ކަލާސް އެވޯޑްގެ އެޑިޔުކޭޝަން މިނިސްޓަރުގެ ހާއްސަ އެވޯޑު، ރަސްމީކޮށް ރާއްޖޭގެ 1ވަނަ ޓީޓީ ކުޅުންތެރިޔާ ފާތިމަތު ދީމާ އަލީއަށް ހަވާލުކޮށްފިއެވެ.
ދީމާއަށް މި އެވޯޑު ހަވާލުކުރީ އެޑިއުކޭޝަން މިނިސްޓަރީގައި މިއަދު ބޭއްވި ރަސްމިއްޔާތެއްގައެވެ. ކަލާސް އެވޯޑުގައި މުޅިން އަލަށް ތައާރަފުކުރި މިނިސްޓަރުގެ ހާއްސަ އެވޯޑު، ރާއްޖޭގެ 1ވަނަ ޓީޓީ ކުޅުންތެރިޔާ ދީމާއަށް ހަވާލުކޮށްދެއްވީ އެޑިއުކޭޝަން މިނިސްޓަރ ޑރ. ޢާއިޝަތު ޢަލީ އެވެ. މި ރަސްމިއްޔާތުގައި ދީމާގެ ބެލެނެވެރިންގެ އިތުރުން ޓީޓީ އެސޯސިއޭޝަންގެ ސެކްރެޓަރީ ޖެނެރަލް ސުޖާ ވެސް ބައިވެރިވަޑައިގެންނެވިއެވެ.
މިނިސްޓަރުގެ ހާއްސަ އެވޯޑަކީ ރާއްޖޭގެ ސްކޫލެއްގައި ތަޢުލީމު ހާސިލުކުރާ ދަރިވަރުންގެ އިތުރުން ރާއްޖޭން ބޭރުގައި ތަޢުލީމު ހާސިލުކުރާ ދަރިވަރުންގެ ތެރެއިން ޤައުމަށް ރީތި ނަން ހޯދައިދޭ ދަރިވަރުންނަށް އެޑިއުކޭޝަން މިނިސްޓަރ ދެއްވާ ހާއްސަ އެވޯޑެކެވެ.
ސްރީ ލަންކާގައި ތަޢުލީމު ހާސިލުކުރަމުން އަންނަ ދީމާއަށް މިދިޔަ އަހަރުގެ އިތުރުން މިއަހަރަކީ ވެސް ވަރަށް ކާމިޔާބު އަހަރެކެވެ. މިދިޔަ އަހަރު ލަންކާގެ ރޯޔަލް އިންސްޓިޓިއުޓްގެ ޝަރަފުވެރި 2 އެވޯޑެއް ހޯދި ދީމާ ވަނީ މިއަހަރުގެ ޤައުމީ މުބާރާތުގެ ކާމިޔާބީގެ އިތުރުން މިއަހަރުގެ އިންޑިއަން އޯޝަން އައިލެންޑް ގޭމްސްގައި ރާއްޖެއަށް 3 ރަން މެޑަލް ހޯދައިދީފަ އެވެ.
މިއަހަރުގެ ކަލާސް އެވޯޑްގައި ވަނީ 14 ކުޅިވަރަކުން ޖުމްލަ 224 އެވޯޑް ދީފައެވެ. "މޯލްޑިވްސް ސްކޫލް ސްޕޯޓްސް އެވޯޑްސް" ނުވަތަ ކަލާސް އެވޯޑަކީ، ރާއްޖޭގެ ސްކޫލުތަކުގައި ތަޢުލީމު ހާސިލުކުރާ ދަރިވަރުން، ދިރާސީ އަހަރުގެ ތެރޭގައި ވާދަކުރާ އެކިއެކި ކުޅިވަރުތަކުން ހޯދާ ރަންވަނަތައް ޤައުމީ ފެންވަރެއްގައި ފާހަގަކުރުމަށް އެޑިޔުކޭޝަން މިނިސްޓްރީން 2014 ވަނަ އަހަރު ތަޢާރަފްކުރި އެވޯޑެކެވެ.