫޕްގެ މެނޭޖަރ، އަހުމަދު ނާސިރު ވިދާޅުވީ މިއީ ބޮޑެތި ވިޔަފާރިތަކާއި، ކުދި އަދި މެދު ފަންތީގެ ވިޔަފާރިތަކަށް، ވިޔަފާރި ކުރިއެރުވުމަށްޓަކައި ގުޅުން ބަދަހިކުރަންޖެހޭ ފަރާތްތަކާ ގުޅުން ބަދަހިކޮށް، ފޯރުކޮށްދޭ ހިދުމަތްތަކާއި އުފެއްދުންތައް އާންމުންނަށް ދައްކައިލުމުގެ ފުރުސަތު ހޯދައިދިނުމުގެ ގޮތުން ބާއްވާ އެކްސްޕޯއެއްކަމަށެވެ.
"އެކްސްޕޯގެ ބޭނުމަކީ އެހެން އެކްސްޕޯތަކާ ހިލާފަށް ހުރިހާ ދާއިރާއެއް އެއްފުރާޅެއްގެ ދަށަށް ގެނައުން. މިގޮތުން މިއެކްސްޕޯއަށް ބޮޑު ތަރުހީބެއް އެކި ދާއިރާގެ ވިޔަފާރިތަކުން ލިބުނު. އެޑިއުކޭޝަން، ހޮސްޕިޓާލިޓީ، ރީޓެއިލް، ހޯލްސޭލް، ސަރުކާރު އަދި އަމިއްލަ ގިނަ ކުންގުނިތަކުން މީގައި ބައިވެރިވޭ. މިއީ ރަގަނޅު ފުރުސަތެއް ވިޔަފާރި ފުޅާ ކުރަން އެކި އެހެން ވިޔަފާރިތަކާ ބައްދަލުކޮށްލަން. ބޮޑު ތަރުހީބެއްލިބުނު މިފަހަރުގެ އެކްސްޕޯއަށްވެސް." ނާސިރު ވިދާޅުވިއެވެ.
މިއަހަރު އެކްސްޕޯގައި ވިޔަފާރީގެ ދާއިރާގެ 60 އަށް ވުރެ ގިނަ ވިޔަފާރިތައް އެގްޒިބިޓަރުން ބައިވެރިވެއެވެ. އަދި އެކްސްޕޯގެ ތެރެއިން ވިޔަފާރިއާ ގުޅުން ހުރި ހަތަރު ސަމިޓެއް ބޭއްވުމަށް ވަނީ ހަމަޖެހިފައިވެއެވެ. މިގޮތުން ވިޔަފާރިވެރިންނަށް ހާއްސަ ސަމިޓަކާއި އަންހެނުންނަށް ހާއްސަ ސަމިޓެއްގެ އިތުރުން މޯލްޑިވްސް ޓޫރިޒަމް ޕްރޮފެޝަނަލް ސަމިޓާއި މޯލްޑިވްސް ފައިނޭންސް ޕްރޮފެޝަނަލް ސަމިޓް މި އެކްސްޕޯގެ ތެރެއިން ކުރިއަށްދާނެއެވެ.
މިއަހަރުގެ އެކްސްޕޯގައި ރާއްޖޭގެ ބޮޑެތި ވިޔަފާރިތަކާއި ކުދި ވިޔަފާރިތަކުން ބައިވެރިވަމުންދާއިރު، ފެއަރގެ ތެރެއިން އެފަރާތްތަކުގެ ހިދުމަތްތަކާއި އުފެއްދުންތައް ދައްކާލާނެއެވެ. އަދި މިއީ އެހެން ވިޔަފާރިތަކާ ގުޅުން ބަދަހިކޮށް، ވިޔަފާރިތައް ފުޅާ ކުރަން ލިބޭ ފުރުސަތެއްގެ ގޮތުގައި ބައިވެރިން ސިފަކުރެއެވެ.
އޯކާ މީޑިއާއިން ބުނީ މިއަހަރު އެކްސްޕޯއަށް 3000 އަށްވުރެ ގިނަ މީހުން ޒިޔާރަތްކުރާނެކަމަށް ލަފާކުރެވޭކަމަށެވެ. އެކްސްޕޯ ކޮންމެ ދުވަހަކު މެންދުރު 1:30 އިން ފެށިގެން ރޭގަނޑު 11:30 ގެ ނިޔަލަށް ކުރިޔަށް ދާނެއެވެ. މިއީ މި އެކްސްޕޯ ބާއްވާ 2 ވަނަ އަހަރެވެ.