ހުސްވި މެއި މަހު މީރާއަށް އާމްދަނީގެ ގޮތުގައި 951.3 މިލިއަން ރުފިޔާ ލިބިއްޖެއެވެ.މިއީ މިދިޔަ އަހަރުގެ މެއި މަހާ އަޅާ ބަލާއިރު އަށާރަ ޕޮއިންޓް ނުވައެއް އިންސައްތަ އިތުރު އަދަދެކެވެ.މީރާއިން އާއްމުކޮށްފައިވާ ތަފާސް ހިސާބްތައް ދައްކާގޮތުން މެއި މަހުގެ އާމްދަނީ އިތުރުވެފައިވަނީ މިދިޔަ އަހަރުގެ ނޮވެމްބަރު މަހު ޓޫރިޒަމް ދާއިރާގެ ޖީއެސްޓީ ރޭޓް 12 ޕަސެންޓް އިތުރުވުމުންނާއި އެންފޯސްމަންޓް އެކްޝަންތަކުގެ ސަބަބުން ޓޫރިޒަމް ލޭންޑް ރެންޓާއި އޭގެ ޖޫރިމަނާގެ ގޮތުގައި ލިބިފައިވާ ފައިސާ އިތުރުވުމުންނެވެ. މިއަހަރުގެ ފުރަތަމަ ފަސްމަސް ދުވަހުގެ ތެރޭގައި މީރާއިން ވަނީ އާމްދަނީގެ ގޮތުގައި 5.61 ބިލިއަން ރުފިޔާ ބަލައިގަނެފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު 27.3 އިންސައްތަ އިތުރު އަދަދެއް ކަމަށް މީރާއިން ބުނެއެވެ.މިދިޔަ މެއި މަހު ލިބިފައިވާ އާމްދަނީއަކީ އެ މަހުގައި ލިބޭނެ ކަމަށް އަންދާޒާ ކުރެވުނު އަދަދަށްވުރެ 2.7 ޕަސެންޓް އިތުރު އަދަދެއް ކަމަށް ތަފާސް ހިސާބްތަކުން ދައްކައެވެ.މިދިޔަ މެއި މަހު މީރާއަށް އެންމެ ގިނައިން އާމްދަނީ ލިބިފައިވަނީ ޖީއެސްޓީންނެވެ. އެގޮތުން ޖީއެސްޓީގެ ގޮތުގައި މިދިޔަ މަހު 490.01 މިލިއަން ރުފިޔާ ލިބިފައިވެއެވެ.ދެވަނައަށް އެންމެ ބޮޑު އާމްދަނީއެއް ލިބިފައިވާ ލީސް ޕީރިއަޑް އެކްސްޓެންޝަން ފީއިންނެވެ. އެގޮތުން ލީސް ޕީރިއަޑް އެކްސްޓެންޝަން ފީގެ ގޮތުގައި ޖުމްލަ އާމްދަނީގެ 205.16 މިލިއަން ރުފިޔާ ލިބިފައިވެއެވެ.