މަޖިލީހާއި މިނިސްޓަރުގެ ގޮތުގައި އަންހެނުން ތިބުން ދައްކުވައިދެނީ އަންހެނުންގެ ބާރިވެރިކަން - ޝިދާތާ
ރައްޔިތުންގެ މަޖިލީހާއި މިސަރުކާރުގެ ކެބިނެޓުގައި މިނިސްޓަރުންގެ ގޮތުގައި އަންހެނުން މަަސައްކަތްކުރާ މިންވަރު އިތުރުވެގެންދިއުމަކީ ޤައުމުގެ ތަރައްޤީގައި އަންހެނުންގެ ބާރުވެރިކަން އޮތް މިންވަރު ދައްކުވައިދޭ މިސާލެއްކަމަށް މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ވިދާޅުވެއްޖެއެވެ. މިނިސްޓަރ މިހެން ވިދާޅުވީ ވިމެން އޮން ބޯޑްގެ އެނުއަލް އެވޯޑް ޙަފްލާގައި ވާހަކަ ދައްކަވަމުންނެވެ.
މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ވިދާޅުވީ މުޖުތަމަޢު، އަންހެނުންނާމެދު ދެކޭގޮތް ބަދަލުވަމުން އަންނަކަމަށެވެ. މިކަމަށްޓަކައި ސަރުކާރުގެ އިތުރުން އަމިއްލަ ޖަމްޢިއްޔާތަކުން ބޮޑެތި މަސައްކަތްތަކެއް ކުރައްވާކަން މިނިސްޓަރ ފާހަގަކުރެއްވިއެވެ.
އަންހެނުން ބާރުވެރިކުރުވައި އަންހެނުންގެ ޙައްގުތައް ޙިމާޔަތް ކުރުމަށް ސަރުކާރުގެ ތެރެއިން ގިނަ މަސައްކަތްތަކެއް މިހާރުވެސް ކުރައްވާފައިވާކަމަށް މިނިސްޓަރ ވިދާޅުވިއެވެ. އެގޮތުން ޖިންސުގެ ހަމަހަމަކަމާއި، ތަފާތު ކުރުން ނައްތާލުމާާއި، އަންހެނުންނަށް ލިބޭ އަނިޔާތައް ހުއްޓުވުމުގައި ކާމިޔާބު މަސައްކަތްކެއް މިހާތަނަށް ކޮށްފައިވާކަމަށްވެސް މިނިސްޓަރ ވިދާޅުވިއެވެ.
"ސިޔާސީ މަސައްކަތްތަކުގައި އަންހެނުންގެ ބައިވެރިވުން އިތުރުކުރަންޖެހޭ. އަދި އިޤްތިސާދު ކުރިއެރުވުމުގައި އަންހެނުންގެ ބައިވެރިވުން އިތުރުކުރުމަށް ވިމަން ފްރެންޑްލީ މަސައްކަތުގެ މާޙައުލުތައް ބިނާކުރުމަށް އިތުރަށް މަސައްކަތް ކުރަންޖެހޭ." މިނިސްޓަރ ވިދާޅުވިއެވެ.
ވިމަން އޮން ބޯޑް އެނުއަލް އެވޯޑަކީ ދިވެހި އަންހެނުން ރާއްޖޭގެ އިޤްތިޟާދު ކުރިއެރުވުމަށް ކުރާމަސައްކަތްތައް ފާހަގަކޮށް ދޭ އެވޯޑެކެވެ. މި އަހަރުވެސް ވިމަން އޮން ބޯޑް އެވޯޑް ތަފާތު ދާއިރާތަކުން ދީފައިވެއެވެ. މީގެތެރޭގައި ސަރުކާރާއި އަމިއްލަ ކުންފުނިތައް ލީޑް ކުރައްވާ އަންހެން ބޭފުޅުންނާއި، ސިއްޙީ، ތަޢުލީމް، ފަތުރުވެރިކަން، ނޫސްވެރިކަން ފަދަ ދާއިރާތަކުން ނަމޫނާ އަންހެނުންނަށްވަނީ އެވޯޑް ދީފައެވެ. އަދި ވިޔަފާރީގެ ދާއިރާގައި އަރަމުންއަންނަ އަންހެނުންނާއި، އިޖްތިމާއީ ދާއިރާއިން ފާހަގަކުރެވޭ ފަރާތްތަކަށް އެވޯޑް ދީފައިވެއެވެ.
ވުމަން އޮން ބޯޑްގެ އެންމެ ޝަރަފުވެރި އިނާމް " ލައިފްޓައިން އެޗީވްމަންޓް އެވޯޑް" ލިބިފައިވަނީ ކުރީގެ މިނިސްޓަރު އަނީސާ އަޙްމަދަށެވެ. އަނީސާވަނީ މިނިސްޓަރ އޮފް ޖެންޑަރ އެންޑް ފެމިލީގެ މަޤާމާއި ރައްޔިތުންގެ މަޖިލީހުގެ ނާއިބު ރައީސްގެ މަޤާމާއި އަންހެނުންގެ ޙިމާޔަތުގައި "ހޯޕް ފޯ ވިމަން"ގެ ނަމުގައި އެންޖީއޯއެއް އުފައްދަވާފައެވެ.
އެވޯޑް ޙަފްލާގައި ވާހަަކަދައްކަވަމުން، ވުމަން އޮން ބޯޑްގެ ވައިސް ޕްރެސިޑެންޓް ޑރ.އައިޝަތު މުނީޒާ ވިދާޅުވީ މިހާތަނަށްވެސް ރާއްޖޭގައި އަންހެނުން މަސައްކަތުގެ މައިދާނުގައިއުޅޭ މިންވަރު ދެނެގަނެވިފައި ނުވާކަމަށެވެ. މިފަދަ ކަންކަން އިތުރަށް ދިރާސާކޮށް، އަންހެނުން ކުރާ މަސައްކަތްތައް ބަލައިގަންނަން ޖެހޭ ކަމަށް އޭނާ ވިދާޅުވިއެވެ.
މުނީޒާ ވިދާޅުވީ މިފަދަ އެވޯޑެއް ދިނުމުގެ އެންމެ ބޮޑު މަޤްސަދަކީ ކުރިއަށްދާން ބޭނުންވާ އަންހެނުންނަށް ނަމޫނާ އަންހެނުންތަކެއް ދައްކުވައިދީ، ކުރިމަގު ބިނާކުރުމުގައި ލަފާ ހޯދަންވީ ފަރާތްތައް ދައްކުވައި ދިނުންކަމަށެވެ. ވިމަން އޮން ބޯޑް ޖަމިއްޔާ އުފައްދާފައިވަނީ 2015ވަނަ އަހަރެވެ. އޭގެ ފަހުން ކޮންމެ އަހަރަކުވެސް ވުމަން އޮން ބޮޑް އެނުއަލް އެވޯޑް އަންނަނީ ދެމުންނެވެ.