ޖަލަށްލީ އެމަނިކުފާނުގެ އިސްތަށިފުޅުގައި އެއްވެސް ކުށެއް އެޅުވޭނެގޮތެއް ނެތުމުން ސަރުކާރުން ނުފޫޒު ފޯރުވައިގެންކަމަށާ ޖަލުގައި ބަންދުވާން ޖެހިވަޑައިގަތުމަކީ ވޭންހުރިކަމެއްކަމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
ޕްރޮގްރެސިވް ކޮންގްރެސް ކޯލިޝަނުން ހުޅުމާލޭގައި ކުރިއަށްގެންދިޔަ ކެމްޕެއިން ޙަރަކާތެއްގައި ބައިވެރިވި ސަޕޯޓަރުންނާ ފޯނުން ވާހަކަފުޅުދައްކަވަމުން ޔާމީން ވިދާޅުވީ އެމަނިކުފާނުގެ ސަރުކާރުގައި މީހުން ޖަލަށް ލާފައިވާނީ އެމީހުން ބޮޑެތި ޖަރީމާތައް ހިންގައިގެންކަަމަށާ، އެއީ ސިޔާސީ ލީޑަރުންކަމަށް ވީނަމަވެސް ބޮޑެތި ޖަރީމާ ހިންގައިގެން ޖަލަށްލީ ބައެއްކަމަށެވެ. އެހެންނަމަވެސް އެމަނިކުފާނު ޖަލަށްލެއްވީ އެއްވެސް ކުށެއް އެމަނިކުފާނުގެ އިސްތަށިފުޅުގައި އެޅުވޭނެގޮތެއް ނެތުމުން ސަރުކާރުން ނުފޫޒްފޯރުވައިގެންކަމަށެވެ.
އެއީ އެމަނިކުފާނުގެ މައްޗަށް ޝަރުޢީ ޙުކުމެއް އައިސްގެން ކުރިކަމެއް ނޫންކަމަށާ، އެއީ އެމަނިކުފާނުގެ ދޫ ބަންދުކުރުމަށާ ސިޔާސީގޮތުން އެމަނިކުފާނު ހުއްޓުވަން ކުރެއްވިކަމެއްގެ ގޮތުގައި ޔާމީން ތުހުމަތުކުރެއްވިއެވެ. ބަންދުނުކޮށް އެކައުންޓްގައި ހުރި ފައިސާ ނުހިފަށްޓާނަމަ ކުރިއަށްއޮތް މަޖިލިސް އިންތިޚާބަކީ ފަސޭހަކަމާއެކު ގިނަ ގޮނޑިތަކެއް ކާމިޔާބުކުރާނެ އިންތިޚާބެއްކަމަށްވެސް ޔާމީން ވިދާޅުވިއެވެ.
"އެއްވެސް ކުށެއް އަޅުގަނޑުގެ ބޮލުގައި ނޭޅުވުނީމަ ހަމަނުފޫޒް ފޯރުވައިގެން އަޅުގަނޑު ބަންދުކުރީ. އަޅުގަނޑު ޖަލަށްލީ. ޖަލުގަ އުޅުމަކީ ވޭންހުރިކަމެއް. އަޅުގަނޑުގެ ސަރުކާރުގައި މީހުން ޖަލަށްލާފައިހުރީ ބޮޑެތި ޖަރީމާ ހިންގައިގެން." ކުރީގެ ރައީސް ޔާމީން ވިދާޅުވިއެވެ.
ޔާމީންގެ ވާހަކަފުޅުގައި ޕީޕީއެމްއާއި ޕީއެންސީން ވާދަކުރާާ ކެނޑިޑޭޓުންނަށް ޚަރަދުކުރަން ފައިސާ ނުދެވިގެ އުޅޭކަމަށާ އެއީފައިސާ ނެތިގެން ނޫންކަމަށް ވިދާޅުވިއެވެ. ކެމްޕެއިނަށް ޚަރަދުކުރާނެ ފައިސާ އެބަހުރިކަމަށާ އޭގެތެރޭގައި ސަރުކާރުގެ ބައި ލާރިވެސް ނޯންނާނެކަމަށް ޔާމީން ވިދާޅުވިއެވެ.
މިޖަލްސާގައިވެސް ޔާމީންވަނީ އެމަނިކުފާނުގެ އެކައުންޓް ފްރީޒްކުރީ ޤާނޫނާ ޚިލާފަށްކަމަށް ވިދާޅުވެފައެވެ. އެއީ ކެނޑިޑޭޓުންގެ ކެމްޕެއިނަށް ޚަރަދުކުރާނެތީ ކޮށްފައިވާ ކަމެއްކަަމަށް ތުހުމަތުކުރައްވައި ޔާމީން ވިދާޅުވީ، އެފައިސާ ހިފަހައްޓާފައި ހުންނަތާ 4 މަސްދުވަސް ވެފައިވާކަމަށެވެ. އަދި ޔާމީންވަނީ ޕީޕީއެމް ޕީއެންސީގެ އެންމެ އިސް ސަފުގައި ޙަރަކާތްތެރިވާ ބައެއް ކެނޑިޑޭޓުންގެ ނަންތައް ވިދާޅުވެ އެކެނޑިޑޭޓުން ހޮވުމަށް ޚަރަދުކުރާނެތީ ސަރުކާރުން ކުރެއްވިކަމެއްކަމަށްވެސް ތުހުމަތުކުރައްވާފައެވެ. ހުޅުމާލެއަށް އެމަނިކުފާނުގެ ސަރުކާރުން ގެންނެވި ތަރައްޤީއާ ގުޅޭގޮތުން ވާހަކަފުޅު ދައްކަވަމުން ޔާމީން ވިދާޅުވީ އެތަރައްޤީގެ ފޮނި މީރުކަން ބުއިމަށްޓަކައި އެމްޑީޕީން ދަހިވެތިވެފައިވާކަމަށެވެ.
ޔާމީންގެ އެކައުންޓްތަކުގައި ހުރި ފައިސާ ފްރީޒްކުރަން ކްރިމިނަލް ކޯޓުން ނެރުނު އަމުރު ހައިކޯޓުން މިހާރުވަނީ ބާޠިލްކޮށްފައެވެ. އަދި ޔާމީން ބަންދުކުރުމަށް ނެރުނު ޢަމުރުވެސް ބާޠިކުކޮށް ވަނީ މިނިވަންކޮށްފައެވެ. ޔާމީންގެ އެކައުންޓްތަކުން 100 މިލިއަނަށްވުރެ ގިނަ ރުފިޔާ ކޯޓް އަމުރެއްގެ ދަށުން ފްރީޒްކުރީ ޤަވާއިދާ ޚިލާފަށް މާލީ މުޢާމަލާތްތަކެއްކުރިކަމަށް ތުހުމަތުކުރެވޭ މައްސަލައެއް ފުލުހުން ބަލަންފަށާފައިވުމުންނާއި، ރިޔާސީ އިންތިޚާބުގެ ތެރޭގައި ޔާމީންގެ ބޭންކް އެކައުންޓަކަށް ގިނައަދަދެއްގެ ފައިސާތަކެއް ޖަމާކުރި މައްސަލަ އެމްއެމްއޭއިން ފުލުހުންނަށް ހުށަހެޅުމުންނެވެ.