ވިދިވިދިގެން 5 ވަނަ ފަހަރަށް ޤައުމީ ފެތުމުގެ މުބާރާތުގެ ޗެމްޕިއަންކަން ނިއުލެގޫންސް ހޯދައިފި
ވިދިވިދިގެން ފަސްވަނަ ފަހަރަށް ޤައުމީ ފެތުމުގެ މުބާރާތުގެ ފިރިހެން ކެޓަގަރީގެ ޗެމްޕިއަންކަން ނިއުލެގޫންސް ސްވިމިން ކުލަބުން ހޯދައިފިއެވެ.
ބީއެމްއެލް ޤައުމީ 44 ވަނަ ފެތުމުމުގެ މުބާރާތުގެ ދެ ކެޓަގަރީންވެސް މިއަހަރު ޗެމްޕިއަންކަން ހޯދީ ނިއުލެގޫންސްއެވެ.
މުބާރާތުގެ ނިމުން ފާހަގަކުރަން ޖަމާލުއްދީން ސުކޫލުގައި ބޭއްވި ރަސްމިއްޔާތު ޝަރަފްވެރިކޮށްދެއްވީ ރައީސުލްޖުމްހޫރިއްޔާގެ އަނބިކަބަލުން ފާޒްނާ އަޙުމަދުއެވެ. މީގެ އިތުރުން ކުޅިވަރާބެހޭ ވަޒީރު އަޙުމަދު މަހްލޫފްގެ އިތުރުން ސްޕޯޓްސް ކޮމިޝަނަރ އަހުމަދު ސަލީމް އަދި ސްޕޯޓްސް ކައުންސިލްގެ ރައީސް އިބްރާހިމް އިސްމާއިލް ވަނީ މި ރަސްމީޔާތުގައި ބައިވެރިވެވަޑައިގެންފައެވެ.
މި މުބާރާތުގެ އަންހެން އަދި ފިރިހެން ކެޓަގަރީ ނިއުލެގޫންސް ކާމިޔާބުކުރިއިރު ފިރިހެން ބައިގެ ޗެމްޕިއަންކަން ނިއުލެގޫންސްއިން ވިދިވިދިގެން ހޯދި މިއީ ފަސްވަނަ ފަހަރެއެވެ.
މުބާރާތުގެ އަންހެން ކެޓަގެރީގެ ދެވަނަ ހޯދީ މޯލްޑިވްސް ލައިފް ގާޑް އެސޯސިއޭޝަންއެވެ. ތިންވަނަ ހޯދީ ސްވިމިން މޯލްޑިވްސްއެވެ. މުބާރާތުގެ ފިރިހެން ކެޓަގަރީގެ ދެވަނަ ޓީމަކީ ސްޕޯޓްސް ނޭޗަރ އަދި ތިންވަނަ ހޯދީ މޯލްޑިވިސް ލައިފްގާޑް އެސޯސިއޭޝަންއެވެ.
މުބާރާތާއި ގުޅުވައިގެން ތުއްތު ކުދިންނަށް ޙާއްސަ ފެތުމުގެ ފެސްޓިވަލެއް މިއަހަރުގެ މުބާރާތުގައި ވަނީ ހިމަނާފައެވެ. މިއީ ތުއްތުކުދިންނަށް މިފަދަގޮތަކަށް ބޭއްވި ޤައުމީ ފެތުމުގެ ފުރަތަމަ ފެސްޓިވަލެއެވެ.
މި ފެސްޓިވަލްގައި ވަނީ 198 ކުދިން ވަނީ ވާދަކޮށްފައެވެ. މި މުބާރާތުގައި 68 އަންހެން ފެތުންތެރިންނާއި 104 ފިރިހެން ފެތުންތެރިން 9 ޓީމަކުން ވަނީ ވާދަކޮށްފައެވެ. އެއީ 3 އަންހެން ޓީމާ 6 ފިރިހެން ޓީމެއެވެ.