ޓާކިޝް އެއަރލައިންސްއިން މިއަހަރުގެ ޓްރެވަލް ޓްރޭޑް ޝޯވތަކަށް ހާއްސަކޮށް ހެޔޮ އަގުގައި ދަތުރުކުރެވޭ ޕްރޮމޯޝަނެއް ފަށައިފިއެވެ.
ރާއްޖޭގައި ޓަރކިޝް އެއަރލައިންސްގެ ޖެނެރަލް ސޭލްސް އެޖެންޓު އެކްސްޕަޑައިޓް މޯލްޑިވްސްއިން ބުނީ މި ޕްރޮމޯޝަނުގެ ތެރެއިން މިއަހަރު ދުނިޔޭގެ އެކި ކަންކޮޅުތަކުގައި އޮންނަ ޓްރެވަލް ޓްރޭޑް ފެއަރތަކުގެ ތެރެއިން ޓާރކިޝް އެއަރލައިންސްއިން ދަތުރުކުރާ މަންޒިލްތަކުގައި ހަރަކާތްތައް ބާއްވާ ދުވަސްތަކާ ދިމާކޮށް ހާއްސަ ޑިސްކައުންޓްތަކެއް ދިނުމަށްވަނީ ހަމަޖެހިފައެވެ.
މިގޮތުން ތުރުކީގެ އިސްތަންބުލްގައި ބާއްވާ އީސްޓް މެޑިޓަރޭނިއަން އިންޓަރނޭޝަނަލް ޓުއަރިޒަމް އެންޑް އެގްޒިބިޝަން ފެއަރއަށް ހާއްސަކޮށް މިޕްރޮމޯޝަންގެ ދަށުން ދެކޮޅު ޓިކެޓް 999 ޑޮލަރަށް ދިނުމަށް ވަނީ ހަމަޖެހިފައެވެ. އަދި މެޑްރިޑްގައި ބޭއްވި ފިތޫރު ފެއަރގައި ބައިވެރިވުމަށް ދަތުރުކުރި މީހުންނަށްވެސް ވަނީ 1001 ޑޮލަރުގެ ޕްރޮމޯޝަން އަގުގައި ޓިކެޓު ވިއްކާފައެވެ.
އެކްސްޕަޑައިޓް މޯލްޑިވްސް އިން ބުނީ މިމަހުގެ ފަހުކޮޅު ސުވިޓްޒަލޭންޑުގައި އޮންނަ ފެސްޕޯ 2020 ފެއަރއަށް ދާން ބޭނުންވާ ފަރާތްތަކަށްވެސް ހާއްސަ އަގުތަކެއް ކަޑައަޅާފައިވާކަމަށެވެ. މިގޮތުން މިފެއަރއާގެ ދުވަސްވަރު ރާއްޖެއިން ސުވިޓްޒަލޭންޑަށް ދަތުރުކުރާ ފަރާތްތަކަށް 942 ޑޮލަރަށް ދެކޮޅު ޓިކެޓު ވިއްކާނެކަމަށެވެ.
ކުރިއަށްއޮތް މަހު މޮސްކޯގައި އޮންނަ ޑައިވް ޝޯވއަށް ހާއްސަކޮށް ޓާރކިޝް އެއަރލައިންސްގެ ފެއަރގެ ތެރެއިން ދެކޮޅު ޓިކެޓަށް ނަގާނީ 1040 ޑޮލަރުކަމަށްވެސް އެ އެއަރލައިނުން ބުނެއެވެ. އަދި މާރޗުމަހު އޮންނަ ފަތުރުވެރިކަމާބެހޭ އެންމެ ބޮޑު ފެއަރ، އައިޓީބީ ބާލިންއާއި ދިމާކޮށް ރާއްޖެއިން ބާރލިންއަށް ދަތުރުކުރާ ފަރާތްތަކަށް މިޕްރޮމޯޝަންގެ ތެރެއިން ޓާރކިޝް އެއަރލައިނުން ދެކޮޅު ޓިކެޓް 977 ޑޮލަރަށް ވިއްކުމަށް ވަނީ ނިންމާފައެވެ.
ރާއްޖެއަކީ ފަތުރުވެރިކަން އިޝްތިހާރުކުރުމަށް ގިނަ ޤައުމުތަކުގައި އޮންނަ ފެއަރތަކުގައި ބައިވެރިވާ ޤައުމެކެވެ. ތުރުކީ ވިލާތުގެ ޤައުމީ އެއަރލައިން އަކީ ދުނިޔޭގެ 300 މަންޒިލަކަށް ދަތުރުކުރާ އެއަރލައިނެކެވެ.